Salmos 74 - Li Santil hu

Laj Israel queꞌxtzꞌa̱ma re li Dios nak teꞌcolekꞌ chiruheb li xicꞌ nequeꞌiloc reheb

¹ At inDios, ¿cꞌaꞌut nak xoa̱canab kajunes? ¿Ma junelic yo̱k a̱joskꞌil saꞌ kabe̱n la̱o li sicꞌbil ku a̱ban?

² Chijulticokꞌ a̱cue li kaxeꞌto̱nil yucuaꞌ li xacoleb najter nak cuanqueb aran Egipto. La̱at xacoleb chiruheb li yo̱queb chi rahobtesi̱nc reheb re nak ta̱cꞌameb cuiꞌchic saꞌ li naꞌajej li xayechiꞌi reheb. Chijulticokꞌ a̱cue li tzu̱l Sión li nacatcuan cuiꞌ.

³ Cha̱lkat chi junpa̱t chirilbal la̱ santil naꞌaj. Qꞌue retal chanru nak queꞌxjuqꞌui li templo li xicꞌ nequeꞌiloc a̱cue. Quilajeꞌxpoꞌ chixjunil li cuan aran.

⁴ Cꞌajoꞌ nak queꞌxjap reheb li xicꞌ nequeꞌiloc a̱cue nak queꞌoc saꞌ la̱ templo chixpoꞌbal. Ut aran queꞌxxakab li retalil nak queꞌre̱chani.

⁵ Chanchan yo̱queb chi tꞌanoc cheꞌ rubel qꞌuicheꞌ nak queꞌxjuqꞌui la̱ cuochoch riqꞌuin ma̱l.

⁶ Riqꞌuin ma̱l ut tenleb chꞌi̱chꞌ queꞌxjori chixjunil li cha̱bil cheꞌ li qꞌuebil chokꞌ xsahob ru la̱ cuochoch.

⁷ Nak ac queꞌxpoꞌ chixjunil, queꞌxcꞌat. Queꞌxmux ru la̱ santil templo li quiqꞌueheꞌ cuiꞌ a̱lokꞌal.

⁸ Ut queꞌxye saꞌ xchꞌo̱leb: Kasachak ruheb chi junaj cua, chanqueb. Ut quilajeꞌxcꞌat ajcuiꞌ chixjunileb li cab li nakachꞌutub cuiꞌ kib chixqꞌuebal a̱lokꞌal.

⁹ Ma̱cꞌaꞌ chic junak retalil nacꞌutu̱c re chiku xban nak ma̱cꞌaꞌ chic junak profeta. Ut ma̱ ani nayehoc ke joꞌ najtil chic takacꞌul li raylal aꞌin.

¹⁰ At Ka̱cuaꞌ, ¿joꞌ najtil chic takacꞌul li raylal aꞌin saꞌ rukꞌeb li xicꞌ nequeꞌiloc ke? ¿Ma toj ta̱canabeb re nak yo̱keb cha̱majecuanquil?

¹¹ ¿Cꞌaꞌut nak yal nacacuileb? ¿Cꞌaꞌut nak incꞌaꞌ ta̱qꞌueheb chixtojbal xma̱queb chi junpa̱t?

¹² At inDios, la̱at li kaRey chalen chak najter. Ut nabal sut coa̱col chiruheb li xicꞌ nequeꞌiloc ke arin saꞌ ruchichꞌochꞌ.

¹³ Riqꞌuin xnimal la̱ cuanquilal, cajach ru li Caki Palau re nak teꞌnumekꞌ jun pacꞌal eb laj Israel. Ut casach ruheb laj Egipto li yo̱queb chi ta̱ke̱nc reheb re teꞌxchap. Chanchan nak cacamsiheb li ni̱nki xul li cuanqueb saꞌ li palau nak casach ruheb.

¹⁴ Nak casach ruheb laj Egipto, chanchan nak capuqꞌui lix jolom li xul Leviatán xcꞌabaꞌ, li nacuan saꞌ li palau. Ut chanchan nak caqꞌueheb lix tibeleb chixtiuheb li xul li cuanqueb saꞌ li chaki chꞌochꞌ nak casach ruheb laj Egipto.

¹⁵ Nak ma̱cꞌaꞌ rucꞌaheb laj Israel, la̱at caqꞌue xhaꞌeb. La̱at caqꞌue li yuꞌam haꞌ re nak teꞌucꞌak. Ut la̱at cajach chi ribil li nimaꞌ re nak chaki teꞌnumekꞌ cuiꞌ usta kꞌaxal cau rok li nimaꞌ.

¹⁶ La̱at catqꞌuehoc re li cutan ut li kꞌojyi̱n. Ut la̱at catxakaban re saꞌ xnaꞌaj li sakꞌe ut li po.

¹⁷ La̱at catyi̱ban re chixjunil li ruchichꞌochꞌ. La̱at catqꞌuehoc re li sakꞌehil ut li habalkꞌe xban nak la̱at yal a̱cue saꞌ xbe̱n chixjunil.

¹⁸ At Ka̱cuaꞌ, misach taxak saꞌ a̱chꞌo̱l nak li incꞌaꞌ useb xnaꞌleb yo̱queb cha̱majecuanquil. Eb aꞌan incꞌaꞌ nacateꞌxqꞌue saꞌ ruheb. Junes a̱hobbal nequeꞌxba̱nu.

¹⁹ Moa̱canab kajunes xban nak la̱o kꞌun kachꞌo̱l. Chanchano li cocꞌ mucuy. Moa̱kꞌaxtesi saꞌ rukꞌeb li xicꞌ nequeꞌiloc ke xban nak chanchaneb li joskꞌ aj xul.

²⁰ Chijulticokꞌ taxak a̱cue li contrato li caba̱nu kiqꞌuin. La̱at nacacuil nak junes raylal ut ra xi̱cꞌ yo̱ xcꞌulbal saꞌ chixjunil li katenamit.

²¹ Incꞌaꞌ taxak xuta̱nal toe̱lk la̱o li yo̱co chi cꞌuluc raylal. Choa̱col ban la̱o li cuanco saꞌ raylal ut saꞌ nebaꞌil re nak takaqꞌue a̱lokꞌal.

²² At Ka̱cuaꞌ, col rix la̱ lokꞌal. Ut qꞌue retal nak rajlal yo̱queb cha̱hobbal li incꞌaꞌ useb xnaꞌleb.

²³ Abi chanru nak japjo̱queb re li xicꞌ nequeꞌiloc a̱cue. Ma̱canab yal chi joꞌcan, at Ka̱cuaꞌ, xban nak kꞌaxal cuiꞌchic nanumta li yo̱queb chixba̱nunquil.