Santiago 3 - Li Santil hu

Tento takaqꞌue retal li cꞌaꞌru takaye

¹ Ex inherma̱n, moco chixjunil ta teꞌxqꞌue rib saꞌ li cꞌanjel naxba̱nu laj tzolonel xban nak nim li i̱k cuan saꞌ xbe̱n ut cau ta̱rakekꞌ a̱tin saꞌ xbe̱neb cui incꞌaꞌ nequeꞌxba̱nu li cꞌaꞌru nequeꞌxye.

² Chikajunilo la̱o nocopaltoꞌ chi cocꞌ aj saꞌ. Cui cuan junak ma̱cꞌaꞌ xpaltil riqꞌuin li ra̱tin, aꞌan tzꞌakal re ru. Li ani naru naxcuy rib riqꞌuin li naxye, naru ajcuiꞌ naxcuy rib riqꞌuin li cꞌaꞌru naraj xba̱nunquil.

³ La̱o nakaqꞌue jun li chꞌi̱chꞌ saꞌ re li cacua̱y re nak ta̱abi̱nk chiku ut riqꞌuin li chꞌi̱chꞌ aꞌan nakaberesi li cacua̱y.

⁴ Cheqꞌuehak retal li jucub. Usta kꞌaxal nim ut nacꞌameꞌ xban li cacuil ikꞌ, aban cuan jun chꞌina chꞌi̱chꞌ naberesin re. Ut riqꞌuin li chꞌi̱chꞌ aꞌan laj chꞌeꞌol re naru naxcꞌam li jucub bar naraj xcꞌambal.

⁵ Joꞌcan ajcuiꞌ li ruꞌuj akꞌ. Kꞌaxal caꞌchꞌin aban nanumta naxye. Chanchan li xam. Riqꞌuin yal jun ratzꞌum li xam ta̱nak saꞌ junak qꞌuicheꞌ tixcꞌat chixjunil li qꞌuicheꞌ.

⁶ Numtajenak xyibal ru naxye li ruꞌuj akꞌ. Chanchan lix ma̱usilal li ruchichꞌochꞌ. Li ruꞌuj kakꞌ, aꞌan jun xchaꞌal li katzꞌejcual kꞌaxal caꞌchꞌin; aban riqꞌuin li ma̱usilal naxye, naxpoꞌ kanaꞌleb. Lix ma̱usilal nachal chak saꞌ xbalba ut naxpoꞌ kanaꞌleb saꞌ kayoꞌlajic toj chalen saꞌ li kacamic.

⁷ Naru xtu̱lanobresinquil chixjunil li xul, joꞌ li nequeꞌbe̱c, li nequeꞌrupupic, li nequeꞌxjucuqui rib ut li nequeꞌcuan saꞌ haꞌ. Li cui̱nk ac xtu̱lanobresi qꞌuila pa̱y chi xul.

⁸ Aban li ruꞌuj akꞌ ma̱ ani naru natu̱lanobresin re. Li ruꞌuj akꞌ, aꞌan jun li incꞌaꞌ us. Ma̱ ani naru nakꞌusuc re. Li naxye li ruꞌuj akꞌ chanchan xmay li cꞌantiꞌ li nacamsin.

⁹ Riqꞌuin li ruꞌuj kakꞌ nakalokꞌoni li Acuabej Dios ut riqꞌuin ajcuiꞌ li ruꞌuj kakꞌ nakamajecua li kas ki̱tzꞌin ut eb aꞌan yoꞌobtesinbileb xban li Dios joꞌ li riloba̱l.

¹⁰ Riqꞌuin lix tzꞌu̱mal ke nakalokꞌoni li Dios ut riqꞌuin ajcuiꞌ lix tzꞌu̱mal ke nocomajecuan. Ex inherma̱n, incꞌaꞌ us cui takaba̱nu chi joꞌcan.

¹¹ Cheqꞌuehak retal. Saꞌ junak yuꞌam haꞌ incꞌaꞌ naru na-el chak caꞌ pa̱y chi haꞌ. Cui na-el li cha̱bil haꞌ incꞌaꞌ naru na-el chak li atzꞌam xsaꞌ, chi moco naru na-el chak li cha̱bil haꞌ saꞌ li atzꞌam xsaꞌ.

¹² Ex inherma̱n, lix cheꞌel li higo, ¿ma naru naru̱chin li aceituna? Ut lix cheꞌel li uva, ¿ma naru naru̱chin li higo? Incꞌaꞌ. Joꞌcan ajcuiꞌ saꞌ li yuꞌam haꞌ atzꞌam xsaꞌ, incꞌaꞌ naru na-el li cha̱bil haꞌ.

Li cha̱bil naꞌleb nachal chak riqꞌuin li Dios

¹³ Li ani cuanqueb xnaꞌleb saꞌ e̱ya̱nk ut nequeꞌxnau xya̱lal chi us, cheꞌxcꞌutak saꞌ tu̱lanil lix cha̱bilaleb aꞌ yal chanru lix naꞌlebeb.

¹⁴ Cui toj cuan li cꞌahi̱nc ut li cakali̱nc e̱riqꞌuin, me̱nimobresi e̱rib chixyebal nak cuan e̱naꞌleb. Riqꞌuin xba̱nunquil aꞌan yo̱quex chi ticꞌtiꞌic ut xmukbal lix ya̱lal.

¹⁵ Aꞌan ma̱cuaꞌ li naꞌleb naxqꞌue li Dios. Xnaꞌleb ban li ruchichꞌochꞌ. Aꞌan yal xcꞌaꞌuxeb cui̱nk ut qꞌuebil xban laj tza.

¹⁶ Bar nacuan cuiꞌ li cakali̱nc ut li kꞌetkꞌetil, aran ajcuiꞌ nacuan poꞌoc chꞌo̱lej ut yalak cꞌaꞌru chi ma̱usilalil.

¹⁷ Li ani qꞌuebileb xnaꞌleb xban li Dios, tzꞌakal re ru lix yuꞌameb. Cuanqueb saꞌ usilal, cha̱bileb ut tu̱laneb. Nequeꞌuxta̱nan u, nequeꞌxba̱nu li us, ut incꞌaꞌ nequeꞌbalakꞌin. Junelic ya̱l nequeꞌa̱tinac.

¹⁸ Li qꞌuebileb xnaꞌleb xban li Dios cuanqueb saꞌ usilal ut nequeꞌxtenkꞌa ajcuiꞌ li ras ri̱tzꞌin chi cua̱nc saꞌ usilal.