Salmos 52 - Li Santil huLi Dios narakoc a̱tin saꞌ xbe̱neb li incꞌaꞌ useb xnaꞌleb 1 Li rusilal li Dios cuan chi junelic. La̱at, li nacacuecꞌa nak nim a̱cuanquil, ¿cꞌaꞌut nak nacanimobresi a̱cuib xba̱nunquil li incꞌaꞌ us? 2 Junes ticꞌtiꞌic ut balakꞌic nacacꞌoxla xba̱nunquil. Chanchan xkꞌesnal ruꞌuj chꞌi̱chꞌ li ruꞌuj a̱cuakꞌ xban li ma̱usilal li na-el saꞌ xtzꞌu̱mal a̱cue. 3 Aꞌ chic li incꞌaꞌ us, aꞌan li nacara. Ut li us, aꞌan li nacatzꞌekta̱na. Aꞌ chic li ticꞌtiꞌic nacuulac cha̱cuu, ut li ya̱l incꞌaꞌ nacuulac cha̱cuu. 4 Nacuulac cha̱cuu xrahobtesinquil la̱ cuas a̱cui̱tzꞌin riqꞌuin li a̱tin nacaye, la̱at aj balakꞌ. 5 Abanan li Dios tixsach a̱cuu chi junaj cua. Tatrisi saꞌ la̱ cuochoch ut tatxcamsi. 6 Nak teꞌril li ti̱queb xchꞌo̱l li cꞌaꞌru tixba̱nu li Dios, teꞌxxucua ru ut teꞌxseꞌe li incꞌaꞌ useb xnaꞌleb. 7 Ut teꞌxye, Ilomak a cui̱nk aꞌan. Incꞌaꞌ quixcꞌojob xchꞌo̱l riqꞌuin li Dios. Quixcꞌojob ban xchꞌo̱l saꞌ xbe̱n lix biomal. Saꞌ xchꞌo̱l aꞌan nak tixcol rib riqꞌuin li ma̱usilal naxba̱nu. 8 Abanan la̱in chanchanin jun li cheꞌ olivo li rax rax ru li cuan chire rochoch li Dios. La̱in tincꞌojob inchꞌo̱l chi junelic riqꞌuin li Dios li na-uxta̱nan cuu. 9 At inDios, junelic tinbantioxi̱nk cha̱cuu riqꞌuin li usilal li xaba̱nu ut cau inchꞌo̱l a̱cuiqꞌuin xban nak cha̱bilat riqꞌuineb li nequeꞌrahoc a̱cue. |
© 2019, Wycliffe Bible Translators. All rights reserved.
Wycliffe Bible Translators, Inc.