Salmos 88 - Li Santil hu

Aꞌin xtij jun li cui̱nk re xtzꞌa̱manquil chiru li Dios nak ta̱colekꞌ chiru li ca̱mc

¹ At Ka̱cuaꞌ, at inDios, la̱at laj Colol cue. Chi kꞌek chi cutan nintzꞌa̱ma intenkꞌanquil cha̱cuu.

² Chacuabi taxak lin tij ut chasume taxak li cꞌaꞌru nintzꞌa̱ma cha̱cuu.

³ Cꞌajoꞌ li raylal li yo̱quin chixcꞌulbal. Ca̱mc cue nak nacuecꞌa.

⁴ Naru nequeꞌxye nak ac xincam xban nak ma̱cꞌaꞌ chic inmetzꞌe̱u.

⁵ Chanchan nak tzꞌektzꞌo̱quin saꞌ xya̱nkeb li camenak. Chanchanin jun xcomoneb li queꞌcamsi̱c chi chꞌi̱chꞌ saꞌ li ple̱t, li ac xeꞌmukeꞌ. Incꞌaꞌ chic cacoleb ut incꞌaꞌ chic nequeꞌjulticoꞌ a̱cue.

⁶ Chanchan nak xina̱qꞌue saꞌ jun chamal jul kꞌojyi̱n xsaꞌ.

⁷ Cꞌajoꞌ la̱ joskꞌil saꞌ inbe̱n. Incꞌaꞌ chic nincuy. Chanchan nak yo̱ chi cha̱lc lix cau ok li haꞌ saꞌ inbe̱n.

⁸ Xina̱qꞌue chi tzꞌekta̱na̱c xbaneb li cuami̱g. Incꞌaꞌ chic nequeꞌraj rilbal cuu ut xicꞌ chic niquineꞌril. Chanchan cuanquin chi pre̱xil ut incꞌaꞌ naru nin-el.

⁹ Cꞌajoꞌ li ya̱bac ninba̱nu xban li raylal li yo̱quin chixcꞌulbal. Joꞌcan nak yo̱ chi mutzꞌocꞌ li xnakꞌ cuu. Aban rajlal cutan ninya̱ba la̱ cꞌabaꞌ, at Ka̱cuaꞌ. Nintzꞌa̱ma intenkꞌanquil cha̱cuu.

¹⁰ ¿Ma ta̱ba̱nu ta biꞌ li sachba chꞌo̱lej reheb li camenak? ¿Ma ta̱ru̱k ta biꞌ teꞌcuacli̱k li camenak chixqꞌuebal a̱lokꞌal?

¹¹ ¿Ma ta̱ru̱k ta biꞌ ta̱yehekꞌ resil li ya̱l ut la̱ cuusilal saꞌ xya̱nkeb li camenak?

¹² ¿Ma ta̱ru̱k ta biꞌ chic teꞌril li milagro li nacaba̱nu nak ac camenakeb chic? Nak ac xcam junak, moco ta̱julticokꞌ ta chic re li ti̱quilal.

¹³ Abanan la̱in nintzꞌa̱ma intenkꞌanquil a̱cuiqꞌuin, at nimajcual Dios. Rajlal ekꞌela nintijoc cha̱cuu.

¹⁴ At Ka̱cuaꞌ, ¿cꞌaꞌut nak niquina̱tzꞌekta̱na? At inDios, ¿cꞌaꞌut nak incꞌaꞌ nacasume li cꞌaꞌru nintzꞌa̱ma cha̱cuu?

¹⁵ La̱in tokꞌoba̱l cuu ut ra saꞌ inchꞌo̱l chalen saꞌ insa̱jilal. Nabal li raylal xaqꞌue saꞌ inbe̱n ut incꞌaꞌ chic nincuy.

¹⁶ Cꞌajoꞌ a̱joskꞌil saꞌ inbe̱n. Nacuecꞌa nak incꞌaꞌ chic nincuy.

¹⁷ Junelic yo̱ a̱joskꞌil saꞌ inbe̱n. Chanchan nak sutsu̱quin xban li butꞌ nak nachal chixjunil li raylal saꞌ inbe̱n.

¹⁸ Usta li tzꞌakal cuami̱g xinixtzꞌekta̱na. Ma̱cꞌaꞌ chic cuochben. Junes saꞌ kꞌojyi̱n aj chic cuanquin.