Proverbios 9 - Li Santil hu

¹ Li ixk li cuan xnaꞌleb quixyi̱b li rochoch ut quixyi̱b ajcuiꞌ cuukub li rokechal li nacu̱tun re.

² Quixcamsiheb li xul nak quixba̱nu lix ninkꞌe saꞌ li rochoch. Quixyi̱b li cha̱bil vino ut quixqꞌue xtzacae̱mk saꞌ me̱x.

³ Ut quixtaklaheb lix mo̱s ixk chixyebal resil reheb li tenamit.

⁴ Queꞌoc chixyebal reheb li toj sa̱jeb: —Quimkex la̱ex li ma̱cꞌaꞌ e̱naꞌleb. La̱ex li incꞌaꞌ nequetau xya̱lal, cha̱lkex.

⁵ Cha̱lkex. Cuaꞌinkex cuiqꞌuin. Ucꞌumak li vino li xinyi̱b.

⁶ Chetauhak le̱ naꞌleb ut chesicꞌak li us. Canabomak li to̱ntil naꞌleb re nak cua̱nk e̱yuꞌam, chanquex.

⁷ Cui ta̱kꞌus junak li kꞌetkꞌet li incꞌaꞌ us xnaꞌleb, ma̱cꞌaꞌ ta̱raj re xban nak aꞌan tatxseꞌe ut tatxhob.

⁸ Ma̱qꞌue xnaꞌleb li ani naxhob ras ri̱tzꞌin xban xkꞌetkꞌetil xban nak aꞌan xicꞌ chic tatril. Abanan cui ta̱qꞌue xnaꞌleb li naxnau cꞌoxlac, aꞌan tatxra.

⁹ Cui ta̱qꞌue xnaꞌleb junak li naxnau cꞌoxlac, aꞌan kꞌaxal cuiꞌchic tixtau xnaꞌleb. Chꞌolob xya̱lal chiru li ani cha̱bil ut aꞌan tixtzol rib chi us.

¹⁰ Riqꞌuin xxucuanquil ru li Dios natauman li cha̱bil naꞌleb. Li ani naxnau ru li Dios Santo naxtau xya̱lal.

¹¹ Cui cha̱bil la̱ naꞌleb ta̱najtokꞌ ru la̱ yuꞌam saꞌ ruchichꞌochꞌ.

¹² Cui la̱at cuan a̱naꞌleb, a̱cue ajcuiꞌ li us. Ut cui la̱at aj hobonel, la̱at ajcuiꞌ tatcꞌuluk re li raylal.

¹³ Li ixk li ma̱cꞌaꞌ xnaꞌleb incꞌaꞌ naraj kꞌusecꞌ ut incꞌaꞌ naxtau xya̱lal.

¹⁴ Nacuulac chiru xchunubanquil rib chiru li rochoch malaj ut saꞌ junak naꞌajej bar cuanqueb cuiꞌ nabal li cristian.

¹⁵ Ut naxbokeb li yo̱queb chi numecꞌ aran, li ti̱queb xchꞌo̱l.

¹⁶ Naxbokeb riqꞌuin li ma̱cꞌaꞌeb xnaꞌleb ut li incꞌaꞌ nequeꞌxtau xya̱lal, ut naxye reheb:

¹⁷ —Us xyalbal xsahil li jalan aj e. Us xyalbal xsahil xba̱nunquil li cꞌaꞌak re ru chi mukmu, chan.

¹⁸ Ut eb aꞌan incꞌaꞌ nequeꞌxnau nak li yo̱queb cuiꞌ chi bokecꞌ aꞌan xnaꞌajeb li camenak. Incꞌaꞌ nequeꞌxqꞌue retal nak yo̱queb chi xic saꞌ xbehil li ca̱mc.