Salmos 1 - Li Santil hu

Usilal cuan saꞌ xbe̱neb li ti̱queb xchꞌo̱l ut raylal cuan saꞌ xbe̱neb laj ma̱c

¹ Us xak re li cui̱nk li incꞌaꞌ naxcꞌu̱luban xtacchiꞌ li incꞌaꞌ useb xnaꞌleb. Us xak re li cui̱nk li incꞌaꞌ naxjunaji rib riqꞌuineb laj ma̱c chi moco naxjunaji rib riqꞌuineb li nequeꞌhoboc re li Ka̱cuaꞌ Dios.

² Nasahoꞌ ban xchꞌo̱l riqꞌuin lix chakꞌrab li Ka̱cuaꞌ. Cuan lix chakꞌrab li Dios saꞌ xchꞌo̱l chi kꞌek chi cutan.

³ Li cui̱nk aꞌan chanchan jun li cheꞌ aubil chire li rok haꞌ. Li cheꞌ aꞌan incꞌaꞌ nachakic. Nau̱chin saꞌ xkꞌehil ut lix xak incꞌaꞌ nakꞌanoꞌ ru. Ut li naru̱chin nache̱coꞌ chi cha̱bil. Joꞌcan nak li cui̱nk li naxcꞌoxla lix chakꞌrab li Dios, us na-el riqꞌuin chixjunil li naxba̱nu.

⁴ Moco joꞌcaneb ta li incꞌaꞌ useb xnaꞌleb. Eb aꞌan chanchaneb lix mokoj ixim li nacꞌameꞌ xban ikꞌ.

⁵ Li incꞌaꞌ useb xnaꞌleb incꞌaꞌ teꞌcolekꞌ chiru li rakba a̱tin ta̱cha̱lk saꞌ xbe̱neb. Teꞌqꞌuehekꞌ ban chixtojbal rix lix ma̱queb. Li Dios ta̱risiheb laj ma̱c saꞌ xya̱nkeb li ti̱queb xchꞌo̱l.

⁶ Li Ka̱cuaꞌ Dios na-iloc reheb li ti̱queb xchꞌo̱l, ut li incꞌaꞌ useb xnaꞌleb teꞌsachekꞌ.