Salmos 2 - Li Santil hu

Li Dios quixxakab li Ralal chokꞌ Rey

¹ ¿Cꞌaꞌut nak yo̱queb xjoskꞌileb li tenamit li incꞌaꞌ nequeꞌxpa̱b li Dios? Ut, ¿cꞌaꞌut nak yo̱queb xcꞌoxlanquil xba̱nunquil li ma̱cꞌaꞌ na-oc cuiꞌ?

² Eb li rey queꞌjoskꞌoꞌ riqꞌuin li cꞌaꞌru quixba̱nu li Ka̱cuaꞌ. Ut queꞌxchꞌutub rib chixcꞌu̱banquil chanru nak teꞌrisi saꞌ xcuanquil li Rey xakabanbil chak xban li Dios.

³ Yo̱queb chixyebal: —Aꞌan incꞌaꞌ naru nataklan saꞌ kabe̱n. Incꞌaꞌ takaqꞌue kib rubel xcuanquil aꞌan. Kisihak ban kib rubel xcuanquil, chanqueb.

⁴ Abanan li Ka̱cuaꞌ Dios, toj saꞌ choxa naseꞌec xban li cꞌaꞌru nequeꞌxcꞌoxla xba̱nunquil.

⁵ Ut li Dios tixkꞌuseb ajcuiꞌ saꞌ joskꞌil. Ut eb aꞌan teꞌxucuak xban nak cꞌajoꞌ xjoskꞌil nak ta̱a̱tinak.

⁶ Li Dios quixye: —Xinxakab li Rey li xinsicꞌ ru. La̱in xinxakaban re saꞌ lin santil tenamit Sión.— (Jerusalén nayeman ajcuiꞌ re.)

⁷ Joꞌcaꞌin quixye li Rey li xakabanbil xban li Dios: —La̱in tinye resilal yalak bar li cꞌaꞌru quixye cue li Ka̱cuaꞌ nak quixye cue, “La̱at li tzꞌakal cualal. Anakcuan la̱in xatinqꞌue saꞌ a̱cuanquil.

⁸ Tzꞌa̱ma cue ut tinqꞌue a̱cue re nak ta̱cue̱chani chixjunil li tenamit. Ut tinkꞌaxtesi saꞌ a̱cuukꞌ chixjunil li ruchichꞌochꞌ.

⁹ Cau tattakla̱nk saꞌ xbe̱neb li tenamit xban nak la̱ cuanquil xinqꞌue chanchan jun xukꞌ chꞌi̱chꞌ. Joꞌcan nak tatrakok a̱tin saꞌ xbe̱neb toj retal teꞌosokꞌ. Chanchan nak najoreꞌ junak li chꞌochꞌ cuc nak teꞌosokꞌ,” chan li Ka̱cuaꞌ.

¹⁰ Anakcuan ut ex rey, checꞌoxla li cꞌaꞌru te̱ba̱nu ut qꞌuehomak retal li naꞌleb aꞌin, la̱ex li cuan e̱cuanquil saꞌ ruchichꞌochꞌ.

¹¹ Chexucua ru li Dios ut chexcꞌanjelak chiru chi sa saꞌ e̱chꞌo̱l.

¹² Cheqꞌuehak xlokꞌal li Cꞌajolbej re nak incꞌaꞌ ta̱joskꞌokꞌ li Dios saꞌ e̱be̱n. Cheqꞌuehak xlokꞌal re nak incꞌaꞌ ta̱cha̱lk li ca̱mc saꞌ e̱be̱n saꞌ xkꞌehil li rakba a̱tin xban nak aꞌan saꞌ junpa̱t nachal xjoskꞌil. Us xak reheb chixjunileb li nequeꞌxcꞌojob xchꞌo̱l riqꞌuin li Dios.