Romanos 5 - Li Santil hu

Chanru nak natauman li ti̱quil chꞌo̱lej

¹ Joꞌcan ut nak ti̱cobresinbil chic li kachꞌo̱l chiru li Dios xban li kapa̱ba̱l, ut cuanco chic saꞌ usilal riqꞌuin li Dios xban li Ka̱cuaꞌ Jesucristo.

² Xban nak nakapa̱b li Jesucristo nakacꞌul lix nimal rusilal li Dios. Joꞌcan nak cau kachꞌo̱l saꞌ li kapa̱ba̱l. Ut nasahoꞌ kachꞌo̱l xban nak nakanau nak totzꞌako̱nk ajcuiꞌ saꞌ lix nimal xlokꞌal li Dios.

³ Ut moco caꞌaj cuiꞌ ta nasahoꞌ kachꞌo̱l nak totzꞌako̱nk saꞌ lix lokꞌal li Dios. Nasahoꞌ aj ban cuiꞌ saꞌ kachꞌo̱l nak nakacꞌul li raylal. Nakanau nak riqꞌuin xcꞌulbal li raylal nakatzol li cuyuc.

⁴ Ut xban li cuyuc nacacuu kachꞌo̱l saꞌ li kapa̱ba̱l, ut xban xcacuilal kachꞌo̱l nakayoꞌoni li yechiꞌinbil ke xban li Dios.

⁵ Li cꞌaꞌru nakayoꞌoni nakanau nak takacꞌul, xban nak kꞌaxal nocoxra li Dios ut naxcꞌut chiku lix nimal xrahom xban li Santil Musikꞌej li qꞌuebil chak ke.

⁶ La̱o incꞌaꞌ naru nakacol kib yal kajunes. Abanan quicuulac xkꞌehil nak quicam li Ka̱cuaꞌ Jesucristo re kacolbal la̱o aj ma̱c.

⁷ Moco yalak ani ta tixqꞌue rib chi ca̱mc saꞌ xcꞌabaꞌ junak ras ri̱tzꞌin usta cha̱bil li ras ri̱tzꞌin chiru. Abanan cui kꞌaxal ti̱c xchꞌo̱l li ras ri̱tzꞌin, ma̱re cuan ajcuiꞌ junak tixqꞌue rib chi ca̱mc saꞌ xcꞌabaꞌ aꞌan.

⁸ Aꞌut li Dios naxcꞌutbesi chiku nak kꞌaxal nocoxra xban nak toj aj ma̱co chak nak quicam li Cristo saꞌ kacꞌabaꞌ.

⁹ Ut anakcuan ti̱c chic li kachꞌo̱l chiru li Dios xban xcamic li Jesucristo. Joꞌcan nak relic chi ya̱l nak saꞌ xcꞌabaꞌ li Cristo tocolekꞌ chiru lix joskꞌil li Dios saꞌ xkꞌehil li rakba a̱tin.

¹⁰ Nak toj aj ma̱co chak xicꞌ nakil li Dios. Aban li Dios xoxcꞌam saꞌ usilal riqꞌuin saꞌ xcꞌabaꞌ lix camic li Ralal. Ut anakcuan nakanau chic nak cuanco saꞌ usilal riqꞌuin li Dios ut colbilo xban nak li Cristo quicuacli cuiꞌchic chi yoꞌyo.

¹¹ Ut moco caꞌaj cuiꞌ ta li kacolbal quixqꞌue li Dios. Naxqꞌue aj ban cuiꞌ lix sahilal kachꞌo̱l saꞌ xcꞌabaꞌ li Ka̱cuaꞌ Jesucristo li quicꞌamoc ke saꞌ usilal riqꞌuin li Dios.

¹² Joꞌcaꞌin nak quiticla li ma̱c saꞌ ruchichꞌochꞌ, yal xban jun chi cui̱nk aj Adán xcꞌabaꞌ. Ut xban li ma̱c cuan li ca̱mc ut chixjunileb nequeꞌcam xban nak chixjunileb xeꞌma̱cob.

¹³ Nak toj ma̱jiꞌ quiqꞌueheꞌ li chakꞌrab re laj Moisés, ac cuan li ma̱c saꞌ ruchichꞌochꞌ. Aban incꞌaꞌ nayeman nak cuanqueb xma̱c xban nak toj ma̱cꞌaꞌ li chakꞌrab re xcꞌutbal chiruheb nak aꞌan eb aj ma̱c.

¹⁴ Chalen nak quicuan chak laj Adán toj nak quiqꞌueheꞌ lix chakꞌrab laj Moisés, chixjunileb quilajeꞌcam usta incꞌaꞌ queꞌma̱cob riqꞌuin xkꞌetbal xchakꞌrab li Dios joꞌ quixba̱nu laj Adán nak quixkꞌet li a̱tin li quiyeheꞌ re xban li Dios. Xban laj Adán quiticla chak li ma̱c ut li ca̱mc, ut xban li Cristo cuan li colba-ib ut li yuꞌam chi junelic.

¹⁵ Aꞌut li ma̱tan naxqꞌue li Dios moco juntakꞌe̱t ta riqꞌuin li ma̱c quixba̱nu laj Adán li xbe̱n cui̱nk. Li ca̱mc cuan saꞌ xbe̱neb chixjunileb xban nak quikꞌetoc a̱tin laj Adán. Aban saꞌ xcꞌabaꞌ li Jesucristo nabaleb nequeꞌxcꞌul li colba-ib li naxqꞌue li Dios. Ut kꞌaxal cuiꞌchic numtajenak li rusilal naxqꞌue ke.

¹⁶ Li ma̱c quixba̱nu laj Adán incꞌaꞌ naru xjuntakꞌe̱tanquil riqꞌuin li colba-ib quixqꞌue li Dios xban nak kꞌaxal nim xcuanquil li colba-ib. Xban nak quima̱cob laj Adán, joꞌcan nak cuan li tojba ma̱c. Aban li ma̱tan li naxqꞌue li Dios naxti̱cobresi li kachꞌo̱l ut saꞌ xcꞌabaꞌ li Jesucristo nabaleb teꞌcolekꞌ.

¹⁷ Xban lix ma̱c laj Adán, chixjunileb cuanqueb rubel xcuanquil li ca̱mc. Aban xban xnimal rusilal li Dios, nabaleb teꞌxcꞌul li ma̱tan li naxqꞌue li Dios, aꞌ li ti̱quil chꞌo̱lej, ut ta̱cua̱nk xcacuil xchꞌo̱leb saꞌ lix pa̱ba̱leb saꞌ xcꞌabaꞌ li Ka̱cuaꞌ Jesucristo.

¹⁸ Xban lix kꞌetba a̱tin laj Adán cuan li tojba ma̱c saꞌ xbe̱neb chixjunileb li cuanqueb saꞌ ruchichꞌochꞌ. Aꞌut xban lix ti̱quilal xchꞌo̱l li Cristo, ma̱cꞌaꞌ chic xcuanquil li tojba ma̱c saꞌ xbe̱neb. Cua̱nk ban chic xyuꞌameb chi junelic.

¹⁹ Joꞌcan nak xban lix kꞌetba a̱tin laj Adán, nabaleb queꞌcana chokꞌ aj ma̱c. Ut xban nak li Jesucristo quixba̱nu li cꞌaꞌru quixye li Dios, nabaleb teꞌti̱cokꞌ xchꞌo̱l chiru li Dios.

²⁰ Li chakꞌrab quiqꞌueheꞌ re xcꞌutbal nak numtajenak li ma̱c. Ut nak quinumta li ma̱c, kꞌaxal cuiꞌchic quinumta li rusilal li Dios saꞌ xbe̱n li ma̱c.

²¹ Xban nak cuan li ma̱c, cuan ajcuiꞌ li ca̱mc. Abanan xban xnimal rusilal, li Dios naxqꞌue xti̱quilal li kachꞌo̱l ut li kayuꞌam chi junelic saꞌ xcꞌabaꞌ li Ka̱cuaꞌ Jesucristo.