Romanos 8 - Li Santil hu

Li Santil Musikꞌej nocoxtenkꞌa chi cua̱nc saꞌ ti̱quilal

¹ Anakcuan ut ma̱cꞌaꞌ chic li tojba ma̱c saꞌ xbe̱neb li nequeꞌpa̱ban re li Cristo, li incꞌaꞌ chic nequeꞌxba̱nu li nequeꞌxrahi ru lix chꞌo̱leb. Nequeꞌxba̱nu ban li naraj li Santil Musikꞌej.

² Lix cuanquil li Santil Musikꞌej li naqꞌuehoc yuꞌam saꞌ xcꞌabaꞌ li Jesucristo, aꞌan nacoloc cue chiru lix cuanquil li ma̱c ut li ca̱mc.

³ Li najter chakꞌrab incꞌaꞌ naru toxcol chiru li ma̱c ut li ca̱mc. Ma̱cꞌaꞌ xcuanquil re kacolbal xban nak incꞌaꞌ nocoru chixba̱nunquil li naxye. Incꞌaꞌ nocoru chixba̱nunquil li naxye xban nak chalen chak saꞌ kayoꞌlajic la̱o aj ma̱c. Aban li Dios xoxcol chiru li ma̱c. Quixtakla chak li Jesucristo li Ralal chi tzꞌejcualocꞌ saꞌ ruchichꞌochꞌ. Li Ka̱cuaꞌ Jesucristo quixmayeja rib re xsachbal xcuanquil li ma̱c.

⁴ Li Cristo quixsach xcuanquil li ma̱c re nak naru takaba̱nu li ti̱quilal joꞌ naxye saꞌ li chakꞌrab. Incꞌaꞌ chic takaba̱nu li naxrahi ru li kachꞌo̱l. Anakcuan takaba̱nu li cꞌaꞌru naxye li Santil Musikꞌej.

⁵ Ut eb li toj nequeꞌxba̱nu li najter naꞌleb, caꞌaj cuiꞌ li cꞌaꞌru naxrahi ru lix chꞌo̱leb nequeꞌxcꞌoxla xba̱nunquil. Abanan eb li nequeꞌcuan joꞌ naxye li Santil Musikꞌej, eb aꞌan nequeꞌxqꞌue xchꞌo̱l chixba̱nunquil li cꞌaꞌru naraj li Santil Musikꞌej.

⁶ Cui caꞌaj cuiꞌ li naxrahi ru li kachꞌo̱l nakacꞌoxla, aꞌan naxcꞌam chak li ca̱mc saꞌ kabe̱n. Cui nakaqꞌue kachꞌo̱l chixba̱nunquil li naraj li Santil Musikꞌej, aꞌan naxqꞌue ke li kayuꞌam chi junelic ut naxqꞌue ajcuiꞌ ke li tuktu̱quil usilal.

⁷ Li toj yo̱queb chixba̱nunquil li naxrahi ru lix chꞌo̱leb, cuanqueb saꞌ xi̱qꞌuilal riqꞌuin li Dios ut incꞌaꞌ nequeꞌraj xcubsinquil rib rubel xcuanquil lix chakꞌrab li Dios chi moco nequeꞌru chixba̱nunquil.

⁸ Joꞌcan nak li toj nequeꞌxba̱nu li naxrahi ru lix chꞌo̱leb, incꞌaꞌ nasahoꞌ xchꞌo̱l li Dios riqꞌuin li nequeꞌxba̱nu.

⁹ Abanan la̱ex incꞌaꞌ chic yo̱quex chixba̱nunquil li naxrahi ru le̱ chꞌo̱l. Yo̱quex ban chixba̱nunquil li cꞌaꞌru naraj li Santil Musikꞌej cui ya̱l nak cuan li Santil Musikꞌej e̱riqꞌuin. Li ani ma̱cꞌaꞌ li Santil Musikꞌej riqꞌuin, aꞌan ma̱cuaꞌ re li Cristo.

¹⁰ Cui li Cristo cuan e̱riqꞌuin, usta ac tenebanbil li ca̱mc saꞌ e̱be̱n xban li ma̱c, yoꞌyo le̱ musikꞌ xban nak ti̱cobresinbil chic le̱ chꞌo̱l xban li Dios.

¹¹ Li Santil Musikꞌej, aꞌan li quicuaclesin cuiꞌchic re chi yoꞌyo li Cristo saꞌ xya̱nkeb li camenak. Cui li Santil Musikꞌej quicuaclesin re li Cristo, aꞌan ajcuiꞌ ta̱cuaclesi̱nk re le̱ tzꞌejcual chi yoꞌyo re li junelic yuꞌam xban nak li Santil Musikꞌej cuan e̱riqꞌuin.

¹² Joꞌcan ut ex inherma̱n, tento nak te̱ba̱nu li naraj li Santil Musikꞌej ut ma̱cuaꞌ li cꞌaꞌru naxrahi ru le̱ chꞌo̱l.

¹³ Cui toj yo̱quex chixba̱nunquil li naxrahi ru le̱ chꞌo̱l, texca̱mk. Aban cui riqꞌuin e̱tenkꞌanquil xban li Santil Musikꞌej, te̱canab xba̱nunquil le̱ yehom e̱ba̱nuhom li quilaje̱ba̱nu chak junxil, ta̱cua̱nk e̱yuꞌam chi junelic.

¹⁴ Chixjunileb li nequeꞌba̱nun re li cꞌaꞌru naraj li Santil Musikꞌej, aꞌaneb tzꞌakal ralal xcꞌajol li Dios.

¹⁵ La̱ex xecꞌul li Santil Musikꞌej ut ma̱cꞌaꞌ chic e̱xiu. Moco joꞌquex ta junak li mo̱s naxxucua ru lix patrón. Xban nak li Santil Musikꞌej cuan kiqꞌuin, la̱o ban tzꞌakal ralal xcꞌajol li Dios. Joꞌcan nak nakaye “at inYucuaꞌ” re nak nocotijoc.

¹⁶ Li Santil Musikꞌej naxchꞌolob xya̱lal chiku, ut nakecꞌa saꞌ li ka̱m nak la̱o chic ralal xcꞌajol li Dios.

¹⁷ Ut xban nak la̱o ralal xcꞌajol li Dios, kochben li Cristo nak take̱chani chixjunil li quixyechiꞌi ke li Dios. Cui totzꞌako̱nk riqꞌuin li raylal li quixcꞌul li Cristo, joꞌcan nak toxotzꞌako̱nk ajcuiꞌ kochben saꞌ lix nimal xlokꞌal.

¹⁸ La̱in ninye nak li raylal yo̱co chixcꞌulbal anakcuan incꞌaꞌ takaqꞌue saꞌ kachꞌo̱l xban nak moco juntakꞌe̱t ta riqꞌuin li usilal takacꞌul mokon xban nak numtajenak cuiꞌchic lix nimal xlokꞌal li rusilal li Dios tixqꞌue ke.

¹⁹ Chixjunil li cꞌaꞌ re ru yi̱banbil xban li Dios yo̱queb chi xyoꞌoninquil nak ta̱cuulak xkꞌehil nak li Dios tixqꞌue xlokꞌaleb li ralal xcꞌajol.

²⁰ Li ruchichꞌochꞌ tzꞌekta̱nanbil xban li Dios. Moco yal quiraj ta nak quitzꞌekta̱na̱c. Xban nak ac joꞌcan chak saꞌ xchꞌo̱l li Dios. Abanan li ruchichꞌochꞌ toj yo̱ chixyoꞌoninquil nak ta̱colekꞌ.

²¹ Joꞌcan nak li ruchichꞌochꞌ ta̱colekꞌ chiru li tzꞌekta̱na̱c. Ut xban xnimal rusilal li Dios, ta̱colekꞌ li ruchichꞌochꞌ, joꞌ nak teꞌcolekꞌ li ralal xcꞌajol li Dios.

²² Nakanau nak li ruchichꞌochꞌ chalen anakcuan cuan saꞌ raylal ut yo̱ chiroybeninquil nak ta̱usa̱k. Li ruchichꞌochꞌ, aꞌan joꞌ jun li ixk yo̱ chixcꞌulbal li raylal nak ac qꞌuira̱c re.

²³ Ma̱cuaꞌ caꞌaj cuiꞌ li ruchichꞌochꞌ naxcꞌul li raylal. Nayotꞌeꞌ ajcuiꞌ li kachꞌo̱l la̱o aj pa̱banel xban li raylal nakacꞌul, usta ac xkacꞌul li Santil Musikꞌej. Li Santil Musikꞌej aꞌan xbe̱n li kama̱tan naxqꞌue ke li Dios. Yo̱co chiroybeninquil nak li Dios toxcꞌul joꞌ tzꞌakal ralal xcꞌajol ut ta̱jala̱k li katzꞌejcual ut tixqꞌue li kalokꞌal.

²⁴ Xban nak nocopa̱ban, colbilo. Aban cuan ajcuiꞌ li ma̱tan toj ma̱jiꞌ nakacꞌul ut aꞌan li toj yo̱co chiroybeninquil. Cui ta ac xkacꞌul chixjunil, incꞌaꞌ raj chic yo̱co chi oybeni̱nc.

²⁵ Aban li cꞌaꞌru nakoybeni incꞌaꞌ nakil ru ut tento takacuy roybeninquil.

²⁶ Ut li Santil Musikꞌej nocoxtenkꞌa xban nak ma̱cꞌaꞌ naru nakaba̱nu kajunes. Incꞌaꞌ nakanau chanru nak totijok chi moco nakanau cꞌaꞌru takatzꞌa̱ma. Aban li Santil Musikꞌej natzꞌa̱man chikix chiru li Dios riqꞌuin yotꞌba chꞌo̱lej incꞌaꞌ naru xyebal yal riqꞌuin a̱tin.

²⁷ Li Dios naxnau cꞌaꞌru cuan saꞌ kachꞌo̱l ut naxnau ajcuiꞌ lix cꞌaꞌux li Santil Musikꞌej. Ut li Santil Musikꞌej natzꞌa̱man chikix la̱o aj pa̱banel joꞌ naraj li Dios.

Li Jesucristo naxcꞌut chiku nak li Dios nocoxra

²⁸ Li Dios naxsukꞌisi chokꞌ usilal chixjunil li cꞌaꞌak re ru nequeꞌxcꞌul li nequeꞌrahoc re li Dios, aꞌ li bokbileb chixba̱nunquil li cꞌaꞌru naraj li Dios.

²⁹ Chalen saꞌ xticlajic li Dios quixnau aniheb li teꞌpa̱ba̱nk re. Joꞌcan nak quixsiqꞌueb ru ut quixcꞌuleb chokꞌ ralal xcꞌajol. Quixxakab li Jesucristo li Ralal re nak aꞌanak li xbe̱n alalbej saꞌ xya̱nkeb li ralal xcꞌajol.

³⁰ Najter chak kꞌe cutan li Dios ac cuan saꞌ xchꞌo̱l ani li sicꞌbileb ru xban, ut li sicꞌbileb ru aꞌan li quixbokeb; ut li quixbokeb, quixti̱cobresi lix chꞌo̱leb ut naxqꞌueheb ajcuiꞌ xlokꞌal.

³¹ ¿Cꞌaꞌru takaye chirix aꞌin? Cui li Dios cuan kiqꞌuin, eb li xicꞌ nequeꞌiloc ke incꞌaꞌ teꞌnumta̱k saꞌ kabe̱n.

³² Usta li Acuabej Dios kꞌaxal raro li Ralal xban, incꞌaꞌ quixcol chiru li ca̱mc. Quixkꞌaxtesi ban chi ca̱mc saꞌ kacꞌabaꞌ la̱o. Cui quixqꞌue li Ralal re ca̱mc, ¿ma incꞌaꞌ ta biꞌ tixqꞌue ke chixjunil li cꞌaꞌak re ru quixyechiꞌi ke?

³³ ¿Ani ta̱ru̱k ta̱yehok re nak cuanqueb xma̱c li sicꞌbileb ru xban li Dios? Ma̱ ani, xban nak li sicꞌbileb ru ti̱cobresinbileb chic lix chꞌo̱l chiru li Dios.

³⁴ ¿Ani ta̱ru̱k ta̱qꞌuehok reheb laj pa̱banel saꞌ tojba ma̱c? Ma̱ ani xban nak li Jesucristo quicam saꞌ kacꞌabaꞌ ut li Dios quixcuaclesi cuiꞌchic chi yoꞌyo saꞌ xya̱nkeb li camenak. Anakcuan aꞌan cuan saꞌ xnim ukꞌ li Dios ut yo̱ chi a̱tinac chikix chiru li Dios.

³⁵ ¿Cꞌaꞌru ta̱ru̱k ta̱isi̱nk ke riqꞌuin li Cristo li narahoc ke? Ma̱cꞌaꞌ. Li ra xi̱cꞌ incꞌaꞌ naru torisi, chi moco li raylal, chi moco li chꞌaꞌajquilal, chi moco li xi̱cꞌ ilecꞌ, chi moco li cueꞌej, chi moco li cua̱nc saꞌ nebaꞌil, chi moco li camsi̱c. Ma̱cꞌaꞌ naru ta̱isi̱nk ke riqꞌuin li Cristo li narahoc ke.

³⁶ Joꞌcaꞌin tzꞌi̱banbil saꞌ li Santil Hu: Cuulaj cuulaj yo̱queb chixcꞌoxlanquil kacamsinquil saꞌ a̱cꞌabaꞌ. Chiruheb aꞌan chanchano li carner li nequeꞌcꞌameꞌ chi camsi̱c. (Sal. 44:22)

³⁷ Aban li Jesucristo nocoxra ut nocoxtenkꞌa chixcuybal ut chixnumsinquil chixjunil li raylal nakacꞌul.

³⁸ Ninnau chi tzꞌakal nak ma̱cꞌaꞌ naru ta̱isi̱nk ke riqꞌuin lix rahom li Dios. Li ca̱mc incꞌaꞌ naru torisi riqꞌuin lix rahom chi moco li cꞌaꞌak re ru nakacꞌul saꞌ li kayuꞌam. Eb li ángel incꞌaꞌ naru toeꞌrisi chi moco eb li cuanqueb xcuanquil saꞌ ruchichꞌochꞌ, chi moco lix cuanquil li cꞌaꞌak re ru chi musikꞌejil. Li cꞌaꞌak re ru nakacꞌul anakcuan incꞌaꞌ naru torisi riqꞌuin xrahom li Dios chi moco li cꞌaꞌak re ru ta̱cha̱lk.

³⁹ Li cꞌaꞌak re ru cuan takecꞌ, chi moco li cꞌaꞌak re ru cuan takꞌa saꞌ ruchichꞌochꞌ incꞌaꞌ naru torisi riqꞌuin lix rahom li Dios. Chi ya̱l, ma̱cꞌaꞌ naru ta̱isi̱nk ke riqꞌuin lix rahom li Dios. Quixcꞌut chiku nak nocoxra nak quixqꞌue li Jesucristo chi ca̱mc re kacolbal.