Salmos 132 - Li Santil hu

Eb laj Israel queꞌxcꞌam li Lokꞌlaj Ca̱x aran Sión

¹ At nimajcual Dios, chijulticokꞌ taxak a̱cue li rey David. Ut cua̱nk taxak saꞌ a̱chꞌo̱l chixjunil li raylal li quixcꞌul.

² Chijulticokꞌ taxak a̱cue li juramento li quixba̱nu a̱cuiqꞌuin la̱at li nimajcual Dios li quixlokꞌoni laj Jacob.

³ Nak quixba̱nu li juramento, quixye: La̱in incꞌaꞌ tin-oc chi hila̱nc saꞌ li cuochoch, chi moco tinyocob cuib saꞌ lin cuarib.

⁴ La̱in incꞌaꞌ tincua̱rk, chi moco tinmutzꞌ bayak li cuu.

⁵ Incꞌaꞌ tinhila̱nk toj tintau xnaꞌaj li Lokꞌlaj Ca̱x li nahilan cuiꞌ li nimajcual Dios. Tento ta̱cua̱nk xnaꞌaj li nimajcual Dios li quixlokꞌoni laj Jacob, chan.

⁶ Quikabi resil li Lokꞌlaj Ca̱x nak cuanco Efrata ut toj saꞌ li qꞌuicheꞌ re Jaar coxkatau chak.

⁷ Yoꞌkeb saꞌ lix tabernáculo li Ka̱cuaꞌ. Takacuikꞌib kib chiru ut takalokꞌoni.

⁸ At Ka̱cuaꞌ, anakcuan takacꞌam li Lokꞌlaj Ca̱x li nahilan cuiꞌ la̱ cuanquilal. Ut tatxic chi cua̱nc saꞌ li naꞌajej Sión.

⁹ Junelic ta cheꞌcua̱nk saꞌ ti̱quilal laj tij ut cheꞌxjap ta reheb la̱ tenamit xban xsahil xchꞌo̱leb.

¹⁰ Saꞌ xcꞌabaꞌ li rey David laj cꞌanjel cha̱cuu, chaba̱nu taxak li cꞌaꞌru cayechiꞌi re xban nak aꞌan sicꞌbil ru a̱ban.

¹¹ Li Ka̱cuaꞌ quixba̱nu jun li juramento riqꞌuin laj David ut incꞌaꞌ tixjal lix cꞌaꞌux. Tixba̱nu ban li cꞌaꞌru quixyechiꞌi re nak quixye: Eb la̱ cualal a̱cꞌajol li teꞌcua̱nk mokon teꞌoc chokꞌ rey chokꞌ a̱cue̱kaj.

¹² Cui eb la̱ cualal a̱cꞌajol teꞌxba̱nu li contrato li xinba̱nu e̱riqꞌuin, ut cui teꞌxba̱nu li cꞌaꞌru tincꞌut chiruheb, li ralal xcꞌajol eb aꞌan teꞌoc ajcuiꞌ junelic chokꞌ rey mokon saꞌ la̱ naꞌaj la̱at, chan li Ka̱cuaꞌ.

¹³ Li Ka̱cuaꞌ quixsicꞌ ru li naꞌajej Sión chokꞌ xnaꞌaj. Aran naraj cua̱nc chi junelic.

¹⁴ Quixye: —Aꞌan aꞌin li naꞌajej nacuaj chokꞌ innaꞌaj. Aran tincua̱nk chi junelic xban nak nacuulac chicuu li naꞌajej aꞌan.

¹⁵ La̱in tincuosobtesi chi nabal li naꞌajej aꞌan ut tinqꞌue cꞌaꞌru reheb, re teꞌtzaca̱nk li ma̱cꞌaꞌ cuan reheb.

¹⁶ La̱in tincolok reheb laj tij. Ut japjo̱keb re xban xsahil xchꞌo̱leb lin tenamit li ti̱queb xchꞌo̱l.

¹⁷ Saꞌ xya̱nkeb li ralal xcꞌajol laj David ta̱yoꞌla̱k jun nim xcuanquil. Aꞌan li sicꞌbil ru inban. Ut aꞌanak li cutan saken chokꞌ reheb li tenamit chi junelic.

¹⁸ Eb li xicꞌ nequeꞌiloc re xuta̱nal teꞌxcꞌul. Abanan aꞌan cua̱nk xcuanquil chi junelic.—