Salmos 144 - Li Santil hu

Laj David quixtzꞌa̱ma nak li Dios tixqꞌueheb lix tenamit chi cua̱nc saꞌ ti̱quilal

¹ Lokꞌoninbil taxak li nimajcual Dios xban nak aꞌan chanchan jun sako̱nac bar naru nincol cuiꞌ cuib. Aꞌan li natenkꞌan cue chi pletic ut naxcꞌut chicuu chanru tinba̱nu nak tinpletik.

² Li Ka̱cuaꞌ, aꞌan li na-uxta̱nan cuu. Caꞌaj cuiꞌ riqꞌuin aꞌan naru nincol cuib. Aꞌan li natenkꞌan cue ut aꞌan li na-iloc cue. Aꞌan li naqꞌuehoc xcacuil inchꞌo̱l. Ut aꞌan li naqꞌuehoc reheb li tenamit rubel incuanquil.

³ At nimajcual Dios, ¿cꞌaꞌut nak nacacꞌoxlaheb li cui̱nk? Eb aꞌan ma̱cꞌaꞌ xcuanquileb. ¿Cꞌaꞌut nak nacaqꞌue a̱chꞌo̱l chirixeb? Eb aꞌan ma̱cꞌaꞌeb xcuanquileb.

⁴ Li cui̱nk ma̱cꞌaꞌ na-oc cuiꞌ. Incꞌaꞌ najt nacuan xyuꞌam. Chanchan li ikꞌ li nanumeꞌ chi junpa̱t.

⁵ At nimajcual Dios, chatcubek chak saꞌ choxa ut ta̱tochꞌ riqꞌuin a̱cuukꞌ eb li tzu̱l re nak teꞌe̱lk xsibel.

⁶ Chatakla chak li ca̱k saꞌ xbe̱neb li xicꞌ nequeꞌiloc cue re nak teꞌxucuak. Chanchan nak ta̱cuteb riqꞌuin la̱ tzimaj re nak teꞌe̱lelik.

⁷ China̱cuisi taxak saꞌ li raylal li cuanquin cuiꞌ ut china̱col taxak. Toj saꞌ choxa ta̱cꞌutbesi la̱ cuanquil re tina̱col. China̱col chiruheb li jalaneb xtenamit.

⁸ China̱col chiruheb xban nak junes ticꞌtiꞌic nequeꞌxba̱nu ut ma̱cꞌaꞌ na-oc cuiꞌ li cꞌaꞌru nequeꞌxye.

⁹ At nimajcual Dios, la̱in tinbicha jun li acꞌ bich re xqꞌuebal a̱lokꞌal. Tinchꞌeꞌ li arpa ut li salterio ut tinbicha̱nk re a̱lokꞌoninquil.

¹⁰ La̱at nacattenkꞌan reheb li rey chi numta̱c saꞌ xbe̱neb li xicꞌ nequeꞌiloc reheb. La̱at nacatcoloc cue re nak incꞌaꞌ tineꞌxcamsi riqꞌuin lix chꞌi̱chꞌeb li xicꞌ nequeꞌiloc cue. La̱in laj David laj cꞌanjel cha̱cuu.

¹¹ China̱tenkꞌa taxak ut china̱col taxak chiruheb li jalaneb xtenamit xban nak junes ticꞌtiꞌic nequeꞌxba̱nu ut ma̱cꞌaꞌ na-oc cuiꞌ li cꞌaꞌru nequeꞌxye.

¹² Chaqꞌue taxak xcacuilaleb li kalal. Chanchanakeb taxak li cha̱bil cheꞌ li yo̱ chi qꞌui̱c chi us. Ut chaqꞌue taxak xcha̱bilaleb li karabin. Chanchanakeb taxak li rokechal li palacio li yi̱banbil chi us.

¹³ Nabal pa̱y taxak ru li kacui̱mk toj retal teꞌnujak li rochochil. Ut cheꞌta̱mk ta chi kꞌaxal numtajenak xqꞌuialeb li kaqueto̱mk.

¹⁴ Cauhakeb ta rib li kabo̱yx chi cꞌanjelac. Ut ma̱ ani ta chi-oc saꞌ li katenamit chikachꞌiꞌchꞌiꞌinquil re nak ma̱ ani japjo̱k re saꞌ be xban raylal.

¹⁵ Us xak reheb li tenamit li teꞌcꞌuluk re li cꞌaꞌak re ru aꞌin. Us xak reheb li tenamit li nequeꞌxqꞌue chokꞌ xDioseb li nimajcual Dios xban nak aꞌan li tzꞌakal Dios.