Zacarías 13 - Li Santil hu

¹ Saꞌ eb li cutan aꞌan, ta̱yoꞌla̱k jun li Yuꞌam Haꞌ. Ut li Haꞌ aꞌan ta̱chꞌajok re lix ma̱queb ut lix ma̱usilaleb li ralal xcꞌajol laj David joꞌqueb ajcuiꞌ li cuanqueb Jerusalén.

² Saꞌ chixjunil li tenamit Israel, la̱in tinsacheb ru li jalanil dios ut tinsacheb ajcuiꞌ lix cꞌabaꞌeb re nak incꞌaꞌ chic teꞌlokꞌoni̱k xbaneb li tenamit. Ut tincuisiheb ajcuiꞌ li profeta li incꞌaꞌ useb xnaꞌlebeb saꞌ xya̱nkeb ut tincuisi ajcuiꞌ lix ma̱usilaleb.

³ Ut cui toj cuan junak ta̱oc chokꞌ profeta aj balakꞌ, lix naꞌ xyucuaꞌ teꞌxye re, “La̱at tento tatca̱mk xban nak xatticꞌtiꞌic saꞌ xcꞌabaꞌ li Dios,” chaꞌkeb re. La̱in li Ka̱cuaꞌ li yo̱quin chi yehoc re aꞌin. Cui ani tixqꞌue rib chokꞌ junak profeta aj balakꞌ, camsinbil ta̱uxk re xban lix naꞌ xyucuaꞌ.

⁴ Ut eb li profeta aj balakꞌ teꞌxuta̱na̱k xban li ticꞌtiꞌ li ac xeꞌxye. Ut incꞌaꞌ chic teꞌbalakꞌi̱nk riqꞌuin rocsinquil li rakꞌ profeta chirixeb.

⁵ Eb aꞌan teꞌxye, “La̱in ma̱cuaꞌin profeta. La̱in aj cꞌalom chalen chak saꞌ insa̱jilal,” chaꞌkeb.

⁶ Cui ani ta̱patzꞌok re, “¿Cꞌaꞌut nak tochꞌoleb saꞌ la̱ cuukꞌ?” aꞌan ta̱chakꞌok ut tixye, “Aꞌaneb ajcuiꞌ li cuech tenamitil xeꞌba̱nun re,” chaꞌak.

⁷ Li nimajcual Dios quixye: —Tincanab chi camsi̱c laj ilol reheb li carner. Tinkꞌaxtesi re ca̱mc li natenkꞌan cue. Ta̱camsi̱k laj ilol reheb li carner ut eb li carner teꞌxchaꞌchaꞌi ribeb. Ut tincꞌut injoskꞌil chiruheb li carner.

⁸ Joꞌcaꞌin ta̱cꞌulma̱nk saꞌ li tenamit aꞌan: numenak yijach li tenamit teꞌosokꞌ. Incꞌaꞌ chic qꞌui teꞌcana̱k, chan li Ka̱cuaꞌ.

⁹ Ut li joꞌ qꞌuial chic teꞌcana̱k, chanchan numsinbil saꞌ xam tinba̱nu reheb nak tinyal rixeb, joꞌ nak nanumsi̱c li plata ut li oro saꞌ li xam. Eb aꞌan teꞌxya̱ba incꞌabaꞌ ut la̱in tinsumeheb ut tinye reheb: La̱ex lin tenamit. Ut eb aꞌan teꞌxye, “Li Ka̱cuaꞌ, aꞌan li kaDios,” chaꞌkeb.