Zacarías 3 - Li Santil hu

Laj Josué li xbe̱nil aj tij quicꞌutbesi̱c chiru laj Zacarías saꞌ visión

¹ Ut quixcꞌutbesi ajcuiꞌ chicuu jun chic li visión ut quicuil nak laj Josué li xbe̱nil laj tij xakxo chiru lix ángel li Ka̱cuaꞌ. Ut xakxo ajcuiꞌ laj tza saꞌ xnim ukꞌ li ángel re xjitbal laj Josué.

² Ut lix ángel li Ka̱cuaꞌ quixye re laj tza: —Aꞌ taxak li Ka̱cuaꞌ Dios chikꞌusuk a̱cue. Aꞌ taxak li Ka̱cuaꞌ li quisicꞌoc ruheb laj Jerusalén chikꞌusuk a̱cue. ¿Ma incꞌaꞌ ta biꞌ xeꞌcoleꞌ eb aꞌan joꞌ nak xcoleꞌ li ruꞌuj siꞌ isinbil saꞌ li xam?—

³ Laj Josué tzꞌaj ru li rakꞌ li cuan chirix nak xakxo chiru lix ángel li Ka̱cuaꞌ.

⁴ Ut li ángel quia̱tinac riqꞌuineb li yo̱queb chi tenkꞌa̱nc re ut quixye reheb: —Isihomak li rakꞌ li tzꞌaj ru.— Ut quixye re laj Josué: —Anakcuan xcuisi la̱ cuakꞌ li tzꞌaj ru ut xinqꞌue li cha̱bil tꞌicr cha̱cuix. Aꞌan retalil nak cuybil sachbil chic la̱ ma̱c.—

⁵ Ut quixye reheb: —Bacꞌomak junak tꞌicr sak ru saꞌ xjolom, chan. Ut queꞌxqꞌue jun li tꞌicr sak ru saꞌ xjolom ut queꞌxqꞌue li cha̱bil tꞌicr chirix. Ut lix ángel li Ka̱cuaꞌ xakxo aran.

⁶ Ut lix ángel li Ka̱cuaꞌ quixqꞌue xnaꞌleb laj Josué ut quixye re:

⁷ —Joꞌcaꞌin xye li Ka̱cuaꞌ li nimajcual Dios: Cui tatcua̱nk joꞌ nacuaj ut cui ta̱ba̱nu li cꞌaꞌru ninye, la̱at tat-ilok re li cuochoch ut la̱at ajcuiꞌ tat-ilok re chixjunil li neba̱l li cuan chire li cuochoch. Cui ta̱ba̱nu aꞌin tinqꞌue a̱naꞌaj saꞌ xya̱nkeb li cuanqueb arin.

⁸ At Josué, la̱at li xbe̱nil laj tij. Chacuabihak la̱at ut cheꞌrabihak ajcuiꞌ eb laj tij li nequeꞌtenkꞌan a̱cue. La̱ex retalil laj cꞌanjel chicuu li tintakla chak, li nequeꞌxye xtux cheꞌ re.

⁹ La̱in xinqꞌue jun li pec chiru laj Josué. Li pec aꞌan cuan cuukub pere̱l ru. La̱in tintzꞌi̱ba jun li retalil chiru. Ut chiru jun cutan tincuisi lix ma̱queb li cuanqueb saꞌ ruchichꞌochꞌ.

¹⁰ Nak ta̱cuulak xkꞌehil aꞌan, sa chic texcua̱nk chi ribil e̱rib. Ut naru textzaca̱nk saꞌ comonil saꞌ xmu li cheꞌ olivos ut saꞌ xmu li cheꞌ higo, chan li Ka̱cuaꞌ li nimajcual Dios.