Salmos 4 - Li Santil hu

Laj David quixtzꞌa̱ma saꞌ lix tij nak ta̱tenkꞌa̱k xban li Dios

¹ Chaqꞌue taxak li cꞌaꞌru nintzꞌa̱ma cha̱cuu, at inDios. Caꞌaj cuiꞌ a̱cuiqꞌuin nintau xti̱quilal inchꞌo̱l. Nak cuanquin saꞌ raylal, la̱at nacattenkꞌan cue ut nacaqꞌue xsahil inchꞌo̱l. Chacuil taxak xtokꞌoba̱l cuu ut chacuabi taxak lin tij.

² Ex cui̱nk, la̱ex li nequerecꞌa e̱rib nak nim e̱cuanquil, ¿jokꞌe te̱canab inhobbal xban lin lokꞌal qꞌuebil cue xban li Dios? ¿Jokꞌe te̱canab xra̱bal ru li ma̱cꞌaꞌ na-oc cuiꞌ? Ut, ¿jokꞌe te̱canab li ticꞌtiꞌic?

³ Chenauhak nak la̱in sicꞌbil cuu xban li Dios xban nak ti̱c inchꞌo̱l. Ut chenauhak ajcuiꞌ nak aꞌan narabi nak ninya̱ba lix cꞌabaꞌ.

⁴ Chexucua ru li Dios ut canabomak li ma̱cobc. Nak yo̱kex chi hila̱nc ut nak ma̱cꞌaꞌ chic choki̱nc cheqꞌuehak retal chanru le̱ yuꞌam chiru li Dios.

⁵ Chexmayejak chiru li Ka̱cuaꞌ chi anchal e̱chꞌo̱l ut cauhak e̱chꞌo̱l riqꞌuin li Dios.

⁶ At Ka̱cuaꞌ, nabaleb nequeꞌyehoc re: ¿Ani ta cuiꞌ ta̱ba̱nu̱nk usilal ke? chanqueb. Aꞌut la̱in tintzꞌa̱ma cha̱cuu, at Ka̱cuaꞌ, chacuil taxak xtokꞌoba̱l ku.

⁷ Numtajenak li sahil chꞌo̱lej nacaqꞌue cue, at inDios. Moco joꞌ ta xsahil xchꞌo̱leb li biom li numtajenak cꞌaꞌru reheb.

⁸ Sa saꞌ inchꞌo̱l nak ninyocla ut nincuar chi ma̱cꞌaꞌ incꞌaꞌux. Caꞌaj cuiꞌ la̱at, at Ka̱cuaꞌ, nacatqꞌuehoc xcacuil inchꞌo̱l xban nak la̱at nacat-iloc cue.