Zacarías 12 - Li Santil hu

Eb laj Israel teꞌnumta̱k saꞌ xbe̱neb li xicꞌ nequeꞌiloc reheb ut teꞌcua̱nk cuiꞌchic Jerusalén

¹ Li Ka̱cuaꞌ li kꞌaxal nim xcuanquil li quiyi̱ban re li choxa ut quixakaban re li ruchichꞌochꞌ saꞌ xnaꞌaj, li quiqꞌuehoc xmusikꞌ li cui̱nk, aꞌan li xyehoc re aꞌin chirix li tenamit Israel:

² —La̱in tinqꞌue xcuanquileb laj Jerusalén. Ut eb li xicꞌ nequeꞌiloc reheb teꞌxucuak nak teꞌcha̱lk chi pletic riqꞌuineb ut riqꞌuineb li jun chꞌol chic li tenamit li cuanqueb xcue̱nt Judá. Nak teꞌril li tenamit Jerusalén sicsotkeb xbaneb xxiu.

³ Ut saꞌeb li cutan aꞌan la̱in tinqꞌue cuiꞌchic xcuanquileb laj Jerusalén. Chanchanakeb chic jun li pec kꞌaxal a̱l. Ut chixjunileb li xni̱nkal ru tenamit teꞌxjunaji ribeb ut teꞌxyal numta̱c saꞌ xbe̱neb laj Jerusalén. Abanan incꞌaꞌ teꞌxcuy xmetzꞌe̱uheb laj Jerusalén. Kꞌaxal ra teꞌxcꞌul.

⁴ La̱in tinqꞌueheb xxiu lix cacua̱yeb li teꞌcha̱lk chi pletic. Ut tinsach xnaꞌlebeb li cuanqueb chirix. Tinqꞌueheb chi mutzꞌocꞌ li cacua̱y. Abanan li ralal xcꞌajol laj Judá la̱in tincolok reheb.

⁵ Ut eb li nequeꞌcꞌamoc be saꞌ xya̱nkeb laj Judá teꞌxye saꞌ xchꞌo̱leb: Li nimajcual Dios, aꞌan li kaDios la̱o li cuanco Jerusalén. Ut aꞌan li naqꞌuehoc kametzꞌe̱u, chaꞌkeb.

⁶ Saꞌ eb li cutan aꞌan la̱in tinqꞌueheb xcuanquil laj cꞌamol be saꞌ xya̱nkeb li ralal xcꞌajol laj Judá re nak teꞌnumta̱k saꞌ xbe̱neb chixjunileb li cuanqueb chi xjun sutam. Eb laj Judá chanchanakeb li ru xam li nacꞌatoc re li siꞌ. Chanchanakeb li xam li nanak saꞌ xya̱nk li qꞌuim li nacꞌat saꞌ junpa̱t. Eb laj Judá teꞌxsach ruheb li cuanqueb chi xjun sutam ut teꞌcua̱nk cuiꞌchic saꞌ lix naꞌajeb aran Jerusalén.

⁷ Abanan xbe̱n cua tincoleb li ralal xcꞌajol laj Judá, re nak eb li ralal xcꞌajol laj David li cuanqueb saꞌ li tenamit Jerusalén incꞌaꞌ teꞌxnimobresi ribeb chiruheb aꞌan.

⁸ Saꞌ eb li cutan aꞌan li Ka̱cuaꞌ tixcoleb li cuanqueb Jerusalén. Eb li ma̱cꞌaꞌeb xcuanquil saꞌ xya̱nkeb, cauhakeb chic ribeb joꞌ laj David. Eb li ralal xcꞌajol laj David chanchanakeb li Dios ut chanchanakeb lix ángel li Ka̱cuaꞌ li nacꞌamoc be chiruheb.

⁹ Saꞌ eb li cutan aꞌan la̱in tinsach chixjunil li xni̱nkal ru tenamit li teꞌcha̱lk chi pletic riqꞌuineb laj Jerusalén, chan li Ka̱cuaꞌ.

¹⁰ —Ut la̱in tinjal xnaꞌlebeb li ralal xcꞌajol laj David joꞌqueb ajcuiꞌ chixjunileb li cuanqueb Jerusalén. Cha̱bilakeb chic ut junelic teꞌtijok. Ut nak teꞌril nak queꞌxnumsi li chꞌi̱chꞌ saꞌ lin tibel, teꞌyotꞌekꞌ xchꞌo̱leb ut teꞌya̱bak. Chanchanakeb li nequeꞌya̱bac chirix xcamic li ralal li jun ajcuiꞌ chiruheb. Malaj ut chanchanakeb li nequeꞌya̱bac chirix xcamic li xbe̱n alalbej.

¹¹ Saꞌ eb li cutan aꞌan ta̱cua̱nk jun nimla rahil chꞌo̱lej saꞌ li tenamit Jerusalén, joꞌ quicꞌulman saꞌ li naꞌajej Hadad-rimón, li cuan saꞌ li ru takꞌa Meguido.

¹² Xban li raylal li teꞌxcꞌul teꞌya̱bak li ralal xcꞌajol laj David ut teꞌya̱bak ajcuiꞌ li ixakilbej xjuneseb. Ut joꞌcan ajcuiꞌ teꞌxba̱nu li ralal xcꞌajol laj Natán, joꞌqueb ajcuiꞌ li ixakilbej.

¹³ Ut joꞌcan ajcuiꞌ teꞌxba̱nu li ralal xcꞌajol laj Leví, joꞌqueb ajcuiꞌ li ixakilbej. Ut joꞌcan ajcuiꞌ teꞌxba̱nu li ralal xcꞌajol laj Simei joꞌqueb ajcuiꞌ li ixakilbej.

¹⁴ Joꞌcan teꞌxba̱nu chixjunileb laj Israel. Li junju̱nk xte̱paleb teꞌya̱bak rochbeneb li ralal xcꞌajol ut joꞌcan ajcuiꞌ teꞌxba̱nu li ixakilbej.