Salmos 53 - Li Santil hu

Incꞌaꞌ useb xnaꞌleb li xicꞌ nequeꞌiloc reheb lix tenamit li Dios

¹ Li ma̱cꞌaꞌeb xnaꞌleb nequeꞌxye saꞌ xchꞌo̱leb nak ma̱cꞌaꞌ Dios. Numtajenak lix ma̱usilaleb ut nequeꞌxba̱nu li kꞌaxal yibru. Ma̱ jun cha̱bil saꞌ xya̱nkeb.

² Toj saꞌ choxa li Dios yo̱ chak chirilbaleb li cuanqueb saꞌ ruchichꞌochꞌ ma cuan ta na ju̱nkak li cuanqueb xnaꞌleb re teꞌxcꞌoxla li Dios.

³ Chixjunileb ban queꞌxtzꞌekta̱na li Dios, ut nequeꞌxba̱nu li ma̱usilal. Ma̱ ani naraj xba̱nunquil li us yal ta jun.

⁴ Li incꞌaꞌ useb xnaꞌleb incꞌaꞌ nequeꞌxtau xya̱lal. Nequeꞌxba̱nu raylal re lin tenamit ut riqꞌuin aꞌan nequeꞌcuaꞌac. Ut incꞌaꞌ niquineꞌxcꞌoxla, chan li Dios.

⁵ Saꞌ jun cutan teꞌxucuak lix tenamit li Dios, usta incꞌaꞌ raj tento nak teꞌxucuak xban nak li Dios tixsacheb ru li xicꞌ nequeꞌiloc reheb. Teꞌcꞌutekꞌ xxuta̱n nak teꞌtzꞌekta̱na̱k xban li Dios.

⁶ Riqꞌuin ta li Dios li cuan Sión chicha̱lk lix colbaleb laj Israel. Li Ka̱cuaꞌ Dios taxak chicolok reheb li ralal xcꞌajol saꞌ rukꞌeb li nequeꞌnumta saꞌ xbe̱neb. Cheꞌsahokꞌ taxak xchꞌo̱leb laj Israel, li ralal xcꞌajol laj Jacob nak li Dios tixcꞌameb cuiꞌchic saꞌ xtenamiteb.