Salmos 145 - Li Santil hu

Chixjunileb taxak teꞌxqꞌue xlokꞌal li nimajcual Dios xban nak kꞌaxal nim xcuanquil

¹ At inDios, junelic tinqꞌue a̱lokꞌal. At inRey, junelic tinnima a̱cuu.

² Rajlal cutan tatinlokꞌoni ut tinqꞌue xlokꞌal la̱ cꞌabaꞌ junelic.

³ Kꞌaxal nim xcuanquil li nimajcual Dios ut xcꞌulub nak takaqꞌue xlokꞌal. Ut ma̱ ani naru nataꞌoc ru lix nimal xcuanquilal.

⁴ At nimajcual Dios, ta̱qꞌuehekꞌ a̱lokꞌal chi junelic kꞌe cutan xban li cꞌaꞌru calaja̱ba̱nu. Eb li naꞌbej yucuaꞌbej teꞌxye reheb li ralal xcꞌajol li cꞌaꞌru caba̱nu riqꞌuin la̱ cuanquil. Ut eb aꞌan teꞌxye resil reheb li ralal xcꞌajoleb li teꞌcua̱nk mokon.

⁵ Eb li tenamit teꞌxye resil la̱ lokꞌal ut la̱ cuanquilal. Ut la̱in tincꞌoxlak chirix chixjunil li sachba chꞌo̱lej caba̱nu.

⁶ Eb li tenamit teꞌxye resil li cꞌaꞌru caba̱nu riqꞌuin la̱ cuanquil. Ut la̱in tinye resil nak kꞌaxal nim la̱ cuanquilal.

⁷ Eb li tenamit teꞌxye resil lix nimal la̱ cuusilal ut teꞌbicha̱nk re xyebal resil nak la̱at ti̱c a̱chꞌo̱l.

⁸ Li nimajcual Dios, aꞌan cha̱bil ut junelic na-uxta̱nan u. Incꞌaꞌ najoskꞌoꞌ saꞌ junpa̱t. Kꞌaxal nim ban li ruxta̱n.

⁹ Li Ka̱cuaꞌ, aꞌan cha̱bil riqꞌuin chixjunil ut nim li ruxta̱n saꞌ xbe̱n chixjunil li cꞌaꞌru quixyi̱b.

¹⁰ At nimajcual Dios, chiqꞌuehekꞌ taxak la̱ lokꞌal xbaneb chixjunileb li cꞌaꞌru cayi̱b. Ut chiqꞌuehekꞌ taxak la̱ lokꞌal xbaneb la̱ cualal a̱cꞌajol.

¹¹ Cheꞌxyehak ta resil lix lokꞌal la̱ cuanquilal ut cheꞌxyehak ta resil li cꞌaꞌru caba̱nu riqꞌuin xnimal la̱ cuanquil.

¹² Chixjunileb taxak cheꞌabi̱nk re li joꞌ qꞌuial caba̱nu riqꞌuin xnimal la̱ cuanquil. Ut cheꞌxnauhak taxak nak kꞌaxal lokꞌ la̱ cuanquilal.

¹³ La̱at cuan a̱cuanquil chi junelic kꞌe cutan. La̱at nacattaklan chi junelic.

¹⁴ At nimajcual Dios, la̱at nacaqꞌue xcacuil xchꞌo̱leb li yo̱queb chi chꞌina̱nc xchꞌo̱l. Ut la̱at nacattenkꞌan reheb li cuanqueb saꞌ raylal.

¹⁵ Chixjunileb li cuanqueb xyuꞌam saꞌ ruchichꞌochꞌ nequeꞌoybenin a̱cuiqꞌuin. Ac nequeꞌxnau nak la̱at ta̱qꞌue lix tzacae̱mkeb saꞌ xkꞌehil.

¹⁶ Nacaqꞌue xtzacae̱mk ut nequeꞌcuaꞌac toj retal nacꞌojla xchꞌo̱leb.

¹⁷ Li nimajcual Dios naxba̱nu chixjunil saꞌ ti̱quilal. Ut junelic na-uxta̱nan u.

¹⁸ Li Ka̱cuaꞌ junelic cuan chixtenkꞌanquileb li nequeꞌxya̱ba xcꞌabaꞌ. Naxtenkꞌaheb li nequeꞌxtzꞌa̱ma xtenkꞌanquil chiru chi anchal xchꞌo̱leb.

¹⁹ Li Ka̱cuaꞌ naxqꞌue li cꞌaꞌru nequeꞌraj eb li nequeꞌxucuan ru. Narabi nak nequeꞌxtzꞌa̱ma xtenkꞌanquileb chiru ut naxcoleb.

²⁰ Li Ka̱cuaꞌ naxcoleb chixjunileb li nequeꞌrahoc re. Abanan tixsach ruheb li incꞌaꞌ useb xnaꞌleb.

²¹ Junelic taxak tinye resil lix lokꞌal li nimajcual Dios. Chixjunileb taxak teꞌxqꞌue xlokꞌal lix santil cꞌabaꞌ chi junelic kꞌe cutan.