Santiago 1 - Li Santil hu

Xqꞌuebal xsahil xchꞌo̱leb laj pa̱banel

¹ La̱in laj Santiago, laj cꞌanjel chiru li Dios ut chiru li Ka̱cuaꞌ Jesucristo. Yo̱quin chi tzꞌi̱bac e̱riqꞌuin la̱ex, li cablaju chi xte̱paleb laj Israel. Nintakla xsahil e̱chꞌo̱l la̱ex li xejeqꞌui e̱rib yalak bar saꞌ li junju̱nk chi naꞌajej.

Li cha̱bil naꞌleb li naxqꞌue li Dios

² Ex inherma̱n, chisahokꞌ taxak saꞌ e̱chꞌo̱l riqꞌuin li raylal nequecꞌul. Yalak cꞌaꞌru li raylal nachal saꞌ e̱be̱n, aꞌan yal re xyalbal rix le̱ pa̱ba̱l.

³ La̱ex nequenau nak riqꞌuin li yalecꞌ nakacꞌul, nacacuu li kachꞌo̱l saꞌ li kapa̱ba̱l.

⁴ Abanan junelic checuyak li raylal re nak tzꞌakalak e̱re e̱ru nak texcua̱nk. Cha̱bilakex ut ma̱cꞌaꞌ chexpaltokꞌ cuiꞌ.

⁵ Cui cuan junak saꞌ e̱ya̱nk ta̱raj xnaꞌleb, chixtzꞌa̱mahak re li Dios, ut li Dios tixqꞌue chi anchal xchꞌo̱l ut chi nabal.

⁶ Ut nak tixtzꞌa̱ma re li Dios, tento nak tixpa̱b nak ta̱qꞌuehekꞌ re xban li Dios. Moco yal ta xcab rix xchꞌo̱l nak tixtzꞌa̱ma. Tixtzꞌa̱ma ban chi anchal xchꞌo̱l. Li ani yal xcab rix xchꞌo̱l tixtzꞌa̱ma li cꞌaꞌru ta̱raj re li Dios, aꞌan chanchan li palau incꞌaꞌ tuktu ru. Lix chꞌo̱l li jun aꞌan chanchan li palau ecꞌasinbil xban li ikꞌ ut nacꞌameꞌ yalak bar.

⁷ Cui yal xcab rix xchꞌo̱l nak tixtzꞌa̱ma, mixcꞌoxla nak tixcꞌul li cꞌaꞌru naxtzꞌa̱ma re li Dios.

⁸ Li ani cuib ru lix chꞌo̱l, junpa̱t naxjal xcꞌaꞌux riqꞌuin li cꞌaꞌru naxcꞌoxla xba̱nunquil.

⁹ Junak li herma̱n, usta ma̱cꞌaꞌ cuan re, chisahokꞌ saꞌ xchꞌo̱l xban nak aꞌan kꞌaxal lokꞌ chiru li Dios.

¹⁰ Joꞌcan ajcuiꞌ junak biom chisahokꞌ saꞌ xchꞌo̱l usta nasach chixjunil li cꞌaꞌru cuan re xban nak lix biomal ma̱cꞌaꞌ na-oc cuiꞌ chiru li Dios. Li biomal chanchan li utzꞌuꞌuj nak na-osoꞌ.

¹¹ Li utzꞌuꞌuj nachakic xban li sakꞌe ut natꞌaneꞌ. Joꞌcan ajcuiꞌ li cuan xbiomal. Aꞌan ta̱ca̱mk usta toj yo̱k chixsicꞌbal xtzꞌakob lix biomal.

Li xyalbal rix li kapa̱ba̱l

¹² Us xak reheb li nequeꞌxcuy xnumsinquil li raylal ut incꞌaꞌ nequeꞌchꞌinan xchꞌo̱l. Li ani naxcuy xnumsinquil li yalecꞌ teꞌxcꞌul lix ma̱tan li naxyechiꞌi li Dios reheb li nequeꞌrahoc re. Ut lix ma̱taneb, aꞌan li yuꞌam chi junelic.

¹³ Li ani nayaleꞌ rix lix pa̱ba̱l mixcꞌoxla nak aꞌ li Dios naqꞌuehoc re chi a̱le̱c. Li Dios ma̱ ani naxqꞌue chi a̱le̱c chi moco naa̱le̱c xban li incꞌaꞌ us.

¹⁴ Li a̱le̱c nachal saꞌ xbe̱n li junju̱nk li naxqꞌue rib chi balakꞌi̱c xban li naxrahi ru.

¹⁵ Riqꞌuin xrahinquil ru li cꞌaꞌru incꞌaꞌ us, naticla li ma̱c. Ut nak ac xnumta li ma̱c nachal li ca̱mc.

¹⁶ Ex inherma̱n, me̱balakꞌi e̱rib chixcꞌoxlanquil nak li Dios naqꞌuehoc chak re li a̱le̱c saꞌ e̱be̱n.

¹⁷ Xban nak chixjunil li cꞌaꞌak re ru tzꞌakal cha̱bil aꞌ li Dios saꞌ choxa naqꞌuehoc chak ke. Li Dios quiyi̱ban re li nacutanobresin ru li choxa. Li Dios ma̱cuaꞌ joꞌ li sakꞌe namoy ru. Li Dios incꞌaꞌ naxjal lix naꞌleb. Aꞌan ban chi junelic.

¹⁸ Xban nak joꞌcan quiraj li Dios, joꞌcan nak quixye nak chiru li Dios chanchano li xbe̱n ru li racui̱mk li quixyoꞌobtesi chak.

Chikapa̱b chi tzꞌakal li ra̱tin li Dios

¹⁹ Ex inherma̱n, raro̱quex inban. La̱ex ac nequenau lix ya̱lal aꞌin. Joꞌcan nak cheqꞌuehak e̱chꞌo̱l chi abi̱nc. Checꞌoxla chi us li oc e̱re chixyebal ut mexjoskꞌoꞌ.

²⁰ Xban nak cui nocojoskꞌoꞌ, incꞌaꞌ nakaba̱nu li cꞌaꞌru naraj li Dios.

²¹ Joꞌcan ut nak checanabak xba̱nunquil li cꞌaꞌru incꞌaꞌ us ut chixjunil li ma̱usilal. Ut checꞌulak saꞌ xya̱lal li ra̱tin li Dios li qꞌuebil e̱re. Chicana̱k saꞌ e̱chꞌo̱l xban nak li ra̱tin cuan xcuanquil re e̱colbal.

²² Chepa̱bak ut cheba̱nuhak li cꞌaꞌru naxye li ra̱tin li Dios. Me̱balakꞌi e̱rib chixcꞌoxlanquil nak tzꞌakal riqꞌuin caꞌaj cuiꞌ rabinquil li ra̱tin. Tento ban ajcuiꞌ xba̱nunquil li naxye li ra̱tin li Dios.

²³ Li ani narabi li ra̱tin li Dios ut incꞌaꞌ naxba̱nu li naxye, aꞌan chanchan jun li cui̱nk naril li ru saꞌ lem.

²⁴ Ut nak ac xril li ru, naxic ut saꞌ junpa̱t nasach saꞌ xchꞌo̱l chanru na-iloc.

²⁵ Lix chakꞌrab li Dios tzꞌakal re ru ut riqꞌuin xpa̱banquil aꞌan nakatau li kacolbal. Li ani naxqꞌue xchꞌo̱l chixtzolbal lix chakꞌrab li Dios incꞌaꞌ nasach saꞌ xchꞌo̱l li cꞌaꞌru naxtzol. Naxba̱nu ban li naxye. Ut osobtesinbil xban li Dios riqꞌuin li cꞌaꞌru naxba̱nu.

²⁶ Cui junak naxcꞌoxla nak tzꞌakal aj pa̱banel, ut incꞌaꞌ naxqꞌue retal li cꞌaꞌru naxye, li jun aꞌan naxbalakꞌi rib xjunes rib ut lix pa̱ba̱l ma̱cꞌaꞌ na-oc cuiꞌ.

²⁷ Aban chiru li Acuabej Dios, li napa̱ban chi tzꞌakal ut ma̱cꞌaꞌ xpaltil, aꞌan li natenkꞌan reheb li nebaꞌ ut li xma̱lcaꞌan saꞌ lix raylaleb. Ut incꞌaꞌ naxba̱nu li ma̱usilal li nequeꞌxba̱nu li toj ma̱jiꞌ nequeꞌpa̱ban.