Zacarías 5 - Li Santil hu

Li botbil hu li quicꞌutbesi̱c saꞌ li visión

¹ Quicꞌutbesi̱c cuiꞌchic chicuu jun li visión. Quicuil nak yo̱ chi xic saꞌ ikꞌ jun li botbil hu tzꞌi̱banbil ru.

² Ut li ángel quixye cue: —¿Cꞌaꞌru yo̱cat chirilbal?— La̱in quinchakꞌoc ut quinye re: —Yo̱quin chirilbal jun li botbil hu yo̱ chi xic saꞌ ikꞌ. Laje̱b metro rok ut o̱b metro ru.—

³ Ut aꞌan quixye cue: —Li cꞌaꞌru tzꞌi̱banbil chiru li hu aꞌin, aꞌan retalil nak ac xteneba̱c li tojba ma̱c saꞌ xbe̱neb chixjunileb li cuanqueb saꞌ ruchichꞌochꞌ. Jun pacꞌal tzꞌi̱banbil nak eb li nequeꞌelkꞌac teꞌxcꞌul li tojba ma̱c. Ut saꞌ li jun pacꞌal chic tzꞌi̱banbil nak eb li nequeꞌxpatzꞌ xcꞌabaꞌ li Dios chi ma̱cꞌaꞌ rajbal teꞌxcꞌul ajcuiꞌ li tojba ma̱c. Ma̱ jun reheb teꞌcana̱k chi incꞌaꞌ teꞌxcꞌul li tojba ma̱c.

⁴ Li cuanqueb saꞌ rochocheb li nequeꞌelkꞌac teꞌxcꞌul li tojba ma̱c joꞌqueb ajcuiꞌ li cuanqueb saꞌ rochocheb li nequeꞌxpatzꞌ incꞌabaꞌ chi ma̱cꞌaꞌ rajbal. Aran ta̱cua̱nk li raylal toj retal teꞌosokꞌ eb aꞌan ut teꞌosokꞌ ajcuiꞌ li rochocheb joꞌ ajcuiꞌ chixjunil li cꞌaꞌru cuan reheb, chan li Ka̱cuaꞌ.

Li ixk li chunchu saꞌ li nimla chacach li quicꞌutbesi̱c chiru laj Zacarías saꞌ visión

⁵ Ut quichal cuiꞌchic li ángel li ac x-a̱tinac cuiqꞌuin ut quixye cue: —Il aꞌin li oc re chixcꞌutbal cha̱cuu li Ka̱cuaꞌ, chan.

⁶ Ut la̱in quinye: —¿Cꞌaꞌru aꞌan, at Ka̱cuaꞌ?— Ut aꞌan quixye cue: —Li yo̱cat chirilbal, aꞌan jun nimla chacach re bisoc trigo. Li chacach aꞌin, aꞌan retalil lix ma̱queb chixjunileb li cuanqueb saꞌ ruchichꞌochꞌ, chan li ángel.

⁷ Ut quicuaclesi̱c li chꞌi̱chꞌ plomo li tzꞌaptzꞌo cuiꞌ li chacach. Ut chi saꞌ li chacach chunchu jun li ixk.

⁸ Ut li ángel quixye cue: —Li ixk aꞌin, aꞌan retalil li ma̱usilal, chan. Ut li ángel quixtiquisi li ixk chi saꞌ li chacach ut quixtzꞌap cuiꞌchic li re riqꞌuin li chꞌi̱chꞌ.

⁹ Ut quicuil ajcuiꞌ cuibeb li ixk cuanqueb xxicꞌ. Yo̱queb chi rupupic. Chanchaneb li nimla xul li narupupic cigueña xcꞌabaꞌ. Quicuil nak yo̱queb chixtaksinquil li chacach saꞌ ikꞌ.

¹⁰ Ut quinpatzꞌ cuiꞌchic re li ángel li yo̱ chi a̱tinac cuiqꞌuin: —¿Bar yo̱queb chixcꞌambal li chacach aꞌan? chanquin re.

¹¹ Quichakꞌoc li ángel ut quixye cue: —Yo̱queb chixcꞌambal saꞌ li naꞌajej Sinar. Aran teꞌxyi̱b jun li templo. Nak acak xya̱loꞌ li templo, aran teꞌxxakab saꞌ xnaꞌaj, chan.