Salmos 54 - Li Santil hu

Laj David naxtzꞌa̱ma chiru li Dios nak ta̱colekꞌ chiruheb li xicꞌ nequeꞌiloc re

¹ At inDios, saꞌ a̱cꞌabaꞌ taxak nak tincolekꞌ. China̱col taxak riqꞌuin xnimal la̱ cuanquilal.

² At inDios, chacuabi taxak lin tij ut chacuabi taxak li cꞌaꞌru nintzꞌa̱ma cha̱cuu.

³ Eb li xicꞌ nequeꞌiloc cue teꞌraj incamsinquil. Kꞌaxal joskꞌeb ut teꞌraj numta̱c saꞌ inbe̱n. Eb aꞌan incꞌaꞌ nacateꞌxcꞌoxla.

⁴ Abanan la̱in ninnau nak la̱at nacatcoloc cue, at inDios. Ut la̱at cuancat riqꞌuineb li nequeꞌtenkꞌan cue.

⁵ Chasukꞌisi taxak saꞌ xbe̱neb li ma̱usilal nequeꞌxba̱nu li xicꞌ nequeꞌiloc cue. At Ka̱cuaꞌ, chasacheb taxak ru xban nak nacatrakoc a̱tin saꞌ ti̱quilal.

⁶ Ut la̱in tinmayejak cha̱cuu chi anchal inchꞌo̱l ut tinlokꞌoni la̱ cꞌabaꞌ, at Ka̱cuaꞌ, xban nak la̱at cha̱bilat.

⁷ La̱in ninnau nak la̱at xatcoloc cue chiruheb chixjunil li raylal ut xcuil nak xasacheb ru li xicꞌ nequeꞌiloc cue.