Santiago 2 - Li Santil hu

Incꞌaꞌ takasicꞌ ru li ani takara

¹ Ex inherma̱n, la̱ex nequepa̱b li Ka̱cuaꞌ Jesucristo, li kꞌaxal nim xlokꞌal. Joꞌcan nak junakiqueb nak te̱rileb le̱ ras e̱ri̱tzꞌin. Moco jun ta sa te̱ril ut jun ta incꞌaꞌ.

² Ma̱re teꞌcuulak cuibak li cui̱nk bar chꞌutchꞌu̱quex cuiꞌ chixlokꞌoninquil li Dios. Ma̱re li jun kꞌaxal cha̱bil xtikibanquil ut cuan xmatkꞌab oro. Ut li jun chic ma̱re nebaꞌ ut kꞌel li rakꞌ.

³ Ma̱re caꞌaj cuiꞌ li cha̱bil xtikibanquil te̱qꞌue saꞌ xnakꞌ e̱ru ut te̱ye re: Chunlan arin saꞌ li cha̱bil naꞌajej. Aꞌut li nebaꞌ te̱ye re: Chunlan arin saꞌ chꞌochꞌ malaj ut cana̱kat chi xakxo toj leꞌ.

⁴ Cui joꞌcan nequeba̱nu naraj naxye nak cuan nequera ut cuan incꞌaꞌ. Yo̱quex chixsicꞌbal ru li junju̱nk. Cui joꞌcan yo̱quex, incꞌaꞌ us le̱ naꞌleb.

⁵ Ex inherma̱n, raro̱quex inban. Abihomak li tinye e̱re. Li Dios quisicꞌoc ruheb li nebaꞌ saꞌ ruchichꞌochꞌ. Abanan li nebaꞌ biomeb chiru li Dios xban nak nequeꞌxpa̱b li Cristo ut teꞌxcꞌul lix nimal xcuanquil li quixyechiꞌi li Dios reheb li nequeꞌrahoc re.

⁶ La̱ex nequetzꞌekta̱naheb li nebaꞌ ut nequeqꞌue xlokꞌaleb li biom. ¿Ma incꞌaꞌ ta biꞌ nequeqꞌue retal nak li biom, aꞌaneb li nequeꞌrahobtesin e̱re? Ut, ¿ma ma̱cuaꞌeb ta biꞌ li biom li nequeꞌcꞌamoc e̱re saꞌ rakleb a̱tin?

⁷ ¿Ma ma̱cuaꞌ ta biꞌ aꞌaneb li nequeꞌmajecuan re lix lokꞌlaj cꞌabaꞌ li Cristo, li nequecꞌabaꞌin la̱ex?

⁸ Tzꞌi̱banbil saꞌ li Santil Hu li chakꞌrab li kꞌaxal nim xcuanquil. Aꞌan naxye: Chara la̱ cuas a̱cui̱tzꞌin joꞌ nak nacara a̱cuib la̱at. Cui joꞌcan nequeba̱nu tzꞌakal re ru yo̱quex chixba̱nunquil.

⁹ Cui la̱ex nequesicꞌ ru li ani nequera, ma̱c yo̱quex chixba̱nunquil. Ut yo̱quex chixkꞌetbal li chakꞌrab.

¹⁰ Li ani naxpa̱b chixjunil li chakꞌrab, abanan cui naxkꞌet junak reheb li chakꞌrab, riqꞌuin aꞌan xkꞌet chixjunil.

¹¹ Li Dios quixye: Matmuxuc caxa̱r. Ut quixye ajcuiꞌ: Ma̱camsi a̱cuas a̱cui̱tzꞌin. Li ani incꞌaꞌ namuxuc caxa̱r, abanan cui xcamsi li ras ri̱tzꞌin, riqꞌuin xba̱nunquil aꞌan, naxkꞌet li chakꞌrab.

¹² Joꞌcan ut cheba̱nuhak li us ut chex-a̱tinak saꞌ xya̱lal xban nak anakcuan cuanquex chic rubel lix chakꞌrab li Cristo li naqꞌuehoc colba-ib.

¹³ Li ani incꞌaꞌ naruxta̱na ru li ras ri̱tzꞌin incꞌaꞌ ajcuiꞌ ta̱uxta̱na̱k ru xban li Dios saꞌ li rakba a̱tin. Ut li ani ta̱ruxta̱na ru li ras ri̱tzꞌin, ta̱uxta̱na̱k ajcuiꞌ ru xban li Dios.

Ma̱cꞌaꞌ na-oc cuiꞌ li kapa̱ba̱l cui incꞌaꞌ nakaba̱nu li us

¹⁴ Ex inherma̱n, ¿cꞌaꞌru aj e nak tixye junak nak aꞌan aj pa̱banel cui incꞌaꞌ yo̱ chixba̱nunquil li us? Cui joꞌcan yo̱ chixba̱nunquil, ma̱cꞌaꞌ na-oc cuiꞌ lix pa̱ba̱l. Moco naru ta ta̱colekꞌ xban.

¹⁵ Ma̱re cuan junak kech aj pa̱banelil ma̱cꞌaꞌ cuan re. Ma̱cꞌaꞌ rakꞌ ut ma̱cꞌaꞌ xcua.

¹⁶ Ut la̱o nakaye re: Chacuil a̱cuib. Tzꞌap a̱cuib chi us ut chatcuaꞌak chi us. Ut cui ma̱cꞌaꞌ nakaqꞌue re, ma̱cꞌaꞌ na-oc cuiꞌ li joꞌ qꞌuial nakaye re.

¹⁷ Joꞌcan ajcuiꞌ nakacꞌul riqꞌuin li kapa̱ba̱l. Cui nakaye nak nakapa̱b li Cristo ut incꞌaꞌ nakaba̱nu li us, camenak li kapa̱ba̱l. Ma̱cꞌaꞌ na-oc cuiꞌ.

¹⁸ Ma̱re cuan junak tixye: Cuan li nequeꞌxpa̱b li Cristo ut cuan ajcuiꞌ li nequeꞌxye nak tzꞌakal riqꞌuin xba̱nunquil li us. Abanan la̱in tincꞌut cha̱cuu nak ninpa̱b li Cristo riqꞌuin li us ninba̱nu. Ut la̱at, ¿chanru nak ta̱cꞌut chicuu nak cuan a̱pa̱ba̱l cui incꞌaꞌ nacaba̱nu li us?

¹⁹ La̱at nacapa̱b nak li Dios jun ajcuiꞌ. Us ajcuiꞌ nak nacapa̱b. Aban joꞌcan ajcuiꞌ eb li ma̱us aj musikꞌej nequeꞌxpa̱b nak jun ajcuiꞌ li Dios cuan ut nequeꞌsicsot xban xxiuheb.

²⁰ Ma̱cꞌaꞌ a̱naꞌleb. ¿Jokꞌe ta̱tau xya̱lal chi tzꞌakal? ¿Ma incꞌaꞌ nacaqꞌue retal nak cui incꞌaꞌ nacaba̱nu li us, ma̱cꞌaꞌ na-oc cuiꞌ la̱ pa̱ba̱l?

²¹ Cꞌoxlan caꞌchꞌinak chirix laj Abraham li kaxeꞌto̱nil yucuaꞌ nak quixqꞌue laj Isaac li ralal chokꞌ xmayej saꞌ xbe̱n li artal. Ut riqꞌuin aꞌan li Dios quixye nak ti̱c xchꞌo̱l laj Abraham.

²² ¿Ma incꞌaꞌ nacaqꞌue retal nak laj Abraham quixba̱nu li us ut riqꞌuin aꞌan quicꞌutun lix pa̱ba̱l? Ut riqꞌuin li quixba̱nu quitzꞌakloc ru lix pa̱ba̱l.

²³ Ut quicꞌulman joꞌ naxye saꞌ li Santil Hu: Laj Abraham quixpa̱b li Dios ut riqꞌuin aꞌan li Dios quixye nak ti̱c xchꞌo̱l. Ut xban aꞌan nayeman nak laj Abraham raro xban li Dios.

²⁴ La̱ex nequeqꞌue retal nak ma̱cuaꞌ caꞌaj cuiꞌ riqꞌuin xpa̱banquil li Dios nak ti̱c li kachꞌo̱l chiru li Dios. Riqꞌuin aj ban cuiꞌ xba̱nunquil li us.

²⁵ Lix Rahab, aꞌan xcomoneb li ixk li nequeꞌxcꞌayi rib nak quicuan. Abanan quixtenkꞌaheb laj qꞌuehol etal chixsicꞌbal jalan chic be re nak teꞌxcol ribeb. Riqꞌuin li usilal quixba̱nu lix Rahab, li Dios quixye nak ti̱c xchꞌo̱l.

²⁶ Junak tzꞌejcualej ma̱cꞌaꞌ chic xmusikꞌ, ma̱cꞌaꞌ na-oc cuiꞌ xban nak camenak chic. Joꞌcan ajcuiꞌ li kapa̱ba̱l. Cui incꞌaꞌ nakaba̱nu li us, ma̱cꞌaꞌ na-oc cuiꞌ.