Zacarías 4 - Li Santil hu

Li candelero li quicꞌutbesi̱c saꞌ li visión

¹ Ut li ángel li quia̱tinac cuiqꞌuin quisukꞌi cuiꞌchic chak ut quinrajsi. Chanchan nak na-ajsi̱c junak yo̱ chi cua̱rc.

² Ut quixye cue: —¿Cꞌaꞌru yo̱cat chirilbal?— Ut la̱in quinchakꞌoc ut quinye re: —Yo̱quin chirilbal jun li candelero yi̱banbil riqꞌuin oro. Ut saꞌ xbe̱n cuan xnaꞌaj li aceite ut cuan xnaꞌaj cuukub candil ut cuan ajcuiꞌ cuukub li nanumeꞌ cuiꞌ li aceite.

³ Ut chixcꞌatk cuan cuib xto̱nal li olivo. Jun to̱n li olivo cuan chixcꞌatk li xnaꞌaj li aceite saꞌ xnim ut li jun to̱n chic cuan saꞌ xtzꞌe.

⁴ Quinpatzꞌ re li ángel li yo̱ chi a̱tinac cuiqꞌuin: —Ka̱cuaꞌ, ¿cꞌaꞌru xya̱lal aꞌin li yo̱quin chirilbal?—

⁵ Ut li ángel quichakꞌoc ut quixye cue: —¿Ma incꞌaꞌ nacanau cꞌaꞌru xya̱lal li yo̱cat chirilbal?— Ut la̱in quinye re: —Incꞌaꞌ ninnau, Ka̱cuaꞌ.—

Li Dios quixye nak tixqꞌue xcuanquil laj Zorobabel re xba̱nunquil li cꞌanjel

⁶ Lix ángel li Ka̱cuaꞌ quichakꞌoc ut quixye cue: —Aꞌan aꞌin li quixye li Ka̱cuaꞌ re laj Zorobabel: Moco riqꞌuin ta e̱metzꞌe̱u chi moco riqꞌuin ta e̱cuanquil te̱ba̱nu li cꞌanjel aꞌin. Riqꞌuin ban lix cuanquil lin Santil Musikꞌ li tinqꞌue e̱re, chan li nimajcual Dios.

⁷ Usta joꞌ xnimal jun li tzu̱l li chꞌaꞌajquilal li ta̱cha̱lk, abanan laj Zorobabel tixcuy xnumsinquil chixjunil li ta̱cha̱lk saꞌ xbe̱n toj tixchoy xyi̱banquil li templo. Ut nak ta̱qꞌuema̱nk li pec re xchoybal li cꞌanjel chixjunileb teꞌxjap re chixyebal: ¡Cꞌajoꞌ xlokꞌal! ¡Bantiox re li Ka̱cuaꞌ!—

⁸ Ut lix ángel li Ka̱cuaꞌ quia̱tinac cuiꞌchic cuiqꞌuin ut quixye cue: —Joꞌcaꞌin xye li Ka̱cuaꞌ:

⁹ Laj Zorobabel quitiquiban re xyi̱banquil li templo ut aꞌan ajcuiꞌ ta̱choyok re xyi̱banquil. Ut riqꞌuin aꞌan, la̱at ta̱nau nak li Ka̱cuaꞌ, li nimajcual Dios xtaklan chak cue e̱riqꞌuin.

¹⁰ Li queꞌtzꞌekta̱nan re li cꞌanjel saꞌ xticlajic ta̱sahokꞌ saꞌ xchꞌo̱leb chirilbal nak yo̱k chi ya̱locꞌ li cꞌanjel xban laj Zorobabel.— Nak xrakeꞌ xyebal aꞌan, li ángel quixye ajcuiꞌ: —Li cuukub chi candil li xacuil, aꞌan retalil nak li Ka̱cuaꞌ naril chixjunil li ruchichꞌochꞌ, chan li ángel.

¹¹ Ut la̱in quinpatzꞌ re li ángel: —¿Cꞌaꞌru xya̱lal li cuib to̱n chi olivo li cuanqueb chi xcaꞌ pacꞌalil li candelero?—

¹² Ut quinpatzꞌ ajcuiꞌ re: —¿Cꞌaꞌru xya̱lal li cuib chi rukꞌ cheꞌ olivo li na-el cuiꞌ chak li aceite li nanumeꞌ saꞌ li cuib chi oro li naxic saꞌ li candil?—

¹³ Ut li ángel quichakꞌoc ut quixye cue: —¿Ma incꞌaꞌ nacanau cꞌaꞌru xya̱lal li yo̱cat chirilbal?— Ut la̱in quinye re: —Incꞌaꞌ ninnau, Ka̱cuaꞌ.—

¹⁴ Ut li ángel quichakꞌoc ut quixye cue: —Li cuib chi rukꞌ cheꞌ olivo, aꞌaneb retalil li cuib li sicꞌbileb ru chi cꞌanjelac chiru li Ka̱cuaꞌ, laj e̱chal re li ruchichꞌochꞌ, chan.