Proverbios 6 - Li Santil hu

¹ Ex cualal incꞌajol, cui la̱ex xecꞌu̱luban saꞌ e̱be̱n xtojbal lix cꞌas le̱ ras e̱ri̱tzꞌin cui aꞌan incꞌaꞌ tixtoj, malaj ut te̱sume xtojbal lix cꞌas junak incꞌaꞌ nequenau ru,

² yo̱quex chixbokbal raylal saꞌ e̱be̱n. E̱junes yo̱quex chixqꞌuebal e̱rib saꞌ chꞌaꞌajquilal.

³ Ex cualal incꞌajol, cui la̱ex xeqꞌue e̱rib saꞌ chꞌaꞌajquilal, chenauhak xcolbal e̱rib chiruheb le̱ ras e̱ri̱tzꞌin li xesume oque̱nc chirix. Checubsihak e̱rib, ut yehomak re nak incꞌaꞌ tixqꞌue saꞌ e̱be̱n xtojbal lix cꞌas.

⁴ Me̱canab e̱rib. Yi̱bomak ru le̱ chꞌaꞌajquilal. Mexcuar. Yi̱bomak ban ru chi junpa̱t.

⁵ Chenauhak xcolbal e̱rib chiruheb li cristian aꞌin joꞌ nak naxcol rib li quej chiruheb laj yo̱. Chenauhak xcolbal e̱rib joꞌ nak li xul li naxicꞌan naxcol rib chiru li raꞌal.

⁶ Ilomakeb li sa̱nc, la̱ex li incꞌaꞌ nacuulac che̱ru cꞌanjelac. Qꞌuehomak retal li cꞌaꞌru nequeꞌxba̱nu ut tzolomak e̱rib riqꞌuineb.

⁷ Eb li sa̱nc ma̱ ani nataklan reheb chi moco cuan ta junak ani nayehoc reheb cꞌaꞌru teꞌxba̱nu.

⁸ Abanan chiru li sakꞌehil nequeꞌxsicꞌ lix tzacae̱mk nak yo̱ li kꞌoloc ut nequeꞌxchꞌutub re teꞌxxoc.

⁹ Ut la̱ex li incꞌaꞌ nequeraj cꞌanjelac, ¿jokꞌe te̱canab li cua̱rc? ¿Ma incꞌaꞌ texcuacli̱k? ¿Ma junelic yocyo̱kex?

¹⁰ La̱ex nequeye: —Chocua̱rk cuan chic junpa̱tak, chanquex. Ut kꞌalkꞌo e̱rukꞌ saꞌ e̱rochoch ut yo̱quex chi hila̱nc chi ma̱cꞌaꞌ e̱cꞌaꞌux.

¹¹ Ma̱cꞌaꞌ saꞌ e̱chꞌo̱l nak ta̱cha̱lk li nebaꞌil saꞌ e̱be̱n. Ta̱cha̱lk joꞌ nak nachal laj e̱lkꞌ cuan xchꞌi̱chꞌ saꞌ rukꞌ.

¹² Eb li incꞌaꞌ useb xnaꞌleb ma̱cꞌaꞌ nequeꞌoc cuiꞌ. Junes ticꞌtiꞌic nequeꞌxba̱nu.

¹³ Nequeꞌxmutzꞌ lix nakꞌeb ru re xyebal cꞌaꞌru nequeꞌraj. Ut nequeꞌrecꞌasi li rokeb ut li rukꞌeb re xcꞌutbal li cꞌaꞌru nequeꞌraj.

¹⁴ Junes ma̱usilal cuan saꞌ xchꞌo̱leb. Junelic yo̱queb xcꞌoxlanquil li ma̱usilal. Junes ticoc ple̱t nequeꞌxba̱nu.

¹⁵ Joꞌcan nak ta̱cha̱lk raylal saꞌ xbe̱neb chi ma̱cꞌaꞌ saꞌ xchꞌo̱leb. Ut saꞌ junpa̱t teꞌsachekꞌ ruheb. Incꞌaꞌ chic teꞌcolekꞌ.

¹⁶ Cuan cuukub li naꞌleb li incꞌaꞌ nacuulac chiru li Dios. Aꞌan eb aꞌin:

¹⁷ li ani naxnimobresi rib ut li ani naticꞌtiꞌic, ut li ani naxcamsi ras ri̱tzꞌin chi ma̱cꞌaꞌ xma̱c,

¹⁸ li ani naxcꞌoxla chanru nak tixba̱nu li ma̱usilal, ut li ani nacuulac chiru xba̱nunquil li incꞌaꞌ us,

¹⁹ li ani nakꞌaban ut li ani nayoꞌoban pletic saꞌ xya̱nkeb li ras ri̱tzꞌin.

²⁰ Ex cualal incꞌajol, cheqꞌuehak saꞌ e̱chꞌo̱l le̱ kꞌusbal li nequeꞌxqꞌue le̱ naꞌ e̱yucuaꞌ. Me̱tzꞌekta̱na li naꞌleb nequeꞌxqꞌue.

²¹ Junelic cua̱nk saꞌ e̱chꞌo̱l le̱ chakꞌrabinquil ut me̱canab xba̱nunquil.

²² Aꞌan ta̱beresi̱nk e̱re nak yo̱kex chi be̱c. Ut aꞌan ta̱colok e̱re nak yo̱kex chi cua̱rc. Ut nak texcuacli̱k, aꞌan tixcꞌut che̱ru cꞌaꞌru te̱ba̱nu.

²³ Relic chi ya̱l nak li kachakꞌrabinquil ut li katijbal aꞌan naxcutanobresi li kacꞌaꞌux. Li kakꞌusbal naxqꞌue kanaꞌleb re nak takanau chanru nak tocua̱nk.

²⁴ Cui nequeqꞌue saꞌ e̱chꞌo̱l le̱ kꞌusbal, te̱nau xcolbal e̱rib chiruheb li ixk li incꞌaꞌ useb xnaꞌleb, li nequeꞌkꞌunbesin riqꞌuin cha̱bil a̱tin.

²⁵ Me̱ra ruheb li ixk aꞌan yal xban lix chꞌinaꞌusaleb. Ut me̱qꞌue e̱rib chixbalakꞌiheb yal xban li riloba̱leb.

²⁶ Li cui̱nk li naxic chixsicꞌbaleb li ixk li nequeꞌxcꞌayi rib, naxsach chixjunil lix tumin xban. Ut li cui̱nk li naxchꞌic rib riqꞌuin junak li sumsu̱quil ixk naxsach lix yuꞌam.

²⁷ ¿Ma ta̱ru̱k ta biꞌ tixqꞌue xam chire xchꞌo̱l li cui̱nk chi incꞌaꞌ ta̱cꞌatk li rakꞌ?

²⁸ ¿Ma ta̱ru̱k ta biꞌ ta̱be̱k saꞌ xbe̱n li ru xam chi incꞌaꞌ tixcꞌat li rok?

²⁹ Joꞌcan ajcuiꞌ li cui̱nk li tixchꞌic rib riqꞌuin rixakil li ras ri̱tzꞌin. Ac chꞌolchꞌo nak tixtoj xma̱c.

³⁰ Li ani na-elkꞌac xban xtzꞌocajic incꞌaꞌ natzꞌekta̱na̱c.

³¹ Abanan cui ta̱taꞌekꞌ chi elkꞌac tento nak tixkꞌaxtesi re̱kaj. Cuukub sut chic xqꞌuial li re̱kaj tixqꞌue, usta tento nak tixkꞌaxtesi chixjunil li cꞌaꞌru cuan re.

³² Li ani naxchꞌic rib riqꞌuin junak sumsu, aꞌan ma̱cꞌaꞌ xnaꞌleb. Li jun aꞌan naxsach rib xjunes.

³³ Kꞌaxal ra tixcꞌul. Ma̱ ani ta̱rahok re ut xuta̱nal tixcꞌul chi junelic.

³⁴ Li cui̱nk li yo̱ xjoskꞌil xban xcakal xchꞌo̱l, ma̱ jokꞌe ta̱ril xtokꞌoba̱l ru li ta̱ma̱cobk chiru.

³⁵ Incꞌaꞌ ta̱cꞌojla̱k xchꞌo̱l usta li cui̱nk li cuan xma̱c ta̱raj tixyi̱b ru li chꞌaꞌajquilal. Chi moco ta̱cꞌojla̱k xchꞌo̱l cui ta̱sihi̱k nabalak cꞌaꞌru re.