Salmos 7 - Li Santil hu

Laj David quitijoc re nak li Dios ta̱rakok a̱tin saꞌ xbe̱neb li xicꞌ nequeꞌiloc re

¹ At Ka̱cuaꞌ, at inDios, a̱cuiqꞌuin cau inchꞌo̱l. China̱tenkꞌa ut china̱col chiruheb li xicꞌ nequeꞌiloc cue.

² Incꞌaꞌ nacuaj nak tineꞌxtꞌupi joꞌ nequeꞌxba̱nu li cakcoj nak nequeꞌxtꞌupi junak li xul. Incꞌaꞌ nacuaj nak tineꞌxcamsi chi ma̱ ani ta̱colok cue.

³ At Ka̱cuaꞌ, at inDios, cui incꞌaꞌ us yo̱quin ut cui incꞌaꞌ us lin naꞌleb,

⁴ ut cui xinba̱nu raylal reheb li cuami̱g,

⁵ cui joꞌcan innaꞌleb, chineꞌxsicꞌak li xicꞌ nequeꞌiloc cue toj retal tineꞌxchap. Chineꞌxcutak saꞌ chꞌochꞌ ut chineꞌxcamsi ut cheꞌrisihak lin lokꞌal.

⁶ At Ka̱cuaꞌ, chacꞌut la̱ joskꞌil chiruheb li xicꞌ nequeꞌiloc cue. At inDios, china̱tenkꞌa xban nak la̱at saꞌ ti̱quilal nacatrakoc a̱tin.

⁷ Chꞌutubeb chixjunileb li tenamit cha̱cuu. Ut chacꞌutbesi lix nimal la̱ cuanquilal chiruheb.

⁸ At inDios, la̱at li nacatrakoc a̱tin saꞌ xbe̱neb chixjunileb li tenamit. La̱at nacanau nak ti̱c inchꞌo̱l cha̱cuu. Joꞌcan nak la̱at tatrakok a̱tin saꞌ inbe̱n ut ta̱cꞌut chiruheb nak ma̱cꞌaꞌ inma̱c.

⁹ At inDios, kꞌaxal ti̱c a̱chꞌo̱l. La̱at nacanau lix cꞌaꞌux li junju̱nk ut nacanau li cꞌaꞌru nanumeꞌ saꞌ xchꞌo̱leb. Charam chiruheb li ma̱usilal li nequeꞌxba̱nu li incꞌaꞌ useb xnaꞌleb. Ut chaqꞌue xcacuilal xchꞌo̱l li cha̱bileb xnaꞌleb.

¹⁰ Li nimajcual Dios, aꞌan laj Colol reheb li ti̱queb xchꞌo̱l ut aꞌan ajcuiꞌ laj Colol cue la̱in.

¹¹ Li Dios narakoc a̱tin saꞌ ti̱quilal. Ut junelic narakoc a̱tin saꞌ xbe̱n laj ma̱c.

¹² Cui incꞌaꞌ nequeꞌxyotꞌ xchꞌo̱leb ut cui incꞌaꞌ nequeꞌxjal xcꞌaꞌuxeb, li Dios tixteneb ca̱mc saꞌ xbe̱neb. Chanchan nak yo̱ chixkꞌesnanquil lix chꞌi̱chꞌ ut chanchan nak yo̱ chixcauresinquil lix tzimaj re camsi̱nc.

¹³ Li Dios ac xcauresi rib chi rakoc a̱tin saꞌ xbe̱neb. Chanchan nak ac yo̱ chixti̱canquileb riqꞌuin lix tzimaj.

¹⁴ Qꞌuehomak retal li incꞌaꞌ useb xnaꞌleb chanru nak na-ala saꞌ xchꞌo̱leb xba̱nunquil li ma̱usilal. Nequeꞌxcꞌoxla chi us chanru teꞌxba̱nu toj retal nak nequeꞌoc chi balakꞌi̱nc.

¹⁵ Ut riqꞌuin li balakꞌic nequeꞌxba̱nu, chanchan nak nequeꞌxyi̱b jun li raꞌal chokꞌ re jalan. Abanan aꞌaneb ajcuiꞌ li nequeꞌtꞌaneꞌ chi saꞌ.

¹⁶ Chixjunil li incꞌaꞌ us ut li raylal nequeꞌxcꞌoxla xba̱nunquil re jalan, aꞌaneb ajcuiꞌ li nequeꞌcꞌuluc re.

¹⁷ Aꞌut la̱in ninbantioxi chiru li Ka̱cuaꞌ Dios xban nak saꞌ ti̱quilal narakoc a̱tin. Tinbicha̱nk re xlokꞌoninquil lix cꞌabaꞌ li nimajcual Dios.