Proverbios 7 - Li Santil hu

¹ Ex cualal incꞌajol, checꞌu̱la taxak saꞌ le̱ chꞌo̱l li cua̱tin ut cheba̱nu li naxye lin chakꞌrab.

² Checꞌu̱la saꞌ le̱ chꞌo̱l le̱ chakꞌrabinquil li nequexintakla cuiꞌ re nak us texcua̱nk saꞌ le̱ yuꞌam. Cherahak lin chakꞌrab joꞌ nak nequera li xnakꞌ e̱ru.

³ Chebacꞌ chiru le̱ rukꞌ re nak junelic yo̱kex chirilbal. Ut junelic cua̱nk saꞌ le̱ chꞌo̱l.

⁴ Cheqꞌue xlokꞌal li cha̱bil naꞌleb joꞌ nak nequeqꞌue xlokꞌal le̱ ranab. Qꞌue saꞌ a̱chꞌo̱l li se̱bal chꞌo̱lej joꞌ nak nacaqꞌue saꞌ a̱chꞌo̱l la̱ cuechꞌalal.

⁵ Cui cuan e̱naꞌleb te̱nau xcolbal e̱rib chiruheb li ixk li nequeꞌmuxuc caxa̱r. Cui se̱b e̱chꞌo̱l te̱nau xcolbal e̱rib chiruheb li ixk li nequeꞌkꞌunbesin.

⁶ Saꞌ jun li cutan yo̱quin chi iloc saꞌ li ventana re li cuochoch.

⁷ Ut queꞌcuil jun chꞌu̱taleb li sa̱j al incꞌaꞌ nequeꞌxnau cꞌoxlac. Ut quinqꞌue retal saꞌ xya̱nkeb jun li sa̱j al toj ma̱jiꞌ naxtau xnaꞌleb.

⁸ Nak quicuulac saꞌ xa̱la li be, co̱ saꞌ li be li naxic cuan cuiꞌ li rochoch jun li ixk incꞌaꞌ us xnaꞌleb.

⁹ Aꞌin quicꞌulman ecuu. Ac oc re li kꞌojyi̱n.

¹⁰ Ut li ixk qui-el chak chixcꞌulbal li al. Li xtikibanquil joꞌ nak nequeꞌxtikib ribeb li ixk li nequeꞌxcꞌayi ribeb. Ut se̱b xchꞌo̱l chi kꞌunbesi̱nc.

¹¹ Li ixk incꞌaꞌ us xnaꞌleb se̱b xchꞌo̱l chixba̱nunquil li cꞌaꞌru naraj. Ut incꞌaꞌ nacuan saꞌ li rochoch.

¹² Nacuulac chiru cua̱nc saꞌ eb li be ut saꞌ eb li cꞌayil. Ut naxxakab rib saꞌ xxa̱la be chi ramoc.

¹³ Nak quiril ru li al li ixk aꞌin, quixkꞌalu ut quirutzꞌ ru. Chi ma̱cꞌaꞌ xxuta̱n quixye re:

¹⁴ —La̱in quinyechiꞌi nak tinqꞌue inmayej re xcꞌambal cuib saꞌ usilal riqꞌuin li Dios. Ut anakcuan xinqꞌue lin mayej xinyechiꞌi.

¹⁵ Joꞌcan nak xin-el chak cha̱cꞌulbal. Kꞌaxal tincuaj rilbal a̱cuu ut anakcuan xatintau.

¹⁶ Xinyi̱b lin cuarib chi cha̱bil. Xinqꞌue jun li cha̱bil tꞌicr lino saꞌ lin cuarib. Chꞌinaꞌus xbonol ut chalenak chak Egipto.

¹⁷ Ut xinqꞌue ajcuiꞌ li sununquil ban chiru yi̱banbil riqꞌuin mirra, áloes, ut canela.

¹⁸ Quim. Kayalak xsahil li cua̱nc saꞌ cuibal. Kanumsihak li kꞌojyi̱n saꞌ cuibal ut takara kib.

¹⁹ Lin be̱lom ma̱ ani saꞌ cab anakcuan. Xco̱ chi najt saꞌ xvia̱j.

²⁰ Nabal li tumin xcꞌam nak xco̱. Toj ma̱jiꞌ sukꞌi̱c chak re. Ac chꞌolchꞌo jokꞌe ta̱cꞌulu̱nk, chan li ixk re li al.

²¹ Li ixk aꞌan quire̱chani li al riqꞌuin li a̱tin quixkꞌunbesi cuiꞌ. Quixpuersi toj retal quixqꞌue chi tꞌanecꞌ.

²² Ut saꞌ junpa̱t co̱ li al saꞌ rochoch li ixk. Chanchan li bo̱yx yo̱ chi cꞌamecꞌ re camsi̱c. Malaj ut chanchan li quej li oc re chi tꞌanecꞌ saꞌ li raꞌal.

²³ Incꞌaꞌ naxnau nak yo̱ chixsachbal lix yuꞌam. Chanchan li xul narupupic. Naxic saꞌ junpa̱t chi tꞌanecꞌ saꞌ li raꞌal ut moco naxnau ta nak ta̱sachekꞌ ru xban li naxba̱nu.

²⁴ Joꞌcan ut, ex cualal incꞌajol, cherabihak li cꞌaꞌru tinye e̱re. Canabomak e̱rib chirabinquil le̱ naꞌleb tinqꞌue.

²⁵ Me̱jal e̱cꞌaꞌux ut mexxic riqꞌuin li ixk aꞌan. Me̱tzꞌek e̱rib yal xban li ixk aꞌan.

²⁶ Nabaleb li ac xeꞌxsach xyuꞌam xban li ixk aꞌan. Cauheb raj rib, abanan xqꞌueheb chi ca̱mc.

²⁷ Li rochoch li ixk aꞌan, chanchan lix naꞌajeb li camenak. Cui la̱ex texxic aran, chanchan yo̱quex chi xic saꞌ xbehil li ca̱mc.