Proverbios 8 - Li Santil hu

¹ ¿Ma incꞌaꞌ ta biꞌ yo̱ chi abi̱c resil li naꞌleb aꞌin yalak bar? Ut, ¿ma incꞌaꞌ ta biꞌ yo̱ chi abi̱c resil li se̱bal chꞌo̱lej?

² Yalak bar yo̱ chi abi̱c resil saꞌ eb li be, saꞌ eb li xa̱la be, joꞌ ajcuiꞌ saꞌ xbe̱n bol.

³ Ut yo̱ ajcuiꞌ chi abi̱c resil saꞌ eb li oqueba̱l re li tenamit.

⁴ Li Jun li cuan xnaꞌleb naxye: Che̱junilex la̱ex li cuanquex saꞌ ruchichꞌochꞌ, e̱riqꞌuin oc cue chi a̱tinac.

⁵ La̱ex li incꞌaꞌ nequetau e̱naꞌleb, chetauhak e̱naꞌleb. Ut la̱ex li incꞌaꞌ nequetau xya̱lal, chetzolak e̱rib.

⁶ Abihomak li oc cue chixyebal xban nak oc cue chi a̱tinac chirix li naꞌleb kꞌaxal lokꞌ ut ti̱c.

⁷ La̱in junelic ya̱l nina̱tinac. Incꞌaꞌ nacuulac chicuu li ma̱usilal.

⁸ Chixjunil li ninye ti̱c. La̱in incꞌaꞌ ninbalakꞌic.

⁹ Chixjunileb li cuanqueb xnaꞌleb nequeꞌxtau ru li ninye, ut nequeꞌxnau nak ya̱l ut cuan xya̱lal.

¹⁰ Me̱sicꞌ li cha̱bil plata chi moco li oro. Chesicꞌ ban li cha̱bil naꞌleb ut le̱ tijbal.

¹¹ Kꞌaxal us xsicꞌbal li cha̱bil naꞌleb chiru li terto̱quil pec li chꞌinaꞌus. Li cha̱bil naꞌleb ma̱ jokꞌe naru xjuntakꞌe̱tanquil riqꞌuin li cꞌaꞌru nakara ru arin saꞌ ruchichꞌochꞌ.

¹² La̱in li cuan innaꞌleb nintau xya̱lal ut ninnau qꞌuehoc cha̱bil naꞌleb.

¹³ Li ani naxxucua ru li Dios, xicꞌ naril li ma̱usilal. La̱in xicꞌ nacuil li kꞌetkꞌetil ut li nimobresi̱nc ib ut li ticꞌtiꞌic.

¹⁴ La̱in ninnau cꞌoxlac chi us. La̱in ninqꞌuehoc naꞌleb ut la̱in ninxakaban reheb saꞌ xcuanquil. Ut la̱in ajcuiꞌ ninqꞌuehoc se̱bal chꞌo̱lej.

¹⁵ Riqꞌuin li naꞌleb li ninqꞌue, eb li rey nequeꞌtaklan saꞌ xya̱lal ut nequeꞌrakoc a̱tin saꞌ ti̱quilal.

¹⁶ Riqꞌuin li naꞌleb li ninqꞌue, eb li rey cuanqueb saꞌ xcuanquil saꞌ ti̱quilal. Riqꞌuin lin naꞌleb nintenkꞌaneb chi rakoc a̱tin.

¹⁷ La̱in nequebinra li nequeꞌcuulac chiruheb xba̱nunquil li cha̱bil naꞌleb. Eb li nequeꞌxqꞌue xchꞌo̱l chixsicꞌbal nequeꞌxtau ajcuiꞌ.

¹⁸ Riqꞌuin li naꞌleb li ninqꞌue natauman li biomal ut li lokꞌal. Li naꞌleb li ninqꞌue natenkꞌan reheb re nak us nequeꞌel.

¹⁹ Li cha̱bil naꞌleb li ninqꞌue la̱in, aꞌan kꞌaxal us chiru li oro li numsinbil saꞌ xam. Li cha̱bil naꞌleb li ninyechiꞌi la̱in, kꞌaxal us chiru li tzꞌakal plata.

²⁰ Li cha̱bil naꞌleb li ninqꞌue, aꞌan naxcꞌut chanru nak texcua̱nk saꞌ xya̱lal ut saꞌ ti̱quilal.

²¹ Eb li nequeꞌcuulac chiruheb xba̱nunquil li cha̱bil naꞌleb nequeꞌxcꞌul xma̱taneb ut xbiomaleb.

²² Li cha̱bil naꞌleb ac cuan riqꞌuin li Dios nak toj ma̱jiꞌ naxyi̱b chak li ruchichꞌochꞌ. Ac cuan ajcuiꞌ chak saꞌ xticlajic li ruchichꞌochꞌ.

²³ Li cha̱bil naꞌleb ac cuan ajcuiꞌ chak nak toj ma̱jiꞌ naxyi̱b chak li ruchichꞌochꞌ li Dios.

²⁴ Li cha̱bil naꞌleb ac cuan ajcuiꞌ chak nak toj ma̱jiꞌ nayi̱ba̱c chak li xni̱nkal ru palau. Ac cuan ajcuiꞌ chak nak toj ma̱jiꞌ nequeꞌyi̱ba̱c chak li nimaꞌ ut li yuꞌam haꞌ.

²⁵ Nak toj ma̱jiꞌ nequeꞌyi̱ba̱c chak li tzu̱l, ac cuan ajcuiꞌ chak li cha̱bil naꞌleb. Nak toj ma̱jiꞌ queꞌqꞌueheꞌ saꞌ xnaꞌajeb li tzu̱l ac cuan ajcuiꞌ chak.

²⁶ Toj ma̱jiꞌ nayoꞌobtesi̱c chak li ruchichꞌochꞌ, li cha̱bil naꞌleb ac cuan ajcuiꞌ chak. Nak toj ma̱cꞌaꞌakeb li cꞌaleba̱l chi moco li chꞌochꞌ ac cuan ajcuiꞌ chak.

²⁷ Li cha̱bil naꞌleb ac cuan ajcuiꞌ chak nak toj ma̱jiꞌ queꞌyi̱ba̱c li choxa li cuan takecꞌ saꞌ xbe̱n li ruchichꞌochꞌ ut li palau.

²⁸ Ac cuan ajcuiꞌ chak nak quiyi̱ba̱c li chok saꞌ choxa. Ut ac cuan ajcuiꞌ chak nak quiyi̱ba̱c li chamal palau.

²⁹ Ac cuan ajcuiꞌ chak li cha̱bil naꞌleb nak li Dios quixye re li palau bar ta̱numekꞌ ut quixye re lix cau ok nak incꞌaꞌ ta̱numekꞌ jun pacꞌal. Ac cuan ajcuiꞌ chak nak quixxakab saꞌ xnaꞌaj li ruchichꞌochꞌ.

³⁰ Riqꞌuin lix cha̱bil naꞌleb li Ka̱cuaꞌ quixyi̱b li ruchichꞌochꞌ ut junelic sa saꞌ xchꞌo̱l riqꞌuin. Li Ka̱cuaꞌ quisahoꞌ saꞌ xchꞌo̱l riqꞌuin li cha̱bil naꞌleb.

³¹ Nasahoꞌ inchꞌo̱l chirilbal li ruchichꞌochꞌ li quixyi̱b. Ut nasahoꞌ ajcuiꞌ saꞌ inchꞌo̱l riqꞌuineb li cristian li quixyoꞌobtesiheb.

³² Joꞌcan ut, ex cualal incꞌajol, cherabihak li cꞌaꞌru ninye e̱re. Us xak e̱re cui te̱ba̱nu li cꞌaꞌru ninye.

³³ Cheqꞌuehak retal li cꞌaꞌru ninye ut me̱tzꞌekta̱na. Chicua̱nk ban e̱naꞌleb.

³⁴ Us xak reheb li nequeꞌabin re li cha̱bil naꞌleb. Us xak reheb li nequeꞌoybenin riqꞌuin ut eb li nequeꞌsicꞌoc re rajlal.

³⁵ Li ani nasicꞌoc re li cha̱bil naꞌleb naxtau li junelic yuꞌam. Ut li ani nasicꞌoc re naxtau li rusilal li Ka̱cuaꞌ.

³⁶ Li ani natzꞌekta̱nan re li cha̱bil naꞌleb, raylal nachal saꞌ xbe̱n. Ut chixjunileb li xicꞌ nequeꞌiloc re, aꞌ li ca̱mc nequeꞌxbok saꞌ xbe̱neb.