Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Salmos 41 - Li Santil hu


Li rey David yo̱ chixtzꞌa̱manquil re li Dios nak ta̱qꞌuehekꞌ xcacuilal nak yaj

1 Us xak re li ani natokꞌoban ruheb li nebaꞌ li tenkꞌa̱c nequeꞌraj xban nak aꞌan ta̱tenkꞌa̱k xban li Ka̱cuaꞌ saꞌ xkꞌehil li raylal.

2 Li Ka̱cuaꞌ, aꞌan ta̱ilok re ut aꞌan ta̱colok re. Tixqꞌue xsahil xchꞌo̱l saꞌ ruchichꞌochꞌ ut incꞌaꞌ tixcanab saꞌ rukꞌeb li xicꞌ nequeꞌiloc re.

3 Li Ka̱cuaꞌ ta̱qꞌuehok xmetzꞌe̱u nak cuan saꞌ raylal. Tixsukꞌisi chokꞌ xcacuilal lix yajel.

4 La̱in xinye re li Ka̱cuaꞌ: —At Ka̱cuaꞌ, chacuuxta̱na taxak cuu. Usta xinma̱cob cha̱cuu, china̱qꞌuirtesi taxak.

5 Eb li xicꞌ nequeꞌiloc cue nequeꞌxtzꞌa̱ma li incꞌaꞌ us saꞌ inbe̱n ut nequeꞌxye: ¿Jokꞌe ta̱ca̱mk re nak incꞌaꞌ chic ta̱patzꞌekꞌ xcꞌabaꞌ? chanqueb.

6 Nequeꞌchal chicuilbal abanan yal xcab rix xchꞌo̱leb. Yal xqꞌuebal cuetal nequeꞌchal nak nequeꞌcꞌulun chicuilbal. Ut nak nequeꞌel cuiqꞌuin nequeꞌoc chi a̱tinac chicuix saꞌ be.

7 Nequeꞌxchꞌutub ribeb li xicꞌ nequeꞌiloc cue ut nequeꞌa̱tinac chicuix. Nequeꞌxcꞌoxla nak yo̱quin chixcꞌulbal li raylal xban li ma̱c xinba̱nu.

8 Nequeꞌxye nak incꞌaꞌ us xinba̱nu. Joꞌcan nak yo̱quin xcꞌulbal chi joꞌcan. Nim xyajel. Aꞌan ta̱ca̱mk. Incꞌaꞌ chic ta̱usa̱k, chanqueb.

9 Li tzꞌakal cuami̱g xinixtzꞌekta̱na ajcuiꞌ, li tzꞌakal cuami̱g li cꞌojcꞌo raj inchꞌo̱l riqꞌuin. Xinixtzꞌekta̱na li cuami̱g li quicuaꞌac cuochben.

10 Abanan la̱at, at Ka̱cuaꞌ, chacuuxta̱na taxak cuu, ut chaqꞌue taxak incacuilal re nak tebinqꞌue chixtojbaleb xma̱c.

11 Incꞌaꞌ taxak teꞌnumta̱k saꞌ inbe̱n li xicꞌ nequeꞌiloc cue re nak tinnau nak la̱at sa a̱chꞌo̱l cuiqꞌuin.

12 At Ka̱cuaꞌ, la̱at nacanau nak yo̱quin chixba̱nunquil li us cha̱cuu. Ninnau nak la̱at tattenkꞌa̱nk cue ut cua̱nkat cuiqꞌuin chi junelic.—

13 Lokꞌoninbil taxak li Ka̱cuaꞌ, lix Dioseb laj Israel, chi junelic kꞌe cutan. Joꞌcan taxak.

© 2019, Wycliffe Bible Translators. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ