Salmos 9 - Li Santil hu

Laj David quixqꞌue xlokꞌal li Dios xban nak saꞌ ti̱quilal narakoc a̱tin

¹ At Ka̱cuaꞌ, tatinlokꞌoni chi anchal inchꞌo̱l chi anchal li cua̱m. Ut tinye resilal chixjunil li nacaba̱nu riqꞌuin xnimal la̱ cuanquilal.

² Numtajenak lix sahil inchꞌo̱l nacaqꞌue. Ut tinbicha la̱ lokꞌal, at nimajcual Dios.

³ Li xicꞌ nequeꞌiloc cue nequeꞌxucuac cha̱cuu ut nequeꞌe̱lelic. Ut teꞌosokꞌ riqꞌuin lix nimal la̱ cuanquil.

⁴ La̱at saꞌ xya̱lal xatrakoc a̱tin saꞌ inbe̱n. La̱at xaye nak la̱in ma̱cꞌaꞌ inma̱c. Ut xaye nak us li yo̱quin chixba̱nunquil.

⁵ La̱at xatkꞌusuc reheb li incꞌaꞌ nequeꞌpa̱ban cha̱cuu. La̱at ajcuiꞌ xatsachoc reheb aꞌan, xban nak incꞌaꞌ useb xnaꞌleb. Xasacheb chi junaj cua ut incꞌaꞌ chic teꞌabi̱k resileb.

⁶ Xeꞌosoꞌ chi junaj cua li xicꞌ nequeꞌiloc ke ut xasach ajcuiꞌ lix tenamiteb. Ut incꞌaꞌ chic teꞌabi̱k resileb.

⁷ Aban la̱at, at Ka̱cuaꞌ, cuan a̱cuanquilal chi junelic. Ut nim la̱ cuanquil chi rakoc a̱tin.

⁸ La̱at saꞌ xya̱lal nacattaklan saꞌ xbe̱n li ruchichꞌochꞌ ut saꞌ ti̱quilal nacatrakoc a̱tin saꞌ xbe̱neb li tenamit.

⁹ At Ka̱cuaꞌ, caꞌaj cuiꞌ a̱cuiqꞌuin teꞌxcol rib li rahobtesinbileb. Ut a̱cuiqꞌuin ajcuiꞌ teꞌxcol rib jokꞌe cuanqueb saꞌ raylal.

¹⁰ Li ac xeꞌpa̱ban cha̱cuu, cauheb xchꞌo̱l a̱cuiqꞌuin. La̱at, at Ka̱cuaꞌ, incꞌaꞌ nacatzꞌekta̱na li ani naxtzꞌa̱ma xtenkꞌanquil a̱cue.

¹¹ Bichahomak xlokꞌal li Ka̱cuaꞌ Dios li cuan saꞌ li santil naꞌajej Sión. Ut cheserakꞌihak resil saꞌ eb li tenamit li cꞌaꞌru quixba̱nu li Dios.

¹² Li Dios naril xtokꞌoba̱l ruheb li cuanqueb saꞌ raylal. Ut naxqꞌue chixtojbal xma̱queb li ani naxcamsi ras ri̱tzꞌin.

¹³ At Ka̱cuaꞌ, chacuuxta̱na cuu. China̱cuil taxak xban nak cuanquin saꞌ raylal xbaneb li xicꞌ nequeꞌiloc cue. La̱at, at Ka̱cuaꞌ, china̱col chiru li ca̱mc,

¹⁴ re nak tinye resil xnimal la̱ cuusilal reheb li cuanqueb Jerusalén. Ut ta̱sahokꞌ inchꞌo̱l xban nak la̱at tatcolok cue.

¹⁵ Li tenamit li incꞌaꞌ nequeꞌpa̱ban cha̱cuu, xjuneseb queꞌxsicꞌ xraylaleb. Chanchan nak queꞌxbec jun li jul ut aꞌaneb ajcuiꞌ queꞌoc chi saꞌ. Ut xeꞌxyi̱b jun li raꞌal ut aꞌaneb ajcuiꞌ li queꞌtꞌaneꞌ chi saꞌ.

¹⁶ At Ka̱cuaꞌ, xban nak nacatrakoc a̱tin saꞌ xya̱lal, nacacꞌutbesi la̱ ti̱quilal. Aꞌut li incꞌaꞌ useb xnaꞌleb xjunes nequeꞌxsicꞌ xraylaleb riqꞌuin li incꞌaꞌ us nequeꞌxba̱nu.

¹⁷ Chixjunileb li incꞌaꞌ useb xnaꞌleb teꞌtakla̱k saꞌ xbalba xban nak nequeꞌxtzꞌekta̱na li Dios.

¹⁸ Ta̱cuulak xkꞌehil nak teꞌtenkꞌa̱k li nebaꞌ, ut teꞌcꞌojoba̱k xchꞌo̱l li rahobtesinbileb.

¹⁹ At Ka̱cuaꞌ, cꞌut la̱ cuanquil. Ma̱qꞌueheb li tenamit chi numta̱c saꞌ a̱be̱n. La̱at ban tatrakok a̱tin saꞌ xbe̱neb.

²⁰ At Ka̱cuaꞌ, chaqꞌueheb chi xucuac re nak teꞌxqꞌue retal nak ma̱cꞌaꞌeb xcuanquil xban nak yal cui̱nkeb.