Zacarías 1 - Li Santil hu

Eb laj Israel teꞌcua̱nk cuiꞌchic Jerusalén

¹ Li profeta Zacarías, aꞌan ralal laj Berequías. Laj Berequías, aꞌan ralal laj Iddo. Cuakxakib po xcab chihab roquic laj Darío chokꞌ xreyeb laj Persia nak quia̱tinac li Dios riqꞌuin li profeta Zacarías ut quixye re:

² —La̱in li nimajcual Dios. Cꞌajoꞌ nak quinjoskꞌoꞌ riqꞌuineb le̱ xeꞌto̱nil yucuaꞌ.

³ Joꞌcan nak ta̱ye reheb lin tenamit nak teꞌxjal xcꞌaꞌux ut teꞌsukꞌi̱k cuiqꞌuin. Ut la̱in chic tincua̱nk riqꞌuineb. La̱in li Ka̱cuaꞌ li nim incuanquil. Xinyehoc re aꞌin.

⁴ Me̱ba̱nu joꞌ queꞌxba̱nu le̱ xeꞌto̱nil yucuaꞌ. Eb li profeta li queꞌcꞌanjelac chak junxil queꞌa̱tinac chak riqꞌuineb ut queꞌxye reheb, “Joꞌcaꞌin xye li Ka̱cuaꞌ Dios. Jalomak e̱cꞌaꞌux ut canabomak xba̱nunquil li ma̱usilal,” chanqueb. Abanan eb aꞌan incꞌaꞌ queꞌraj rabinquil li cꞌaꞌru quinye reheb, chan li Ka̱cuaꞌ.

⁵ Ut anakcuan, ¿bar cuanqueb le̱ xeꞌto̱nil yucuaꞌ? Ut, ¿bar cuanqueb le̱ profeta? ¿Ma yoꞌyo̱queb ta biꞌ chi junelic?

⁶ Abanan li a̱tin li quinye quicꞌulman joꞌ quinye. Quicꞌulman joꞌ quinye reheb lin profeta re teꞌxye reheb li tenamit. Queꞌxcꞌul li raylal le̱ xeꞌto̱nil yucuaꞌ joꞌ quinye. Joꞌcan nak queꞌyotꞌeꞌ xchꞌo̱l ut queꞌxjal xcꞌaꞌuxeb. Queꞌxye, “Xkacꞌul ajcuiꞌ li cꞌaꞌru quixye chak saꞌ kabe̱n li Ka̱cuaꞌ li nimajcual Dios joꞌ kacꞌulub xcꞌulbal xban li kayehom kaba̱nuhom,” chanqueb.—

Eb li cacua̱y li quicꞌutbesi̱c saꞌ li visión

⁷ Li profeta Zacarías, aꞌan li ralal laj Berequías. Laj Berequías, aꞌan li ralal laj Iddo. Yo̱ junlaju po xcab chihab roquic chokꞌ rey laj Darío saꞌ li ca̱hib xcaꞌcꞌa̱l xbe li po aꞌan (Sebat xcꞌabaꞌ) nak li Ka̱cuaꞌ quia̱tinac cuiꞌchic riqꞌuin laj Zacarías saꞌ jun li visión.

⁸ Quixye laj Zacarías: —Saꞌ jun li kꞌojyi̱n quicꞌutbesi̱c jun li visión chicuu xban li Dios. Saꞌ li visión aꞌan quicuil jun li cui̱nk cuan chirix jun li cacua̱y cak rix saꞌ jun li ru takꞌa. Xakxo rubeleb li cheꞌ mirto. Ut chirix aꞌan cuanqueb chic nabaleb li cacua̱y. Cuanqueb cak rixeb. Cuanqueb repex rixeb ut cuanqueb ajcuiꞌ sak rixeb.

⁹ Ut quinpatzꞌ re li ángel li yo̱ chi a̱tinac cuiqꞌuin: —Ka̱cuaꞌ, ¿cꞌaꞌru xya̱lal aꞌin li yo̱quin chirilbal? chanquin. Ut li ángel quichakꞌoc ut quixye cue: —La̱in tinye a̱cue lix ya̱lal li yo̱cat chirilbal, chan.

¹⁰ Ut li cui̱nk li cuan chirix li cacua̱y rubeleb li cheꞌ mirto quia̱tinac chak ut quixye cue: —Li cꞌaꞌru yo̱cat chirilbal, aꞌaneb li queꞌtakla̱c chak xban li Ka̱cuaꞌ re xsutinquil chixjunil li ruchichꞌochꞌ, chan.

¹¹ Ut li cuanqueb chirixeb li cacua̱y queꞌxye re lix ángel li Ka̱cuaꞌ li cuan rubeleb li cheꞌ mirto: —Xkasuti chak chixjunil li ruchichꞌochꞌ ut xkaqꞌue retal nak cuanqueb saꞌ xya̱lal ut cuanqueb saꞌ tuktu̱quil usilal, chanqueb.

¹² Ut lix ángel li Ka̱cuaꞌ quixye: —At nimajcual Dios, laje̱b xca̱cꞌa̱l chihab yo̱ a̱joskꞌil saꞌ xbe̱neb li tenamit Jerusalén ut Judá. ¿Joꞌ najtil chic ta̱cua̱nk la̱ joskꞌil saꞌ xbe̱neb? Ut, ¿jokꞌe ta̱cuuxta̱na ruheb? chan li ángel.

¹³ Ut li Ka̱cuaꞌ Dios quichakꞌoc riqꞌuin cha̱bil a̱tin ut li ángel li yo̱ chi a̱tinac cuiqꞌuin quicꞌojla xchꞌo̱l chirabinquil li cꞌaꞌru quixye li Dios.

¹⁴ Ut li ángel quixye cue nak tinye resil li quixye li Dios. Joꞌcaꞌin quixye li Dios li kꞌaxal nim xcuanquil. —La̱in kꞌaxal cuiꞌchic ninra Jerusalén, lin tenamit Sión.

¹⁵ Yo̱ caꞌchꞌin injoskꞌil saꞌ xbe̱neb lin tenamit. Abanan kꞌaxal cuiꞌchic yo̱ injoskꞌil saꞌ xbe̱neb li tenamit li incꞌaꞌ nequeꞌpa̱ban ut cꞌojcꞌo̱queb xchꞌo̱l xjuneseb xban nak kꞌaxal cuiꞌchic ra xeꞌxba̱nu reheb lin tenamit, chan.

¹⁶ Joꞌcan nak li nimajcual Dios quixye: —Tincuuxta̱na cuiꞌchic ruheb laj Jerusalén. Ta̱yi̱ba̱k cuiꞌchic li templo ut ta̱yi̱ba̱k ajcuiꞌ chixjunil li tenamit Jerusalén, chan li Dios.

¹⁷ Ut quixye ajcuiꞌ cue li ángel: —Ta̱ye ajcuiꞌ resil aꞌin: Joꞌcaꞌin xye li nimajcual Dios. Tinqꞌue cuiꞌchic chi nabal li cꞌaꞌru reheb lin tenamit Jerusalén ut tebincuosobtesi. Chanchan nak toj xinsiqꞌueb ru chokꞌ cualal incꞌajol, chan li Dios.

Li xucub ut eb laj tenol chꞌi̱chꞌ li queꞌcꞌutbesi̱c chiru laj Zacarías saꞌ visión

¹⁸ Ut quicꞌutbesi̱c cuiꞌchic chicuu jun chic li visión. Quicuil ca̱hib li xucub.

¹⁹ Ut quinpatzꞌ re li ángel cꞌaꞌru xya̱lal li ca̱hib chi xucub li yo̱quin chirilbal. Li ángel quichakꞌoc ut quixye cue: —Li ca̱hib chi xucub aꞌin, aꞌan retalil li ca̱hib chi xni̱nkal ru tenamit li queꞌnumta saꞌ xbe̱neb ut queꞌxchaꞌchaꞌi ruheb lin tenamit Judá, Israel ut Jerusalén, chan.

²⁰ Ut li Ka̱cuaꞌ quixcꞌut chicuu ca̱hib laj tenol chꞌi̱chꞌ.

²¹ Ut la̱in quinpatzꞌ re: —¿Cꞌaꞌru aj e nak xeꞌchal eb aꞌan?— Ut aꞌan quixye cue: —Li ca̱hib chi xucub, aꞌaneb retalil li ca̱hib chi xni̱nkal ru tenamit li queꞌrahobtesin reheb lin tenamit toj retal nak incꞌaꞌ chic queꞌxcuy. Eb laj tenol chꞌi̱chꞌ queꞌchal chixsachbal ruheb li ca̱hib chi xni̱nkal ru tenamit. Sicsotkeb chic xban xxiuheb nak teꞌsachekꞌ xban nak queꞌxchaꞌchaꞌi ruheb lin tenamit Judá, chan li Ka̱cuaꞌ.