Salmos 141 - Li Santil hu

Laj David cau xchꞌo̱l riqꞌuin li Dios

¹ At nimajcual Dios, cha̱cuu la̱at yo̱quin chixtzꞌa̱manquil intenkꞌanquil. Chasume taxak chi junpa̱t li cꞌaꞌru nintzꞌa̱ma cha̱cuu.

² Chicuulak taxak a̱cuiqꞌuin lin tij joꞌ nak nacuulac a̱cuiqꞌuin xbo̱c li incienso. La̱in nintaksi li cuukꞌ chi tijoc cha̱cuu. Ta̱cꞌul taxak joꞌ jun li mayej li naqꞌueman chiru li ecuu.

³ At nimajcual Dios, china̱tenkꞌa re nak incꞌaꞌ tinye li incꞌaꞌ us. China̱tenkꞌa re nak incꞌaꞌ tinpaltok riqꞌuin li cꞌaꞌru ninye.

⁴ China̱tenkꞌa re nak incꞌaꞌ ta̱xic inchꞌo̱l chirix li incꞌaꞌ us. Incꞌaꞌ taxak tinba̱nu li ma̱usilal li nequeꞌxba̱nu li incꞌaꞌ useb xnaꞌleb. Ut incꞌaꞌ taxak tincua̱nk saꞌ lix ninkꞌeheb li nequeꞌxba̱nu.

⁵ Kꞌaxal us chokꞌ cue nak junak ti̱c xchꞌo̱l tinixkꞌus. Chanchan tixqꞌue sununquil ban saꞌ injolom. Usta tineꞌxkꞌus, la̱in incꞌaꞌ ra tincuecꞌa. La̱in junelic yo̱kin chi tijoc re nak incꞌaꞌ ta̱cana̱k yal chi joꞌcan li ma̱usilal li yo̱queb chixba̱nunquil li incꞌaꞌ useb xnaꞌleb.

⁶ Eb li nequeꞌtaklan saꞌ xbe̱neb li incꞌaꞌ useb xnaꞌleb toj saꞌ xbe̱n li pec teꞌcutekꞌ chak nak teꞌsachekꞌ ruheb. Toj aran teꞌxqꞌue retal li tenamit nak ya̱l li cꞌaꞌru quinye reheb.

⁷ Cheꞌsachekꞌ ta ruheb chi junaj cua ut chicutekꞌ ta lix bakeleb yalak bar.

⁸ La̱in junelic cau inchꞌo̱l a̱cuiqꞌuin, at Ka̱cuaꞌ. La̱at li nacatcoloc cue. Incꞌaꞌ taxak tina̱canab injunes re nak incꞌaꞌ tineꞌxcamsi li incꞌaꞌ useb xnaꞌleb.

⁹ China̱col taxak chiruheb li xicꞌ nequeꞌiloc cue. Mintꞌaneꞌ taxak saꞌ li raꞌal li queꞌxqꞌue re inchapbal.

¹⁰ Aꞌan eb ta ajcuiꞌ cheꞌtꞌanekꞌ saꞌ li raꞌal li queꞌxqꞌue re inchapbal. China̱tenkꞌa re nak tinnumekꞌ chiruheb chi ma̱cꞌaꞌ tincꞌul.