Zacarías 14 - Li Santil hu

¹ Cuulac re xkꞌehil nak li Ka̱cuaꞌ ta̱rakok a̱tin. Ut che̱ru ajcuiꞌ la̱ex ta̱jeqꞌui̱k re jalan chixjunil li cꞌaꞌru cuan e̱re.

² Li Ka̱cuaꞌ tixchꞌutubeb ru chixjunileb li xni̱nkal ru tenamit ut teꞌxic chi pletic e̱riqꞌuin la̱ex li cuanquex Jerusalén. Teꞌnumta̱k saꞌ e̱be̱n ut ta̱cꞌamekꞌ li cꞌaꞌru cuan e̱re. Eb li ixk telajeꞌchapekꞌ xbaneb li cui̱nk li teꞌcha̱lk chi pletic. Yijach le̱ tenamit teꞌcꞌamekꞌ saꞌ jalan naꞌajej. Ut li joꞌ qꞌuial chic teꞌcana̱k incꞌaꞌ teꞌisi̱k saꞌ le̱ tenamit.

³ Nak acak xeꞌxcꞌul aꞌan li Ka̱cuaꞌ chic ta̱xic chi pletic riqꞌuineb li xni̱nkal ru tenamit joꞌ quixba̱nu nak queꞌpletic chak junxil.

⁴ Saꞌ eb li cutan aꞌan li Ka̱cuaꞌ ta̱xakli̱k saꞌ xbe̱n li tzu̱l Olivos li cuan jun pacꞌal li tenamit Jerusalén saꞌ releb sakꞌe. Ut li tzu̱l Olivos ta̱jachekꞌ saꞌ xyi ut tixjecꞌ rib. Ta̱ticla̱k saꞌ releb sakꞌe lix jachalal ut ta̱cuulak bar na-oc cuiꞌ li sakꞌe. Jun nimla ru takꞌa ta̱cana̱k saꞌ xyi li cuib jachal. Jun jachal li tzu̱l ta̱cana̱k saꞌ li norte ut li jun jachal chic ta̱cana̱k saꞌ li sur.

⁵ La̱ex tex-e̱lelik ut texxic saꞌ li ru takꞌa li cuan saꞌ xya̱nk li tzu̱l xban nak li ru takꞌa aꞌan kꞌaxal nimak ut ta̱cuulak toj saꞌ li tenamit Azal. La̱ex tex-e̱lelik joꞌ nak queꞌe̱lelic le̱ xeꞌto̱nil yucuaꞌ nak quixqꞌue li hi̱c najter nak toj cua̱nk laj Uzías chokꞌ rey aran Judá. Ut nak ta̱cha̱lk li Ka̱cuaꞌ li kaDios, rochbenak chak chixjunileb lix ángel.

⁶ Saꞌ eb li cutan aꞌan ta̱cꞌulma̱nk nak li cutan kꞌojyi̱nak chic ru.

⁷ Kꞌaxal jalanak li cutan aꞌan xban nak incꞌaꞌ ta̱cua̱nk cutan chi moco ta̱cua̱nk kꞌojyi̱n. Moymo̱k ban ru li cutan. Caꞌaj cuiꞌ li Dios nanaꞌoc re chanru tixba̱nu. Nak ta̱ecuu̱k ta̱cutanokꞌ cuiꞌchic.

⁸ Jun li yuꞌam haꞌ ta̱e̱lk aran Jerusalén. Yijach ta̱xic saꞌ li nimla palau li cuan saꞌ li este li na-el cuiꞌ chak li sakꞌe. Ut li yijach chic ta̱xic saꞌ li palau li cuan saꞌ li oeste li na-oc cuiꞌ li sakꞌe. Li yuꞌam haꞌ aꞌan incꞌaꞌ ta̱chakik. Ta̱cua̱nk li haꞌ saꞌ habalkꞌe ut ta̱cua̱nk ajcuiꞌ saꞌ sakꞌehil.

⁹ Ut li Ka̱cuaꞌ, aꞌanak chic li tzꞌakal Rey saꞌ chixjunil li ruchichꞌochꞌ. Saꞌ eb li cutan aꞌan, jun ajcuiꞌ li Ka̱cuaꞌ teꞌxlokꞌoni. Aꞌan li Ka̱cuaꞌ Dios. Ut caꞌaj chic lix cꞌabaꞌ aꞌan teꞌxqꞌue xlokꞌal.

¹⁰ Junaj ru ta̱cana̱k li ru takꞌa. Ta̱ticla̱k chak Geba ut ta̱cuulak toj saꞌ li tenamit Rimón li cuan jun pacꞌal Jerusalén saꞌ li sur. Li tenamit Jerusalén cua̱nk saꞌ li tzu̱l ut cua̱nk ajcuiꞌ xlokꞌal. Kꞌaxal nabal cuiꞌchic li cristian teꞌcua̱nk aran. Ta̱ticla̱k chak cuan cuiꞌ li oqueba̱l re laj Benjamín ut ta̱cuulak toj cuan cuiꞌ li xbe̱n oqueba̱l, ut toj cuan cuiꞌ li oqueba̱l li cuan saꞌ xuc. Ut ta̱cuulak ajcuiꞌ toj cuan cuiꞌ li torre re laj Hananeel ut toj cuan cuiꞌ li nayatzꞌeꞌ cuiꞌ x-uva li rey.

¹¹ Chi ya̱l kꞌaxal nabal cuiꞌchic li cristian li teꞌcua̱nk aran Jerusalén. Incꞌaꞌ chic tzꞌekta̱nanbilak li tenamit aꞌan xban li Dios ut ma̱ ani chic ta̱sachok ru. Teꞌcua̱nk chi sa saꞌ xchꞌo̱leb chi ma̱cꞌaꞌak chic cꞌoxlac.

¹² Abanan li Ka̱cuaꞌ tixqꞌue jun nimla raylal saꞌ xbe̱neb li tenamit li queꞌrahobtesin re Jerusalén. Usta toj yoꞌyo̱keb abanan yo̱k chi kꞌa̱c lix tibeleb. Jocꞌjo̱k aj chic teꞌilok. Ut yo̱k ajcuiꞌ chi kꞌa̱c li ruꞌuj rakꞌeb.

¹³ Ut li Ka̱cuaꞌ tixqꞌue jun nimla xiu saꞌ xbe̱neb ut incꞌaꞌ chic teꞌxnau cꞌaꞌru teꞌxba̱nu. Teꞌxtiquib xpletinquil ribeb chi ribileb rib.

¹⁴ Eb laj Judá teꞌpletik ajcuiꞌ aran Jerusalén riqꞌuineb li xicꞌ nequeꞌiloc reheb. Ut teꞌxchꞌutub ru chixjunil li biomal li teꞌxmakꞌ chiruheb li xni̱nkal ru tenamit. Kꞌaxal cuiꞌchic nabal li oro, li plata, ut li cha̱bil tꞌicr li teꞌxxoc.

¹⁵ Li raylal li teꞌxcꞌul li teꞌrahobtesi̱nk re li tenamit Jerusalén, teꞌxcꞌul ajcuiꞌ lix cacua̱yeb, lix mu̱leb, ut lix camelleb, ut lix bu̱reb, joꞌqueb ajcuiꞌ chixjunil li xul li queꞌcꞌanjelac chiruheb saꞌ li ple̱t.

¹⁶ Ut li joꞌ qꞌuial chic li teꞌcolekꞌ nak teꞌpletik riqꞌuineb laj Jerusalén, rajlal chihab teꞌxic aran Jerusalén chixlokꞌoninquil li tzꞌakal Rey, li nimajcual Dios. Ut aran teꞌxyi̱b li cocꞌ muheba̱l re nak teꞌxba̱nu li ninkꞌe re xbantioxinquil chiru li Ka̱cuaꞌ nak queꞌcoleꞌ.

¹⁷ Ut li joꞌ qꞌuialeb li incꞌaꞌ teꞌxic aran Jerusalén chixlokꞌoninquil li Ka̱cuaꞌ Dios li tzꞌakal Rey, li Ka̱cuaꞌ incꞌaꞌ tixqꞌue li hab saꞌ xbe̱n li racui̱mkeb.

¹⁸ Ut cui eb laj Egipto incꞌaꞌ teꞌxic aran Jerusalén chi lokꞌoni̱nc rajlal chihab saꞌ li ninkꞌe aꞌan, li Ka̱cuaꞌ Dios tixqꞌue ajcuiꞌ raylal saꞌ xbe̱neb joꞌ nak quixqꞌue raylal saꞌ xbe̱neb li xni̱nkal ru tenamit ut incꞌaꞌ tixqꞌue li hab saꞌ xbe̱n li racui̱mkeb.

¹⁹ Aꞌan aꞌin li tojba ma̱c li tixqꞌue li Ka̱cuaꞌ Dios saꞌ xbe̱neb laj Egipto joꞌqueb ajcuiꞌ li xni̱nkal ru tenamit cui incꞌaꞌ nequeꞌxic Jerusalén chixlokꞌoninquil li Ka̱cuaꞌ Dios saꞌ li ninkꞌe li na-uxman rajlal chihab saꞌ eb li cocꞌ muheba̱l.

²⁰ Saꞌ eb li cutan aꞌan chixjunil li cꞌaꞌak re ru kꞌaxtesinbilak saꞌ rukꞌ li Ka̱cuaꞌ. Chiru li cocꞌ campanas li naqꞌueman chixcux li cacua̱y tzꞌi̱banbilak li a̱tin “Kꞌaxtesinbil saꞌ rukꞌ li Ka̱cuaꞌ”. Ut juntakꞌe̱tak xlokꞌaleb li ucꞌal li nequeꞌcꞌanjelac saꞌ lix templo li Ka̱cuaꞌ Dios riqꞌuin xlokꞌaleb li secꞌ li nequeꞌcꞌanjelac saꞌ li artal.

²¹ Chixjunileb li ucꞌal li cuanqueb Jerusalén, joꞌ ajcuiꞌ li cuanqueb Judá, kꞌaxtesinbilakeb chi cꞌanjelac chiru li Ka̱cuaꞌ li nimajcual Dios. Ut saꞌ eb li ucꞌal aꞌan teꞌxchik li tib li teꞌxmayeja li teꞌcha̱lk chi mayejac. Ut saꞌ eb li cutan aꞌan incꞌaꞌ chic teꞌcua̱nk laj yaconel saꞌ lix templo li Ka̱cuaꞌ li nimajcual Dios.