Salmos 5 - Li Santil hu

Laj David quixtzꞌa̱ma chiru li Dios nak tixcol chiruheb li xicꞌ nequeꞌiloc re

¹ At inDios, chacuabi taxak li yo̱quin chixyebal. Chacuil taxak xtokꞌoba̱l cuu.

² Chacuabihak taxak li yo̱quin chixtzꞌa̱manquil cha̱cuu, at Ka̱cuaꞌ. A̱cuiqꞌuin yo̱quin chi tijoc, at inDios.

³ At Ka̱cuaꞌ, nak nasake̱u nintijoc cha̱cuu ut la̱at niquina̱cuabi. Nintijoc ekꞌela ut nacuoybeni nak la̱at ta̱sume lin tij.

⁴ At inDios, la̱at incꞌaꞌ nacuulac cha̱cuu li ma̱usilal. La̱at xicꞌ nacacuil li incꞌaꞌ us.

⁵ La̱at incꞌaꞌ nacacuil xtokꞌoba̱l ruheb li kꞌetkꞌeteb. Xicꞌ ban nacacuil li incꞌaꞌ useb xnaꞌleb.

⁶ La̱at tatsachok reheb li nequeꞌticꞌtiꞌic, ut xicꞌ nacacuil li ani naxcamsi ras ri̱tzꞌin joꞌ ajcuiꞌ eb laj balakꞌ.

⁷ Abanan la̱in, xban xnimal la̱ cuusilal, tincua̱nk chi sum a̱tin a̱cuiqꞌuin. Tinqꞌue a̱cuanquil ut saꞌ la̱ santil ochoch tatinlokꞌoni.

⁸ China̱tenkꞌa chixtaubal li ti̱quilal re nak incꞌaꞌ ta̱cuiba̱nk inchꞌo̱l xbaneb li xicꞌ nequeꞌiloc cue. China̱beresi re nak tinba̱nu li cꞌaꞌru nacacuaj.

⁹ Eb aꞌan moco ya̱l ta nequeꞌa̱tinac. Cꞌajoꞌ xyibal ru lix naꞌlebeb. Ut li cꞌaꞌru nequeꞌxye chanchan xchuhil li camenak. Sa nak nequeꞌkꞌunbesin, aban balakꞌi̱nc nequeꞌxba̱nu.

¹⁰ Chaqꞌueheb chixtojbal lix ma̱queb, at inDios. Chitꞌanekꞌ saꞌ xbe̱neb li cꞌaꞌru incꞌaꞌ us nequeꞌxba̱nu. Ta̱tzꞌekta̱naheb xban nak numtajenak lix ma̱queb. Eb aꞌan xateꞌxtzꞌekta̱na. Joꞌcan nak ta̱tzꞌekta̱naheb.

¹¹ Ut eb li cauheb xchꞌo̱l a̱cuiqꞌuin cheꞌsahokꞌ saꞌ xchꞌo̱leb, at inDios. Ut cheꞌbicha̱nk chi junelic xban xsahileb saꞌ xchꞌo̱l xban nak la̱at tatcolok reheb. Cheꞌsahokꞌ saꞌ xchꞌo̱leb a̱cuiqꞌuin li nequeꞌrahoc a̱cue.

¹² La̱at, at Ka̱cuaꞌ, ta̱cuosobtesiheb li ti̱queb xchꞌo̱l. Ut riqꞌuin xnimal la̱ cuusilal ta̱coleb chiruheb li xicꞌ nequeꞌiloc reheb, joꞌ nak li soldado naxcol rib riqꞌuin lix ramleb chꞌi̱chꞌ.