Santiago 5 - Li Santil hu

Xchꞌolobanquil xnaꞌlebeb li biom

¹ Aꞌut anakcuan, ex biom, cherabihak li oc cue chixyebal. Chiyotꞌekꞌ e̱chꞌo̱l ut chexya̱bak xban li raylal cha̱lc re saꞌ e̱be̱n.

² Le̱ biomal ta̱osokꞌ. Ma̱cꞌaꞌ chic ta̱oc cuiꞌ. Joꞌcan ajcuiꞌ le̱ cha̱bil akꞌ ta̱cꞌuxekꞌ xban li xulel.

³ Ut ta̱moꞌo̱nk le̱ tumin. Ma̱cꞌaꞌ chic ta̱oc cuiꞌ. Aꞌan retalil nak la̱ex tex-osokꞌ ajcuiꞌ joꞌ nak na-osoꞌ li xam. La̱ex yo̱quex chixtambresinquil le̱ biomal ut incꞌaꞌ nequeqꞌue retal nak cꞌulu̱nc re rosoꞌjic li cutan.

⁴ La̱ex yo̱quex chixxocbal e̱tumin ut incꞌaꞌ nequeqꞌue xtojbaleb li queꞌkꞌoloc e̱riqꞌuin. Eb aꞌan yo̱queb chi kꞌoko̱nc ut li nimajcual Dios yo̱ chirilbal xtokꞌoba̱l ruheb nak yo̱queb chi kꞌoko̱nc li queꞌcꞌanjelac e̱riqꞌuin.

⁵ Arin saꞌ ruchichꞌochꞌ cuan nabal le̱ biomal ut ma̱cꞌaꞌ napaltoꞌ e̱re. Junelic sa nequenumsi li cutan. Chanchanex li cuacax chꞌolaninbil chi us re ta̱camsi̱k xban nak le̱ yuꞌam la̱ex, ta̱osokꞌ. Ta̱cuulak xkꞌehil nak ta̱rakekꞌ a̱tin saꞌ e̱be̱n.

⁶ La̱ex quexrakoc a̱tin saꞌ xbe̱neb li ti̱queb xchꞌo̱l ut quecamsiheb. Ut eb aꞌan ma̱cꞌaꞌ queꞌxba̱nu e̱re.

Xcuybal xnumsinquil li raylal

⁷ Joꞌcan ut ex herma̱n, checuyak roybeninquil lix cꞌulunic li Ka̱cuaꞌ Jesucristo. Joꞌ laj cꞌalom naxcuy roybeninquil jokꞌe natꞌaneꞌ li hab re nak ta̱a̱uk ut naxcuy ajcuiꞌ roybeninquil nak nacuulac xkꞌehil li kꞌoloc re nak tixkꞌol ru li racui̱mk.

⁸ Joꞌcan ajcuiꞌ la̱ex checuyak oybeni̱nc ut me̱chꞌinan e̱chꞌo̱l. Cacuubresihomak ban e̱chꞌo̱l xban nak li Ka̱cuaꞌ chi se̱b ta̱cha̱lk cuiꞌchic.

⁹ Ex herma̱n, me̱cuechꞌi e̱rib che̱ribil e̱rib re nak incꞌaꞌ ta̱rakekꞌ a̱tin saꞌ e̱be̱n. Li Jesucristo aꞌan laj rakol a̱tin ut chi se̱b ta̱cꞌulu̱nk cuiꞌchic.

¹⁰ Ex herma̱n, chetzolak e̱rib riqꞌuineb li profeta li queꞌcuyuc chak xcꞌulbal li raylal xban xyebal resil li Ka̱cuaꞌ.

¹¹ La̱o nakaye nak us xak reheb li nequeꞌcuyuc raylal. Xerabi resil chanru nak laj Job quixcuy xnumsinquil li raylal. Ut nequenau nak mokon li Dios quirosobtesi. Li Ka̱cuaꞌ Dios na-uxta̱nan ut natokꞌoban u.

¹² Ex inherma̱n, cuan chic jun li naꞌleb tento te̱nau ut aꞌan aꞌin: nak tex-a̱tinak, me̱patzꞌ xcꞌabaꞌ li Dios saꞌ pacꞌba a̱tin, chi moco saꞌ xcꞌabaꞌ li choxa, chi moco saꞌ xcꞌabaꞌ li ruchichꞌochꞌ, chi moco chepatzꞌ saꞌ xcꞌabaꞌ li cꞌaꞌak re ru cuan. Cui te̱ye nak ya̱l, junes ya̱l te̱ye, ut nak te̱ye incꞌaꞌ, junes incꞌaꞌ te̱ye re nak incꞌaꞌ ta̱rakekꞌ a̱tin saꞌ e̱be̱n xban li Dios.

Takapa̱b nak takacꞌul li nakatzꞌa̱ma re li Dios

¹³ Cui cuan junak saꞌ e̱ya̱nk cuan saꞌ raylal, chitijok chiru li Dios. Ut cui cuan junak sa saꞌ xchꞌo̱l, chixbicha xlokꞌal li Dios.

¹⁴ Cui cuan junak yaj saꞌ e̱ya̱nk, tixtakla xbokbaleb li che̱queb saꞌ lix pa̱ba̱l, re nak teꞌtijok riqꞌuin ut teꞌxqꞌue caꞌchꞌinak li aceite saꞌ xbe̱n saꞌ xcꞌabaꞌ li Ka̱cuaꞌ Jesucristo.

¹⁵ Cui teꞌxpa̱b nak li Dios tixqꞌuirtesi li yaj nak teꞌtijok, li Ka̱cuaꞌ ta̱qꞌuirtesi̱nk re ut tixcuaclesi cuiꞌchic. Ut cui cuan xma̱c, ta̱cuyekꞌ ta̱sachekꞌ ajcuiꞌ lix ma̱c.

¹⁶ Chechꞌolobak biꞌ le̱ ma̱c che̱ribil e̱rib ut chextijok che̱ribil e̱rib re nak texqꞌuirtesi̱k. Li ani ti̱c xchꞌo̱l natijoc chi anchal xchꞌo̱l ut lix tij na-abi̱c xban li Dios.

¹⁷ Li profeta Elías, aꞌan yal cui̱nk joꞌ la̱o. Quitijoc chi anchal xchꞌo̱l ut quixtzꞌa̱ma chiru li Dios nak incꞌaꞌ tixqꞌue li hab. Ut incꞌaꞌ quixqꞌue li hab saꞌ ruchichꞌochꞌ chiru li oxib chihab riqꞌuin cuakib po.

¹⁸ Ut nak quitijoc cuiꞌchic, quixtzꞌa̱ma nak tixqꞌue li hab. Ut quixqꞌue li hab ut li acui̱mk qui-el cuiꞌchic saꞌ ruchichꞌochꞌ.

¹⁹ Ex inherma̱n, ma̱re cuan junak saꞌ e̱ya̱nk tixcanab xpa̱banquil lix ya̱lal, ut ma̱re junak chic aj pa̱banel ta̱sukꞌisi̱nk cuiꞌchic re saꞌ lix pa̱ba̱l.

²⁰ Chenauhak la̱ex nak li ani tixsukꞌisi chak junak li ras ri̱tzꞌin saꞌ xya̱lal re nak tixcanab xba̱nunquil li ma̱c, aꞌan tixcol li ras ri̱tzꞌin chiru li ca̱mc. Ut saꞌ xcꞌabaꞌ li jun aꞌan, nabal li ma̱c ta̱cuyekꞌ ta̱sachekꞌ xban li Dios.