Proverbios 5 - Li Santil hu

¹ Ex cualal incꞌajol, cheqꞌuehak retal li naꞌleb li yo̱quin chixyebal e̱re. Ut chicana̱k taxak saꞌ e̱chꞌo̱l lix ya̱lal li yo̱quin chixcꞌutbal che̱ru xban nak ninnau chanru li cua̱nc saꞌ ruchichꞌochꞌ.

² Cui te̱qꞌue saꞌ e̱chꞌo̱l li cꞌaꞌru ninye e̱re, texcua̱nk saꞌ xya̱lal. Ut riqꞌuin li cꞌaꞌru te̱ye, ta̱cꞌutu̱nk nak cuan le̱ naꞌleb.

³ Li ixk li incꞌaꞌ us xnaꞌleb naxnau kꞌunbesi̱nc riqꞌuin chꞌinaꞌusil a̱tin. Sa rabinquil. Chanchan xquiꞌal li yaꞌal cab. Li ra̱tin naxkꞌunobresi xchꞌo̱l li junju̱nk, joꞌ li aceite li nakꞌuntesin.

⁴ Li ani ta̱tꞌanekꞌ saꞌ rukꞌ li ixk aꞌan ta̱recꞌa xcꞌahil li raylal li tixcꞌul mokon. Chanchan xcꞌahil li bakcheꞌ. Ut chanchan xkꞌesnal li chꞌi̱chꞌ li caꞌ pacꞌal xkꞌesnal.

⁵ Li cꞌaꞌru naxba̱nu li ixk aꞌan, caꞌaj cuiꞌ li ca̱mc naxqꞌue. Ut aꞌan nacꞌamoc re saꞌ xbalba.

⁶ Li ixk aꞌan incꞌaꞌ nacꞌoxlac chirix lix yuꞌam. Chi moco naxqꞌue retal ma us naxba̱nu malaj ut incꞌaꞌ.

⁷ Anakcuan ut, ex cualal incꞌajol, cherabihak lix ya̱lal li yo̱quin chixchꞌolobanquil che̱ru. Junelic cheba̱nuhak li cꞌaꞌru ninye e̱re.

⁸ Me̱cꞌam e̱rib riqꞌuineb li ixk li incꞌaꞌ useb xnaꞌleb, chi moco texxic saꞌ li rochocheb.

⁹ Mexxic riqꞌuineb re nak incꞌaꞌ te̱mux e̱rib riqꞌuineb, chi moco te̱sach le̱ yuꞌam chi cua̱nc riqꞌuineb.

¹⁰ Incꞌaꞌ us nak jalan chic teꞌyalok xsahil li cꞌaꞌru e̱re li ac xecꞌanjela.

¹¹ Ma̱re mokon texya̱bak xban li raylal ut li xuta̱nal te̱cꞌul nak yo̱kex chi osocꞌ xban li yajel xetau.

¹² Ut te̱ye: —¿Cꞌaꞌut nak incꞌaꞌ xinqꞌue saꞌ inchꞌo̱l li kꞌusbal li quiqꞌueheꞌ cue? ¿Cꞌaꞌut nak xintzꞌekta̱na?

¹³ ¿Cꞌaꞌut nak incꞌaꞌ quinqꞌue xcuanquil lin cha̱bil naꞌleb li queꞌxqꞌue li queꞌtzoloc cue? Incꞌaꞌ quicuaj rabinquil lin tijbal li queꞌxqꞌue.

¹⁴ Caꞌchꞌin chic ma̱ quinsach cuib chi junaj cua saꞌ li ma̱c. Xuta̱nal xincꞌul chiruheb chixjunileb li tenamit, ma̱re chaꞌkat.

¹⁵ At cualal, chatcua̱nk saꞌ ti̱quilal riqꞌuin la̱ cuixakil ut caꞌaj cuiꞌ riqꞌuin aꞌan teꞌcua̱nk la̱ cualal a̱cꞌajol.

¹⁶ ¿Cꞌaꞌru aj e nak teꞌcua̱nk a̱cualal a̱cꞌajol saꞌ be? ¿Cꞌaꞌru aj e nak ta̱canabeb chi tzꞌektzꞌo yalak bar?

¹⁷ Eb la̱ cualal a̱cꞌajol tzꞌakal a̱cueheb. ¿Cꞌaꞌut nak ta̱canabeb re nak jalan chic teꞌxtenkꞌa?

¹⁸ Kꞌaxal lokꞌ nak cua̱nkeb la̱ cualal a̱cꞌajol. Chisahokꞌ taxak saꞌ a̱chꞌo̱l riqꞌuin la̱ cuixakil li xatsumla̱k cuiꞌ saꞌ a̱sa̱jilal.

¹⁹ La̱ cuixakil, aꞌan cha̱bil ut chꞌinaꞌus. Chanchan xchꞌinaꞌusal li quej. Chisahokꞌ taxak a̱chꞌo̱l riqꞌuin xban nak junelic tatxra ut tixcꞌojob a̱chꞌo̱l.

²⁰ ¿Cꞌaꞌut nak ta̱xic a̱chꞌo̱l chirix junak ixk incꞌaꞌ us xnaꞌleb? Ut, ¿cꞌaꞌut nak ta̱kꞌalu cui ma̱cuaꞌ tzꞌakal a̱cuixakil?

²¹ Li Ka̱cuaꞌ yo̱ chirilbal chanru lix naꞌleb li junju̱nk. Ut junelic yo̱ chixqꞌuebal retal cꞌaꞌru nequeꞌxba̱nu.

²² Li incꞌaꞌ useb xnaꞌleb, aꞌ ajcuiꞌ li ma̱usilal li nequeꞌxba̱nu nasachoc reheb. Chanchan bacꞌbo̱queb xban li ma̱c nequeꞌxba̱nu.

²³ Xban nak ma̱cꞌaꞌ xnaꞌleb naxqꞌue lix yuꞌam chi sachc. Ut xban nak incꞌaꞌ naxcuy rib, xjunes naxsach rib.