Romanos 7 - Li Santil hu

Li chakꞌrab naxcꞌut chiku cꞌaꞌru li ma̱c

¹ Ex herma̱n, la̱ex nequenau cꞌaꞌru naxye saꞌ li chakꞌrab. Nequenau nak li chakꞌrab cuan xcuanquil saꞌ xbe̱neb li toj yoꞌyo̱queb.

² Nak nasumla junak ixk junaj chic ru riqꞌuin lix be̱lom. Tzꞌi̱banbil saꞌ li chakꞌrab nak incꞌaꞌ chic naru nequeꞌxjach rib aꞌ yal joꞌ najtil yoꞌyo̱k li be̱lomej. Aban cui nacam li be̱lomej, li ca̱mc najachoc reheb ut li ixk nacana xjunes.

³ Cui toj yoꞌyo lix be̱lom ut naxsume jalan chic cui̱nk, aꞌan naxmux ru lix sumlajic. Cui nacam li be̱lomej, ma̱cꞌaꞌ chic xcuanquil li chakꞌrab aꞌan saꞌ xbe̱n li ixk. Moco tixmux ta chic ru lix sumlajic cui nasumla riqꞌuin jalan chic cui̱nk.

⁴ Joꞌcan ajcuiꞌ la̱o, ex inherma̱n. Xban nak xkapa̱b li Jesucristo chanchan kochben nak quicam li Cristo. Ut ma̱cꞌaꞌ chic xcuanquil lix chakꞌrab laj Moisés saꞌ kabe̱n. Ut ma̱cꞌaꞌo chic rubel xcuanquil li chakꞌrab. La̱o reho chic li Cristo li quicuacli cuiꞌchic chi yoꞌyo saꞌ xya̱nkeb li camenak re nak tocꞌanjelak chiru li Dios.

⁵ Junxil xkaba̱nu chak li cꞌaꞌru incꞌaꞌ us li quixrahi chak ru li kachꞌo̱l. Li chakꞌrab quixcꞌut chiku cꞌaꞌru li incꞌaꞌ us ut aꞌ chic li incꞌaꞌ us quicuulac chiku xba̱nunquil. Ut riqꞌuin xba̱nunquil aꞌan cuan li ca̱mc.

⁶ Aꞌut anakcuan chanchan li camenako xban nak li najter chakꞌrab ma̱cꞌaꞌ chic xcuanquil chokꞌ ke la̱o. Ma̱cuaꞌ chic li chakꞌrab yal re saꞌ kabe̱n. Ut incꞌaꞌ chic yo̱co chi cꞌanjelac rubel xcuanquil li chakꞌrab tzꞌi̱banbil chak najter. Anakcuan nococꞌanjelac chiru li Dios saꞌ li acꞌ yuꞌam li naxqꞌue ke li Santil Musikꞌej.

Li chakꞌrab ut li ma̱c

⁷ ¿Cꞌaꞌru takaye chirix aꞌin? ¿Ma takaye nak incꞌaꞌ us li chakꞌrab? Incꞌaꞌ. Ma̱ jokꞌe takaye chi joꞌcan. Ninye e̱re nak cui ta ma̱cꞌaꞌ li chakꞌrab, incꞌaꞌ raj xinnau cꞌaꞌru li ma̱c. Moco xinnau ta raj nak incꞌaꞌ us xra̱bal ru li jalan aj e, cui ta incꞌaꞌ tzꞌi̱banbil saꞌ li chakꞌrab chi joꞌcaꞌin: Ma̱ra ru li cꞌaꞌru re la̱ cuas a̱cui̱tzꞌin.

⁸ Li chakꞌrab quicꞌutuc chicuu cꞌaꞌru li ma̱c. Xban nak ac ninnau chic cꞌaꞌru li ma̱c, kꞌaxal cuiꞌchic quinqꞌue inchꞌo̱l chixba̱nunquil. Cui ta ma̱cꞌaꞌ li chakꞌrab ma̱cꞌaꞌ raj li ma̱c.

⁹ Nak toj ma̱jiꞌ ninnau cꞌaꞌru naxye li chakꞌrab, moco nincꞌoxla ta nak la̱in aj ma̱c ut incꞌaꞌ xinnau nak incꞌulub ta li ca̱mc. Aban nak xinnau li chakꞌrab, xinnau nak la̱in aj ma̱c. Ut cue li ca̱mc.

¹⁰ Li chakꞌrab xqꞌue raj inyuꞌam, abanan nak quicuabi chanchan incamsinquil quixba̱nu.

¹¹ Li chakꞌrab cha̱bil ut xqꞌue raj cue li yuꞌam, abanan li ma̱c xinixbalakꞌi. Ut xban li chakꞌrab, li ma̱c xinba̱nu xqꞌue li ca̱mc saꞌ inbe̱n.

¹² Relic chi ya̱l nak li chakꞌrab qꞌuebil chak xban li Dios, aꞌan santil chakꞌrab, ut li kataklanquil xban li Dios santo ajcuiꞌ, ti̱c ut cha̱bil.

¹³ ¿Ma ta̱ru̱k tinye nak li cha̱bil chakꞌrab quicꞌamoc chak li ca̱mc saꞌ inbe̱n? Incꞌaꞌ. Incꞌaꞌ naru tinye chi joꞌcan xban nak ma̱cuaꞌ li chakꞌrab quicꞌamoc chak re li ca̱mc. Aban li ma̱c quicꞌamoc chak re li ca̱mc saꞌ inbe̱n. Li chakꞌrab quixcꞌut chicuu lix yibal ru li ma̱c. Joꞌcan nak li cha̱bil quixcꞌut chicuu li incꞌaꞌ us. Ut li incꞌaꞌ us aꞌan li ma̱c.

¹⁴ Nakanau nak li chakꞌrab musikꞌanbil xban li Dios. Aban la̱in yal cui̱nkin. Joꞌcan nak ninma̱cob.

¹⁵ Incꞌaꞌ nintau ru cꞌaꞌut nak ninba̱nu li incꞌaꞌ us. Nacuaj raj xba̱nunquil li us, abanan aꞌ chic li incꞌaꞌ us li ninba̱nu. Xicꞌ raj nacuil li incꞌaꞌ us aban aꞌan chic li ninba̱nu.

¹⁶ Aꞌ chic li incꞌaꞌ nacuaj xba̱nunquil, aꞌan chic li ninba̱nu ut riqꞌuin aꞌan ninqꞌue retal nak li chakꞌrab cha̱bil xban nak naxcꞌut chicuu nak incꞌaꞌ us li ninba̱nu.

¹⁷ Joꞌcan nak ma̱cuaꞌ chic la̱in li ninba̱nun re li incꞌaꞌ us, aban li ma̱c li cuan cuiqꞌuin, aꞌan nataklan cue.

¹⁸ La̱in ninnau nak moco cha̱bilin ta. Chalen saꞌ inyoꞌlajic la̱in chak aj ma̱c. Nacuaj raj xba̱nunquil li us, abanan incꞌaꞌ ninru chixba̱nunquil.

¹⁹ La̱in nacuaj raj xba̱nunquil li us, aban incꞌaꞌ ninba̱nu. Aꞌ chic li ma̱usilal ninba̱nu, li incꞌaꞌ raj nacuaj xba̱nunquil.

²⁰ Cui la̱in ninba̱nu li incꞌaꞌ nacuaj xba̱nunquil, ma̱cuaꞌ chic la̱in ninba̱nun re; aban li ma̱c li cuan cuiqꞌuin, aꞌan li nataklan cue.

²¹ Aꞌan aꞌin li nincꞌul: Nak nacuaj raj xba̱nunquil li us, aꞌ chic li incꞌaꞌ us li ninba̱nu.

²² Nasahoꞌ saꞌ lin chꞌo̱l riqꞌuin lix chakꞌrab li Dios ut aꞌan li nacuaj xba̱nunquil.

²³ Aban xban nak yal cui̱nkin, nacuecꞌa nak cuan jun li chꞌaꞌajquilal saꞌ li cua̱m naramoc re chicuu li us li nacuaj raj xba̱nunquil. Ut li chꞌaꞌajquil aꞌan, aꞌan li ma̱c li toj cuan cuiqꞌuin, ut chanchan li cuanquin chi pre̱xil xban.

²⁴ ¡Cꞌajoꞌ xtokꞌoba̱l cuu! ¿Ani ta̱colok cue chiru lin najter naꞌleb li nacꞌamoc chak re li ca̱mc saꞌ inbe̱n?

²⁵ Caꞌaj cuiꞌ li Ka̱cuaꞌ Jesucristo ta̱colok cue chiru lin najter naꞌleb. Ac xinkꞌaxtesi cuib rubel xcuanquil lix chakꞌrab li Dios ut acꞌ chic lin naꞌleb. Ninqꞌue inchꞌo̱l chixpa̱banquil li Dios, aban xban nak yal cui̱nkin, toj cuan lin najter naꞌleb cuiqꞌuin. Abanan ninbantioxi chiru li Dios xban nak li Ka̱cuaꞌ Jesucristo ta̱tenkꞌa̱nk cue re nak tincanab xba̱nunquil lin najter naꞌleb.