Zacarías 2 - Li Santil hu

Li cꞌa̱m re bisoc li quicꞌutbesi̱c saꞌ li visión

¹ Li Ka̱cuaꞌ quixcꞌutbesi chicuu jun chic li visión. Quicuil jun li cui̱nk cuan jun li cꞌa̱m re bisoc saꞌ rukꞌ.

² Ut quinpatzꞌ re: —¿Bar xic a̱cue?— Ut aꞌan quixye cue: —Xic cue chixbisbal li tenamit Jerusalén. Tinbis joꞌ nimal rok ut joꞌ nimal ru, chan.

³ Qui-el li ángel li yo̱ chi a̱tinac cuiqꞌuin. Nak yo̱ chi xic, quicuil jun chic li ángel co̱ chixcꞌulbal.

⁴ Ut quixye re: —Ayu saꞌ junpa̱t chixtaubal li cui̱nk li xic re chi bisoc ut ta̱ye re nak teꞌta̱mk cuiꞌchic li cristian saꞌ li tenamit Jerusalén. Xban xqꞌuial li tenamit ut xban xqꞌuialeb lix queto̱mk incꞌaꞌ chic ta̱cua̱nk li tzꞌac li sutsu cuiꞌ li tenamit.

⁵ Chanchan sutsu̱k riqꞌuin xam li tenamit Jerusalén nak cua̱nkin riqꞌuineb chixcolbaleb riqꞌuin lin cuanquil. Ut tincꞌutbesi lin lokꞌal saꞌ xya̱nkeb, chan li Ka̱cuaꞌ.

⁶ Li Ka̱cuaꞌ quixye reheb lix tenamit: —Abihomak la̱ex aj Israel. La̱in xinjeqꞌuin e̱ru saꞌ chixjunil li ruchichꞌochꞌ. Anakcuan tex-e̱lk saꞌ li naꞌajej li cuan saꞌ li norte.

⁷ La̱ex aj Jerusalén, li cuanquex Babilonia, elenkex ut sukꞌinkex cuiꞌchic saꞌ le̱ naꞌaj, chan li Ka̱cuaꞌ.

⁸ Nak acak xqꞌue lin lokꞌal li Ka̱cuaꞌ li nimajcual Dios quinixtakla xyebal e̱re cꞌaꞌru teꞌxcꞌul li xni̱nkal ru tenamit li queꞌrahobtesin e̱re ut queꞌnumta saꞌ e̱be̱n. Li ani narahobtesin e̱re, chanchan ajcuiꞌ nak la̱in quineꞌxrahobtesi, chan.

⁹ Joꞌcan nak tinqꞌueheb saꞌ raylal. Ut la̱ex li cuanquex chokꞌ xmo̱seb, texinqꞌue chi numta̱c saꞌ xbe̱neb aꞌan re nak te̱nau nak li nimajcual Dios, aꞌan li quitaklan chak cue.

¹⁰ Li Ka̱cuaꞌ quixye: —Bichankex chi sa saꞌ e̱chꞌo̱l la̱ex aj Jerusalén xban nak la̱in tincua̱nk e̱riqꞌuin, chan.

¹¹ Saꞌ eb li cutan aꞌan nabalakeb li tenamit teꞌpa̱ba̱nk re li Ka̱cuaꞌ. Ut aꞌan tixye: —Aꞌanakeb ajcuiꞌ lin tenamit. Ut la̱in tincua̱nk riqꞌuineb, chaꞌak li Ka̱cuaꞌ. Ut la̱ex te̱nau nak li nimajcual Dios, aꞌan li quitaklan chak cue.

¹² Ut li Ka̱cuaꞌ ta̱cua̱nk cuiꞌchic aran Judá saꞌ li Santil Naꞌajej ut teꞌsiqꞌuekꞌ cuiꞌchic ruheb laj Jerusalén xban li Ka̱cuaꞌ.

¹³ Chixjunileb li cuanqueb saꞌ ruchichꞌochꞌ cheꞌxxucua ta ru li Ka̱cuaꞌ ut incꞌaꞌ ta chic teꞌecꞌa̱nk xban nak aꞌan tixcanab chak lix Santil Naꞌaj ut ta̱cha̱lk saꞌ kaya̱nk.