Salmos 3 - Li Santil hu

Laj David quixtzꞌa̱ma xtenkꞌanquil re li Dios nak quie̱lelic chiru laj Absalón li ralal

¹ At Ka̱cuaꞌ, nabaleb li xicꞌ nequeꞌiloc cue. Nabaleb li nequeꞌraj numta̱c saꞌ inbe̱n.

² Nabaleb li yo̱queb chi a̱tinac chicuix ut nequeꞌxye: Li Dios incꞌaꞌ tixcol aꞌan chiku, chanqueb.

³ Aban la̱at, at Ka̱cuaꞌ, at inDios, junelic niquina̱col chiru li raylal. Nacaqꞌue inlokꞌal ut nacaqꞌue xcacuil inchꞌo̱l.

⁴ Ninya̱ba xcꞌabaꞌ li Ka̱cuaꞌ. Ut aꞌan niquinixsume chak toj saꞌ lix lokꞌlaj santil naꞌaj.

⁵ Nak ninyocla, nincuar ut nincuacli chi sa saꞌ inchꞌo̱l xban nak li Ka̱cuaꞌ natenkꞌan cue.

⁶ Usta sutsu̱quin xbaneb li qꞌuila tenamit, li xicꞌ nequeꞌiloc cue, incꞌaꞌ ninxucuac xbaneb.

⁷ China̱cuabi, at Ka̱cuaꞌ, ut china̱tenkꞌa, at inDios. La̱at nacasach xcuanquileb li xicꞌ nequeꞌiloc cue re nak ma̱cꞌaꞌ teꞌxba̱nu cue. Riqꞌuin la̱ cuanquilal teꞌosokꞌ li incꞌaꞌ useb xnaꞌleb.

⁸ At Ka̱cuaꞌ, la̱at laj Colol ke. Choa̱cuosobtesi taxak la̱o la̱ tenamit.