Salmos 8 - Li Santil hu

Quiqꞌueheꞌ xlokꞌal li cui̱nk xban li Dios

¹ At Ka̱cuaꞌ, at kaDios, numtajenak la̱ lokꞌal saꞌ chixjunil li ruchichꞌochꞌ. Lokꞌoninbil la̱ cꞌabaꞌ saꞌ choxa joꞌ ajcuiꞌ saꞌ ruchichꞌochꞌ.

² Eb li cocꞌal ut eb li cꞌulaꞌal nequeꞌxqꞌue a̱lokꞌal. Nequeꞌxcꞌut la̱ cuanquilal ut xbaneb aꞌan, teꞌcꞌutekꞌ xxuta̱neb li xicꞌ nequeꞌiloc a̱cue ut mem teꞌcana̱k.

³ Nak nacuil li choxa, ut li po, ut li chahim, ut chixjunil li yi̱banbil a̱ban,

⁴ la̱in nincꞌoxla ut ninye, ¿cꞌaꞌut nak nacacꞌoxlaheb li cui̱nk? Ma̱cꞌaꞌ xcuanquileb. ¿Cꞌaꞌut nak nacaqꞌue a̱chꞌo̱l chirixeb? Eb aꞌan ma̱cꞌaꞌ xcuanquileb.

⁵ Xacubsi caꞌchꞌin xcuanquileb chiruheb li ángel. Abanan xaqꞌueheb xlokꞌal.

⁶ Ut xaqꞌueheb xcuanquil saꞌ xbe̱n la̱ cꞌanjel li xaba̱nu riqꞌuin la̱ cuukꞌ. La̱at xaqꞌue chixjunil li cꞌaꞌak re ru rubel xcuanquileb aꞌan.

⁷ Xaqꞌue xcuanquil saꞌ xbe̱neb chixjunileb li xul: li carner, li cuacax, ut li xul li cuanqueb saꞌ qꞌuicheꞌ.

⁸ Joꞌcan ajcuiꞌ li xul li nequeꞌrupupic chiru choxa joꞌ ajcuiꞌ eb li car ut chixjunileb li xul li cuanqueb saꞌ li palau.

⁹ At Ka̱cuaꞌ, at kaDios, kꞌaxal nim la̱ lokꞌal saꞌ chixjunil li ruchichꞌochꞌ.