Sofonías 1 - Li Santil hu

Ta̱cuulak xkꞌehil nak li Ka̱cuaꞌ ta̱rakok a̱tin

¹ Aꞌan aꞌin li a̱tin li quixye li Ka̱cuaꞌ re laj Sofonías saꞌ eb li cutan nak laj Josías li ralal laj Amón cuan chokꞌ rey aran Judá. Laj Sofonías aꞌan ralal laj Cusi. Ut laj Cusi, aꞌan ralal laj Gedalías. Ut laj Gedalías, aꞌan ralal laj Amarías. Ut laj Amarías, aꞌan ralal laj Ezequías.

² Li Ka̱cuaꞌ quixye: —Tinsacheb ru chi junaj cua li cꞌaꞌak re ru cuan saꞌ ruchichꞌochꞌ.

³ Tinsacheb ru chixjunileb li cristian ut tinsach ajcuiꞌ ruheb chixjunileb li xul. Tinsach ruheb li xul li nequeꞌrupupic chiru choxa joꞌqueb ajcuiꞌ li car li cuanqueb saꞌ li nimaꞌ. Tinsach ruheb li incꞌaꞌ useb xnaꞌleb. Tinsacheb ru chixjunileb li cristian, chan li Ka̱cuaꞌ.

⁴ Ut quixye ajcuiꞌ li Ka̱cuaꞌ: —Tinrakok a̱tin saꞌ xbe̱neb laj Judá joꞌqueb ajcuiꞌ li cuanqueb aran Jerusalén. Tinsacheb ru chi junaj cua laj Baal lix dioseb, joꞌqueb ajcuiꞌ chixjunileb laj tij li nequeꞌcꞌanjelac chiru ut chixjunileb li nequeꞌlokꞌonin re.

⁵ Tinsacheb ru li nequeꞌtakeꞌ saꞌ xbe̱n li rochocheb ut nequeꞌxlokꞌoni li sakꞌe, ut li po, joꞌqueb ajcuiꞌ li chahim. Nequeꞌxcuikꞌib rib ut nequeꞌxpatzꞌ xcꞌabaꞌ lix dioseb Milcom. Ut nequeꞌxpatzꞌ ajcuiꞌ incꞌabaꞌ la̱in.

⁶ Eb li queꞌxcanab inlokꞌoninquil tinsacheb ru joꞌqueb ajcuiꞌ li ma̱ jun cua niquineꞌxlokꞌoni chi moco niquineꞌxcꞌoxla, chan li Dios.

⁷ Chexucua ru li Ka̱cuaꞌ Dios xban nak cuulac re xkꞌehil nak ta̱rakok a̱tin saꞌ e̱be̱n. Chanchan mayejanbil tixba̱nu reheb lix tenamit nak tixkꞌaxtesiheb saꞌ rukꞌeb li xicꞌ nequeꞌiloc reheb.

⁸ Li Ka̱cuaꞌ quixye: —Saꞌ eb li cutan aꞌan nak tinkꞌaxtesiheb lin tenamit, tinqꞌueheb chixtojbal xma̱c li nequeꞌcꞌamoc be saꞌ xya̱nkeb, joꞌ eb ajcuiꞌ li ralaleb li rey ut chixjunileb li nequeꞌxba̱nu joꞌ nequeꞌxba̱nu li jalaneb xtenamit nak nequeꞌxlokꞌoni li yi̱banbil dios.

⁹ Saꞌeb li cutan aꞌan tinqꞌueheb ajcuiꞌ chixtojbal xma̱queb li nequeꞌoc chi piscꞌonbil saꞌ li rochocheb lix dioseb joꞌ ajcuiꞌ li nequeꞌxtu̱b saꞌ rochocheb lix dioseb li nequeꞌrelkꞌa chak riqꞌuin balakꞌi̱nc.

¹⁰ Quixye ajcuiꞌ li Ka̱cuaꞌ: —Saꞌ eb li cutan aꞌan japjo̱keb re chixtzꞌa̱manquil xtenkꞌanquileb laj Judá joꞌqueb ajcuiꞌ li cuanqueb Jerusalén. Ut ta̱abima̱nk lix ya̱b lix cuxeb toj cuan cuiꞌ li oqueba̱l li nequeꞌcꞌayin cuiꞌ car. Ta̱abi̱k ajcuiꞌ lix ya̱b xcuxeb toj saꞌ lix cab oqueba̱l. Ut teꞌrabi nak yo̱keb chak chi cha̱lc saꞌ li tzu̱l li xicꞌ nequeꞌiloc reheb.

¹¹ Chexya̱bak la̱ex li cuanquex nachꞌ riqꞌuin li cꞌayil saꞌ li naꞌajej Mactes xban nak teꞌcamsi̱k chixjunileb laj cꞌay ut teꞌca̱mk ajcuiꞌ chixjunileb laj jalol ru tumin.

¹² Chanchan tinloch inxam ut tinsiqꞌuiheb saꞌ li kꞌojyi̱n nak tinsiqꞌuiheb yalak bar saꞌ li tenamit Jerusalén li incꞌaꞌ useb xnaꞌleb. Tinsiqꞌuiheb toj retal tinsacheb ru. Tinqꞌueheb chixtojbal xma̱queb li cꞌojcꞌo̱queb xchꞌo̱l, li chanchaneb li vino li tuktu ru. Eb aꞌan nequeꞌxye saꞌ xchꞌo̱leb nak li Ka̱cuaꞌ ma̱cꞌaꞌ naxba̱nu, chi moco li us, chi moco li incꞌaꞌ us, chanqueb.

¹³ Ta̱makꞌekꞌ chiruheb chixjunil li cꞌaꞌru cuan reheb. Ut li rochocheb teꞌsachekꞌ chiruheb. Teꞌxyi̱b li rochocheb abanan incꞌaꞌ teꞌcua̱nk chi saꞌ. Teꞌa̱uk uvas, abanan incꞌaꞌ teꞌxyal li xyaꞌal li ru.

¹⁴ Yo̱ chi cuulac xkꞌehil nak ta̱rakok a̱tin li Ka̱cuaꞌ. Ac yo̱ chi nachꞌoc chak li cutan aꞌan. Kꞌaxal ra teꞌxcꞌul saꞌ li cutan aꞌan. Usta kꞌaxal cauheb rib, abanan teꞌxjap ajcuiꞌ re xbaneb xxiu chiru.

¹⁵ Saꞌ li cutan aꞌan li Dios tixcꞌutbesi lix joskꞌil chiruheb. Kꞌaxal nabal li raylal ut li rahil chꞌo̱lejil teꞌxcꞌul. Teꞌsachekꞌ ruheb. Ta̱kꞌojyi̱nokꞌ ru li choxa xban li chok ut ta̱mo̱yk ru li cutan.

¹⁶ Saꞌ li cutan aꞌan teꞌxya̱basi lix trompeta li teꞌcha̱lk chi pletic ut japjo̱keb re, nak teꞌcha̱lk chi pletic riqꞌuineb li cauheb rib chi pletic xban nak sutsu saꞌ tzꞌac lix tenamiteb ut cuanqueb lix torre najt xteram.

¹⁷ Quixye li Ka̱cuaꞌ: —Tinqꞌueheb saꞌ raylal chixjunileb laj Judá ut eb laj Jerusalén. Chanchanakeb li mutzꞌ nak teꞌxyal raj xsicꞌbal bar teꞌxic chixcolbaleb rib, abanan incꞌaꞌ teꞌru̱k xban nak xeꞌma̱cob chicuu. Lix quiqꞌueleb ta̱hoyekꞌ ut aran ta̱osokꞌ saꞌ li poks ut lix tibeleb ta̱kꞌa̱k ut aran ta̱osokꞌ, chan li Ka̱cuaꞌ.

¹⁸ Chi moco lix plata chi moco lix oro ta̱ru̱k ta̱colok reheb chiru lix joskꞌil li Dios saꞌ li cutan aꞌan. Lix joskꞌil li Dios chanchan li xam nak tixsach chixjunil li ruchichꞌochꞌ. Chixjunileb li cuanqueb saꞌ ruchichꞌochꞌ teꞌosokꞌ chiru junpa̱t.