Salmos 57 - Li Santil hu

Laj David yo̱ chixtzꞌa̱manquil xtenkꞌanquil chiru li Dios

¹ Chatokꞌoba taxak cuu, at inDios. Chacuuxta̱na taxak cuu xban nak caꞌaj cuiꞌ a̱cuiqꞌuin cau inchꞌo̱l. Tincuaj xcolbal cuib rubel la̱ cuanquil toj retal ta̱numekꞌ li raylal aꞌin saꞌ inbe̱n.

² Tinya̱ba xcꞌabaꞌ li nimajcual Dios li naba̱nun usilal cue.

³ Aꞌ taxak li Dios chitenkꞌa̱nk chak cue toj saꞌ choxa ut chinixcol taxak chiruheb li nequeꞌrahobtesin cue. Li Ka̱cuaꞌ ta̱qꞌuehok chak cue lix nimal ruxta̱n ut tixba̱nu li cꞌaꞌru naxye.

⁴ La̱in cuanquin saꞌ xya̱nkeb li joskꞌ aj cristian. Chanchaneb li joskꞌ aj cakcoj li nequeꞌcamsin. Li ruch reheb chanchan li chꞌi̱chꞌ re camsi̱nc. Ut li ruꞌuj rakꞌeb chanchan li kꞌesnal chꞌi̱chꞌ.

⁵ At Ka̱cuaꞌ, nimanbilak taxak a̱cuu saꞌ choxa, ut chicꞌutu̱nk taxak la̱ lokꞌal saꞌ chixjunil li ruchichꞌochꞌ.

⁶ Nequeꞌxqꞌue inraꞌlenquil saꞌ lin be re intꞌanbal. Nayotꞌeꞌ inchꞌo̱l xbaneb. Chanchan nequeꞌxbec li jul saꞌ lin be li nequeꞌraj tintꞌanekꞌ. Abanan aꞌaneb ajcuiꞌ li xeꞌtꞌaneꞌ chi saꞌ.

⁷ Cau inchꞌo̱l a̱cuiqꞌuin, at inDios, ut cꞌojcꞌo inchꞌo̱l. Tinbicha̱nk re a̱lokꞌoninquil.

⁸ Chi-ajk cuu toj ekꞌela re tinqꞌue xlokꞌal li Dios riqꞌuin lin cuajb. Tinlokꞌoni li Dios riqꞌuin lin arpa.

⁹ Tatinlokꞌoni chiruheb li tenamit, at Ka̱cuaꞌ. Tinbicha la̱ lokꞌal chiruheb chixjunileb li tenamit.

¹⁰ Kꞌaxal nim la̱ rahom saꞌ kabe̱n. Ma̱cꞌaꞌ xbisbal. Kꞌaxal ti̱c la̱ chꞌo̱l ut junelic nacaba̱nu li cꞌaꞌru nacaye.

¹¹ Nimanbilak taxak a̱cuu saꞌ choxa, at Ka̱cuaꞌ, ut chicꞌutu̱nk taxak la̱ lokꞌal saꞌ chixjunil li ruchichꞌochꞌ.