Tito 1 - Li Santil hu

Laj Pablo naxqꞌue xsahil xchꞌo̱l laj Tito

¹ La̱in laj Pablo. Yo̱quin chi tzꞌi̱bac a̱cuiqꞌuin, at Tito. Nincꞌanjelac chiru li Dios ut la̱in x-apóstol li Jesucristo. Xakabanbilin xban li Jesucristo re xtenkꞌanquileb li sicꞌbileb ru xban li Dios re nak tzꞌakalak re ru lix pa̱ba̱leb. Ut xakabanbilin re xtenkꞌanquileb re nak teꞌxtau ru chi tzꞌakal lix ya̱lal li colba-ib ut ta̱ti̱cobresi̱k lix chꞌo̱leb.

² Ninchꞌolob lix ya̱lal aꞌin chiruheb re nak teꞌpa̱ba̱nk ut teꞌxyoꞌoni li junelic yuꞌam. Najter kꞌe cutan li Dios quixyechiꞌi chak li junelic yuꞌam. Li Dios incꞌaꞌ naticꞌtiꞌic.

³ Nak quicuulac xkꞌehil li Dios laj Colol ke quixcꞌutbesi lix ya̱lal li colba-ib chiku. Tenebanbil saꞌ inbe̱n xban li Dios xchꞌolobanquil xya̱lal li colba-ib yalak bar.

⁴ Yo̱quin chi tzꞌi̱bac a̱cuiqꞌuin, at Tito. La̱at chanchanat tzꞌakal cualal saꞌ xcꞌabaꞌ li kapa̱ba̱l. Chicua̱nk taxak a̱cuiqꞌuin li usilal ut li tuktu̱quilal li naxqꞌue li Dios li kaYucuaꞌ ut li naxqꞌue li Jesucristo laj Colol ke.

Li cꞌanjel tenebanbil saꞌ xbe̱n laj Tito

⁵ Xatincanab aran saꞌ li tenamit Creta re nak ta̱cꞌu̱b ru li cꞌaꞌru toj yi̱ba̱c naraj ut re nak ta̱xakabeb li teꞌcꞌamok be chiruheb laj pa̱banel saꞌ li junju̱nk chi tenamit. Joꞌ xinye a̱cue, joꞌcan ta̱ba̱nu.

⁶ Ti̱cak xchꞌo̱l li ani ta̱xakab re nak ma̱cꞌaꞌ ta̱yehekꞌ chirixeb. Junak ajcuiꞌ li rixakil ut aj pa̱banelakeb li ralal xcꞌajol. Cha̱bilakeb xnaꞌleb ut teꞌabi̱nk chiruheb lix naꞌ xyucuaꞌ.

⁷ Li ani nacꞌamoc be chiruheb laj pa̱banel, li jun aꞌan aj cꞌanjel chiru li Dios. Joꞌcan nak tento nak ti̱cak xchꞌo̱l re nak ma̱ ani ta̱a̱tinak chirix. Moco kꞌetkꞌetak ta ut moco chꞌinpoꞌak ta, chi moco ta̱cala̱k, chi moco ta̱pletik. Ut ma̱cuaꞌak aj rahol ru biomal, chi moco tixsicꞌ xtumin riqꞌuin balakꞌic.

⁸ Junak aj cꞌanjel chiru li Dios naxcꞌuleb li rulaꞌ chi sa saꞌ xchꞌo̱l ut nasahoꞌ ajcuiꞌ saꞌ xchꞌo̱l riqꞌuineb li nequeꞌba̱nun re li us. Laj cꞌanjel chiru li Dios toj naxcꞌoxla chi us li cꞌaꞌru naxba̱nu ut junelic cua̱nk saꞌ usilal riqꞌuineb li ras ri̱tzꞌin. Ti̱c xchꞌo̱l ut naxcuy xnumsinquil li raylal ut li a̱le̱c.

⁹ Incꞌaꞌ nachꞌinan xchꞌo̱l saꞌ lix pa̱ba̱l. Naxpa̱b ban chi anchal xchꞌo̱l lix ya̱lal li quicꞌuteꞌ chiru re nak tixnau xchꞌolobanquil lix ya̱lal chiruheb li rech aj pa̱banelil ut tixnau xqꞌuebal xnaꞌlebeb li nequeꞌcuechꞌin re li cꞌaꞌru naxye.

¹⁰ Chaqꞌuehak retal ani ta̱xakab chokꞌ aj cꞌamol be xban nak nabaleb li incꞌaꞌ nequeꞌxtau xya̱lal. Nequeꞌa̱tinac chi ma̱cꞌaꞌ rajbal ut nequeꞌxbalakꞌi li tenamit. Kꞌaxal cuiꞌchic nabaleb joꞌcaneb xnaꞌleb saꞌ xya̱nkeb li kech aj pa̱banelil aj judío.

¹¹ Eb aꞌan tento xkꞌusbaleb re nak teꞌxcanab li balakꞌi̱nc. Yo̱queb xpoꞌbal xchꞌo̱leb li ju̱nk cabal riqꞌuin xcꞌutbal li moco ya̱l ta. Riqꞌuin balakꞌi̱nc nequeꞌxtau lix tumineb.

¹² Eb laj Creta queꞌxqꞌue jun li cui̱nk aj kꞌe chokꞌ xprofeteb. Li cui̱nk aꞌan quixye chi joꞌcaꞌin chirixeb li rech tenamitil: laj Creta junes ticꞌtiꞌic nequeꞌxba̱nu. Chanchaneb li joskꞌ aj xul. Eb aꞌan aj num cuaꞌineleb ut incꞌaꞌ nequeꞌraj trabajic, chan.

¹³ Ut ya̱l ajcuiꞌ li quixye. Joꞌcan nak cau chakꞌuseb re nak teꞌcacuu̱k xchꞌo̱leb saꞌ lix pa̱ba̱leb.

¹⁴ Chakꞌuseb re nak incꞌaꞌ teꞌxpa̱b li ticꞌtiꞌ li nequeꞌxyoꞌob laj judío chi moco cheꞌxpa̱b lix chakꞌrabeb li cui̱nk li nequeꞌtzꞌekta̱nan re li tzꞌakal ya̱l.

¹⁵ Li ti̱queb xchꞌo̱l, chixjunil li cꞌaꞌak re ru cha̱bil chiruheb xban nak nequeꞌxsicꞌ li cꞌaꞌru cha̱bil. Aꞌut eb li incꞌaꞌ ti̱queb xchꞌo̱l, ma̱cꞌaꞌ cꞌaꞌru us chiruheb xban nak numtajenak xyibal ru lix naꞌlebeb ut incꞌaꞌ us lix cꞌaꞌuxeb.

¹⁶ Nequeꞌxye nak nequeꞌxpa̱b li Dios, aban riqꞌuin li cꞌaꞌru nequeꞌxba̱nu nacꞌutun nak moco ya̱l ta. Aj kꞌetoleb ra̱tin li Dios ut kꞌaxal yibru lix naꞌlebeb. Incꞌaꞌ useb. Ma̱cꞌaꞌ junak cha̱bil cꞌanjel ta̱ru̱k teꞌxba̱nu.