Romanos 1 - Li Santil hu

Xqꞌuebal xsahileb xchꞌo̱l

¹ La̱in laj Pablo laj cꞌanjel chiru li Ka̱cuaꞌ Jesucristo. Sicꞌbil chak cuu xban li Dios chokꞌ x-apóstol ut taklanbilin chixyebal resilal li colba-ib.

² Li Dios quixyechiꞌi li colba-ib aꞌin chalen chak najter ut eb li profetas queꞌxtzꞌi̱ba retalil saꞌ li Santil Hu.

³ Aꞌan aꞌin resilal li Ka̱cuaꞌ Jesucristo li Ralal li Dios. Li Ka̱cuaꞌ Jesucristo tzꞌakal cui̱nk xban nak quiyoꞌla arin saꞌ ruchichꞌochꞌ riqꞌuin jun reheb li ralal xcꞌajol laj David.

⁴ Li Ka̱cuaꞌ Jesucristo aꞌan tzꞌakal Dios. Numtajenak lix santilal. Riqꞌuin lix nimal xcuanquil, li Dios quixcuaclesi cuiꞌchic chi yoꞌyo saꞌ xya̱nkeb li camenak re xcꞌutbal chiku nak aꞌan tzꞌakal Ralal li Dios.

⁵ Saꞌ xcꞌabaꞌ li Ka̱cuaꞌ Jesucristo qꞌuebilin chokꞌ apóstol xban li Dios re xchꞌolobanquil xya̱lal chiruheb li tenamit yalak bar re nak teꞌxpa̱b li Jesucristo ut teꞌxba̱nu li cꞌaꞌru naraj.

⁶ Joꞌcan ajcuiꞌ la̱ex sicꞌbil ajcuiꞌ e̱ru, ut la̱ex chic ralal xcꞌajol li Ka̱cuaꞌ Jesucristo.

⁷ Yo̱quin chi tzꞌi̱bac e̱riqꞌuin la̱ex li cuanquex aran saꞌ li tenamit Roma. Raro̱quex ut bokbilex xban li Dios ut la̱ex aj santil pa̱banel. Li usilal ut li tuktu̱quilal chi cua̱nc e̱riqꞌuin xban li Dios Acuabej ut xban li Ka̱cuaꞌ Jesucristo.

Laj Pablo naraj xic Roma

⁸ Xbe̱n cua ninbantioxi chiru li Dios saꞌ xcꞌabaꞌ li Ka̱cuaꞌ Jesucristo xban nak yalak bar na-abiman resil nak tzꞌakal nequepa̱b li Cristo.

⁹ Nincꞌanjelac chiru li Dios ut chi anchal inchꞌo̱l ninye resil li Ka̱cuaꞌ Jesucristo li Ralal li Dios. Li Dios naxnau nak junelic yo̱quin chi tijoc che̱rix.

¹⁰ Cui li Dios naxqꞌue cue, chi se̱b tincuulak e̱riqꞌuin. Aꞌan li nintzꞌa̱ma junelic chiru li Dios.

¹¹ Nacuaj rilbal e̱ru ut nacuaj e̱tenkꞌanquil re nak cauhakex saꞌ le̱ pa̱ba̱l.

¹² Ut nacuaj rilbal e̱ru re nak takatenkꞌa kib saꞌ li kapa̱ba̱l, la̱ex joꞌ ajcuiꞌ la̱in, xban nak junaj li kapa̱ba̱l.

¹³ Ex herma̱n, nacuaj nak te̱nau nak nabal sut nincꞌoxla raj xic e̱riqꞌuin, abanan toj ma̱jiꞌ naru ninxic. Ma̱re cuan raj teꞌpa̱ba̱nk aran nak teꞌrabi ra̱tin li Dios li tinchꞌolob xya̱lal chiruheb joꞌ nak queꞌpa̱ban chak chicuu saꞌ eb li tenamit quinnumeꞌ cuiꞌ chak.

¹⁴ Tenebanbil saꞌ inbe̱n cꞌanjelac saꞌ xya̱nkeb laj griego joꞌ ajcuiꞌ li ma̱cuaꞌeb aj griego. Tincꞌanjelak saꞌ xya̱nkeb li tzolbileb joꞌ ajcuiꞌ li incꞌaꞌ tzolbileb.

¹⁵ Joꞌcan nak nacuaj tinchꞌolob xya̱lal li colba-ib che̱ru la̱ex li cuanquex Roma.

Lix cuanquil li colba-ib

¹⁶ Incꞌaꞌ ninxuta̱nac chixchꞌolobanquil xya̱lal li colba-ib xban nak aꞌan lix nimal xcuanquil li Dios re xcolbal chixjunil li teꞌpa̱ba̱nk re. Li colba-ib xbe̱n cua qꞌuebil reheb laj judío ut qꞌuebil ajcuiꞌ reheb li ma̱cuaꞌeb aj judío.

¹⁷ Lix ya̱lal li colba-ib naxcꞌut chiku nak caꞌaj cuiꞌ riqꞌuin xpa̱banquil li Dios ti̱c chic li kachꞌo̱l chiru ut cua̱nko chi sum a̱tin riqꞌuin, joꞌ naxye saꞌ li Santil Hu: Li ti̱c xchꞌo̱l riqꞌuin xpa̱banquil li Dios cuan xyuꞌam chi junelic. (Hab. 2:4)

¹⁸ Li Dios yo̱ chak xjoskꞌil toj saꞌ choxa saꞌ xbe̱neb laj ma̱c. Riqꞌuin lix ma̱usilaleb nequeꞌxtzꞌekta̱na lix ya̱lal ut nequeꞌxmuk ajcuiꞌ chiruheb li ras ri̱tzꞌin.

¹⁹ Chixjunil li cꞌaꞌak re ru nanauman chirix li Dios, ac chꞌolchꞌo chiruheb. Aꞌ li Dios ajcuiꞌ quicꞌutbesin chiruheb. Aban incꞌaꞌ nequeꞌxqꞌue xcuanquil lix ya̱lal.

²⁰ Chalen chak saꞌ xticlajic li ruchichꞌochꞌ nacꞌutun xcuanquil ut xlokꞌal li Dios riqꞌuin li cꞌaꞌak re ru quilajxyi̱b. Nacꞌutun nak aꞌan li tzꞌakal Dios ut kꞌaxal nim xcuanquil chi junelic. Joꞌcan nak ma̱cꞌaꞌ junak a̱tin teꞌxcol cuiꞌ rib chiru xjoskꞌil li Dios.

²¹ Nequeꞌxnau nak cuan li Dios, aban incꞌaꞌ queꞌxqꞌue xlokꞌal chi moco queꞌbantioxin chiru. Caꞌaj cuiꞌ li joꞌ ma̱joꞌil naꞌleb nequeꞌxcꞌoxla ut xban aꞌan nak quikꞌojyi̱noꞌ ru lix cꞌaꞌuxeb.

²² Eb aꞌan nequeꞌxye nak cuanqueb xnaꞌleb abanan ma̱cꞌaꞌeb xnaꞌleb.

²³ Incꞌaꞌ nequeꞌxlokꞌoni li yoꞌyo̱quil Dios. Aꞌ chic lix jalam u̱ch li cui̱nk li nacam, aꞌan chic nequeꞌxlokꞌoni. Ut lix jalam u̱ch li xul nequeꞌxqꞌue chokꞌ xdioseb joꞌ li xul li nequeꞌrupupic ut li xul li nequeꞌbe̱c, joꞌqueb ajcuiꞌ li nequeꞌxjucuqui rib chiru chꞌochꞌ.

²⁴ Joꞌcan nak li Dios quixtzꞌekta̱naheb saꞌ xyibal ru lix ma̱usilaleb toj retal nequeꞌxcꞌut xxuta̱neb chi ribileb rib xban nak nequeꞌxba̱nu li joꞌ ma̱joꞌil naꞌleb.

²⁵ Incꞌaꞌ queꞌxpa̱b li tzꞌakal Dios. Aꞌ chic li ticꞌtiꞌ queꞌxqꞌue xcuanquil. Queꞌxnima ru ut queꞌxqꞌue xlokꞌal li cꞌaꞌak re ru yi̱banbil xban li Dios ut incꞌaꞌ queꞌxlokꞌoni li tzꞌakal Dios. Caꞌaj cuiꞌ li tzꞌakal Dios aꞌan xcꞌulub li lokꞌoni̱c chi junelic. Joꞌcan taxak.

²⁶ Li Dios quixtzꞌekta̱naheb saꞌ lix xuta̱nalil naꞌleb xban lix ma̱usilaleb. Ut eb li ixk incꞌaꞌ chic queꞌraj cua̱nc riqꞌuineb lix be̱lom. Riqꞌuin ban chic li rech ixkilal queꞌxba̱nu li moco uxc ta naraj.

²⁷ Ut joꞌcan ajcuiꞌ li cui̱nk incꞌaꞌ chic queꞌraj li ixk li quicanaba̱c reheb xban li Dios. Queꞌtikcuoꞌ xjolomeb xban lix ma̱usilaleb chi ribileb rib ut yo̱queb chixba̱nunquil li tzꞌekbe̱tal aj naꞌleb riqꞌuin rech cui̱nkilal. Ut queꞌxcꞌul ajcuiꞌ xtojbal rix lix ma̱usilaleb joꞌ xcꞌulubeb.

²⁸ Xban nak incꞌaꞌ nequeꞌxcꞌoxla li Dios, joꞌcan nak queꞌtzꞌekta̱na̱c xban li Dios saꞌ li tzꞌekbe̱tal aj naꞌleb chixba̱nunquil li moco uxc ta naraj.

²⁹ Numtajenakeb xyibal ru lix naꞌlebeb ut lix ma̱usilaleb. Aj yumbe̱teb ut aj coꞌbe̱teb. Nequeꞌxra ru li cꞌaꞌru cuan reheb li ras ri̱tzꞌin ut kꞌaxal joskꞌeb. Numtajenakeb chi aj cakal, aj camsihomeb ras ri̱tzꞌin, aj ple̱teb, aj balakꞌeb ut aj molol a̱tineb.

³⁰ Junes yoꞌoba̱nc a̱tin nequeꞌxba̱nu chirixeb li ras ri̱tzꞌin. Xicꞌ nequeꞌril li Dios. Nequeꞌhoboc. Nequeꞌxnimobresi rib ut kꞌetkꞌeteb. Aj kꞌabaneleb ut aj kꞌetoleb ra̱tin xnaꞌ xyucuaꞌ.

³¹ Incꞌaꞌ nequeꞌxtau xya̱lal. Incꞌaꞌ nequeꞌxba̱nu li cꞌaꞌru nequeꞌxsume xba̱nunquil. Incꞌaꞌ nequeꞌrahoc. Incꞌaꞌ nequeꞌcuyuc ma̱c, ut incꞌaꞌ nequeꞌuxta̱nan u.

³² Ac chꞌolchꞌo chiruheb li cꞌaꞌru quixye li Dios. Nequeꞌxnau nak lix tojbal rix li ma̱c, aꞌan li ca̱mc. Aban toj yo̱queb ajcuiꞌ chixba̱nunquil li ma̱c. Ut ma̱cuaꞌ caꞌaj cuiꞌ aꞌan nequeꞌxba̱nu. Nequeꞌsahoꞌ ajcuiꞌ saꞌ xchꞌo̱l chirilbaleb li ras ri̱tzꞌin nak yo̱queb chixba̱nunquil li incꞌaꞌ us.