Salmos 34 - Li Santil hu

Li Ka̱cuaꞌ naxcoleb chiru li raylal li ti̱queb xchꞌo̱l

¹ La̱in tinlokꞌoni li Ka̱cuaꞌ chi junelic. Ut incꞌaꞌ tincanab xqꞌuebal lix lokꞌal.

² La̱in tinqꞌue xlokꞌal riqꞌuin li usilal naxba̱nu. Cherabihak la̱ex, li tu̱lanex ut chisahokꞌ taxak saꞌ le̱ chꞌo̱l.

³ Chikalokꞌonihak li Ka̱cuaꞌ saꞌ comonil. Chikaqꞌuehak xlokꞌal lix cꞌabaꞌ chi junaj kacꞌaꞌux.

⁴ Quintzꞌa̱ma intenkꞌanquil re li Ka̱cuaꞌ ut aꞌan quixsume li cꞌaꞌru quintzꞌa̱ma re ut quilajrisiheb lin xiu.

⁵ Li queꞌxtzꞌa̱ma xtenkꞌanquil riqꞌuin li Ka̱cuaꞌ, queꞌsahoꞌ saꞌ xchꞌo̱leb xban nak quiqꞌueheꞌ reheb li cꞌaꞌru queꞌxtzꞌa̱ma.

⁶ Nak kꞌaxal ra cuanquin, quintzꞌa̱ma intenkꞌanquil re li Ka̱cuaꞌ, ut aꞌan quixsume li quintzꞌa̱ma re ut quinixcol chiru li raylal.

⁷ Lix ángel li Ka̱cuaꞌ cuan riqꞌuineb li nequeꞌxnima ru li Ka̱cuaꞌ ut aꞌan nacoloc reheb chiru li xiu.

⁸ Yalomak rix li Ka̱cuaꞌ re nak te̱qꞌue retal chanru lix cha̱bilal. Us xak re li ani cau xchꞌo̱l riqꞌuin.

⁹ Cheqꞌuehak xlokꞌal li Ka̱cuaꞌ la̱ex, li ti̱c e̱chꞌo̱l, xban nak li ani naxqꞌue xlokꞌal li Dios, ma̱cꞌaꞌ napaltoꞌ re.

¹⁰ Li nequeꞌxye nak cauheb rib xjuneseb chanchaneb li cakcoj. Eb aꞌan teꞌraj ru cuaꞌac xban nak teꞌtzꞌoca̱k. Abanan li nequeꞌxtzꞌa̱ma xtenkꞌanquil chiru li Dios, aꞌan incꞌaꞌ napaltoꞌ li cꞌaꞌru us chiruheb.

¹¹ Quimkex, ex cualal incꞌajol, ut cherabihak li oc cue chixyebal e̱re. Tincꞌut che̱ru chanru xlokꞌoninquil li Ka̱cuaꞌ.

¹² ¿Ma te̱raj nak najtak rok le̱ yuꞌam saꞌ ruchichꞌochꞌ? Ut, ¿ma te̱raj nak sa cua̱nkex?

¹³ Cui joꞌcan te̱raj, cheqꞌuehak retal li cꞌaꞌru te̱ye. Mex-a̱tinac chi yalak chaꞌak re ru chi moco texticꞌtiꞌik.

¹⁴ Me̱ba̱nu chic li ma̱usilal. Cheba̱nuhak ban li us ut cheqꞌuehak e̱chꞌo̱l chi cua̱nc saꞌ tuktu̱quil usilal.

¹⁵ Li Ka̱cuaꞌ aꞌan naril li cꞌaꞌru nequeꞌxcꞌul li ti̱queb xchꞌo̱l ut naxtenkꞌaheb. Aꞌan narabi nak nequeꞌxtzꞌa̱ma xtenkꞌanquil chiru.

¹⁶ Cuan xjoskꞌil li Dios saꞌ xbe̱neb li nequeꞌxba̱nu li incꞌaꞌ us. Ut nak nequeꞌcam ma̱ ani chic najultican reheb saꞌ ruchichꞌochꞌ xban nak incꞌaꞌ useb xnaꞌlebeb.

¹⁷ Eb li ti̱queb xchꞌo̱l nequeꞌxya̱ba xcꞌabaꞌ li Ka̱cuaꞌ ut aꞌan narabi li cꞌaꞌru nequeꞌxtzꞌa̱ma chiru. Ut aꞌan nacoloc reheb chiru li raylal.

¹⁸ Li Ka̱cuaꞌ junelic cuan chixtenkꞌanquileb li nequeꞌchꞌinan xchꞌo̱leb ut naxqꞌue xcacuileb xchꞌo̱l li nequeꞌchꞌinan xchꞌo̱leb. Ut naxqꞌue xcacuileb xchꞌo̱l li nequeꞌrecꞌa nak incꞌaꞌ chic nequeꞌxcuy xnumsinquil li raylal.

¹⁹ Kꞌaxal nabal li raylal nequeꞌxcꞌul li ti̱queb xchꞌo̱l. Abanan li Ka̱cuaꞌ cuan chixtenkꞌanquileb re nak teꞌxcuy xnumsinquil li raylal.

²⁰ Li Ka̱cuaꞌ ta̱colok re li ti̱c xchꞌo̱l ut ma̱ jun lix bakel ta̱tokekꞌ.

²¹ Aban li incꞌaꞌ useb xnaꞌleb, aꞌ ajcuiꞌ lix ma̱usilaleb ta̱camsi̱nk reheb. Ut teꞌqꞌuehekꞌ chixtojbal rix lix ma̱queb li xicꞌ nequeꞌiloc reheb li ti̱queb xchꞌo̱l.

²² Li Ka̱cuaꞌ ta̱colok reheb li nequeꞌcꞌanjelac chiru. Ut li cauheb xchꞌo̱l riqꞌuin li Ka̱cuaꞌ incꞌaꞌ teꞌqꞌuehekꞌ chixtojbal rix lix ma̱queb.