Salmos 71 - Li Santil hu

Li rey David quixtzꞌa̱ma xtenkꞌanquil chiru li Dios saꞌ xti̱xilal

¹ At Ka̱cuaꞌ, caꞌaj cuiꞌ a̱cuiqꞌuin ta̱ru̱k tincol cuib. China̱tenkꞌa taxak re nak incꞌaꞌ xuta̱nal tine̱lk chiruheb li xicꞌ nequeꞌiloc cue.

² Xban nak ti̱c la̱ chꞌo̱l, china̱tenkꞌa ut china̱col. Chacuabi taxak li nintzꞌa̱ma cha̱cuu ut china̱col.

³ La̱at taxak joꞌ jun sako̱nac bar naru tincol cuiꞌ cuib jokꞌe cua̱nkin saꞌ raylal. La̱at cayechiꞌi nak tina̱tenkꞌa nak cuanquin saꞌ raylal. La̱at joꞌ jun li sako̱nac bar naru tincol cuiꞌ cuib xban nak caꞌaj cuiꞌ la̱at nacatqꞌuehoc xcacuilal inchꞌo̱l.

⁴ At inDios, china̱col taxak saꞌ rukꞌeb li incꞌaꞌ useb xnaꞌleb. China̱col chiruheb li nequeꞌba̱nun ma̱usilal ut li kꞌaxal joskꞌeb.

⁵ At Ka̱cuaꞌ Dios, caꞌaj cuiꞌ a̱cuiqꞌuin cꞌojcꞌo inchꞌo̱l chalen chak saꞌ insa̱jilal.

⁶ Ac la̱at ajcuiꞌ nacat-iloc cue nak toj ma̱jiꞌ ninyoꞌla. La̱at xattenkꞌan cue chi yoꞌla̱c. Joꞌcan nak junelic tinqꞌue a̱lokꞌal.

⁷ Nabaleb li nequeꞌsach xchꞌo̱l chicuilbal chanru nak niquina̱col chiru li qꞌuila raylal li nincꞌul.

⁸ Rajlal cutan tinqꞌue a̱lokꞌal ut junelic tinnima a̱cuu.

⁹ Mina̱tzꞌekta̱na nak ac ti̱xakin chic ut mina̱canab injunes nak ma̱cꞌaꞌak chic inmetzꞌe̱u.

¹⁰ Li xicꞌ nequeꞌiloc cue incꞌaꞌ us nequeꞌxye chicuix ut nequeꞌxcꞌu̱b ru chanru nak tineꞌxcamsi.

¹¹ Eb aꞌan nequeꞌxye: Kata̱kehak ut kachapak xban nak ac xcanaba̱c xban li Dios ut ma̱ ani chic naru nacoloc re, chanqueb.

¹² Joꞌcan nak mina̱canab injunes, at inDios. China̱tenkꞌa ban chi junpa̱t.

¹³ Chacꞌuteb taxak xxuta̱n ut chasacheb taxak ruheb li nequeꞌraj incamsinquil. Xuta̱nal taxak teꞌxcꞌul ut sachso̱queb ta xchꞌo̱leb teꞌcana̱k li nequeꞌraj xba̱nunquil raylal cue.

¹⁴ Abanan la̱in caꞌaj cuiꞌ a̱cuiqꞌuin ninyoꞌonin junelic ut kꞌaxal cuiꞌchic tinqꞌue a̱lokꞌal rajlal cutan.

¹⁵ La̱in rajlal cutan tinye resil nak la̱at ti̱c la̱ chꞌo̱l. La̱at nacatcoloc cue. Incꞌaꞌ naru rajlanquil jarub sut xina̱col chiruheb li xicꞌ nequeꞌiloc cue.

¹⁶ Tinye resil li usilal nacaba̱nu, at Ka̱cuaꞌ, riqꞌuin xnimal la̱ cuanquil ut tinchꞌolob xya̱lal nak caꞌaj cuiꞌ la̱at ti̱c a̱chꞌo̱l.

¹⁷ At inDios, chalen chak saꞌ incaꞌchꞌinal la̱at xacꞌut lix ya̱lal chicuu. Ut toj chalen anakcuan yo̱quin ajcuiꞌ xyebal resil li nacaba̱nu riqꞌuin xnimal la̱ cuanquil.

¹⁸ At inDios, mina̱canab injunes anakcuan nak ac ti̱xin chic ut sak chic injolom xban nak tento tinye resil la̱ cuanquilal reheb li tenamit aꞌin ut reheb li alal cꞌajolbej li teꞌyoꞌla̱k mokon.

¹⁹ At inDios, kꞌaxal numtajenak xti̱quilal la̱ chꞌo̱l. Incꞌaꞌ naru xbisbal. Sachba chꞌo̱lej li nacaba̱nu. Ma̱ ani chic cuan xcuanquil joꞌ la̱at.

²⁰ Usta xina̱canab chixcꞌulbal nabal li raylal ut li chꞌaꞌajquilal, abanan la̱at ta̱qꞌue cuiꞌchic incacuilal. Chanchan cuanquin saꞌ li chamal jul nak yo̱quin chixcꞌulbal li raylal. Abanan la̱at tatcolok cue.

²¹ La̱at ta̱qꞌue cuiꞌchic inlokꞌal ut ta̱cꞌojob cuiꞌchic inchꞌo̱l.

²² At inDios, la̱in tinqꞌue a̱lokꞌal riqꞌuin li salterio. Ut tinbicha̱nk riqꞌuin arpa re xyebal resil lix ti̱quilal la̱ chꞌo̱l. La̱at li Dios Santo reheb laj Israel.

²³ Tinbicha̱nk xban xsahil inchꞌo̱l. Chi anchal inchꞌo̱l tinbicha a̱lokꞌal xban nak la̱at xatcoloc cue.

²⁴ Junelic tinye resil la̱ ti̱quilal xban nak xuta̱nal xeꞌel li queꞌraj xba̱nunquil li ma̱usilal cue ut sachso̱queb xnaꞌleb xeꞌcana.