Proverbios 4 - Li Santil hu

¹ Ex cualal incꞌajol, cherabihak le̱ tijbal li yo̱quin chixyebal e̱re. Cheqꞌuehak retal chi us re nak te̱tau e̱naꞌleb.

² La̱in yo̱quin chixcꞌutbal li cha̱bil naꞌleb che̱ru. Incꞌaꞌ taxak te̱canab xba̱nunquil.

³ La̱in ajcuiꞌ alalbej la̱in. Ut quincꞌul ajcuiꞌ chak inkꞌusbal saꞌ incaꞌchꞌinal nak toj cuanquin chiru lin yucuaꞌ. Raro̱quin xbaneb lin naꞌ inyucuaꞌ.

⁴ Ut lin yucuaꞌ nak quixqꞌue chak innaꞌleb quixye cue chi joꞌcaꞌin: —Chicana̱k taxak saꞌ a̱chꞌo̱l la̱ kꞌusbal li yo̱quin xqꞌuebal a̱cue. Ut chaba̱nuhak taxak li cꞌaꞌru yo̱quin xyebal a̱cue re nak us tatcua̱nk saꞌ ruchichꞌochꞌ.

⁵ Chatauhak taxak a̱naꞌleb ut chatauhak taxak xya̱lal. Ut incꞌaꞌ taxak ta̱sachk saꞌ a̱chꞌo̱l li cꞌaꞌru yo̱quin chixyebal a̱cue.

⁶ Chaqꞌue taxak a̱chꞌo̱l chixtaubal li cha̱bil naꞌleb. Incꞌaꞌ ta̱canab xba̱nunquil, ut aꞌan ta̱colok a̱cue.

⁷ Tento nak ta̱tau a̱naꞌleb ut ta̱tau lix ya̱lal xban nak aꞌan li kꞌaxal lokꞌ chiru chixjunil li cꞌaꞌru cuan a̱cue.

⁸ Cui ta̱qꞌue xcuanquil li cha̱bil naꞌleb, ta̱qꞌuehekꞌ ajcuiꞌ a̱cuanquil la̱at. Ut cui cha̱bil a̱naꞌleb, ta̱qꞌuehekꞌ a̱lokꞌal.

⁹ Cui cha̱bil a̱naꞌleb, ta̱qꞌuehekꞌ a̱lokꞌal la̱at. Chanchan nak ta̱qꞌuehekꞌ a̱kꞌol yi̱banbil riqꞌuin utzꞌuꞌuj, ut chanchan ta̱qꞌuehekꞌ a̱corona saꞌ a̱jolom nak ta̱qꞌuehekꞌ a̱lokꞌal.—

¹⁰ Ex cualal incꞌajol, cheqꞌuehak taxak saꞌ e̱chꞌo̱l le̱ tijbal li yo̱quin chixyebal e̱re re nak ta̱najtokꞌ ru le̱ yuꞌam saꞌ ruchichꞌochꞌ.

¹¹ La̱in yo̱quin chixyebal e̱re li cha̱bil naꞌleb. Ut yo̱quin chixcꞌutbal li cha̱bil be che̱ru.

¹² Nak texbe̱k saꞌ li cha̱bil be incꞌaꞌ te̱tich le̱ rok. Cui cua̱nkex saꞌ xya̱lal, ma̱cꞌaꞌ ta̱chꞌiꞌchꞌiꞌi̱nk e̱re.

¹³ Cheqꞌuehak saꞌ e̱chꞌo̱l le̱ naꞌleb li yo̱quin chixqꞌuebal. Ut me̱canab xba̱nunquil li us, xban nak riqꞌuin aꞌan nacuan le̱ yuꞌam chi junelic.

¹⁴ Me̱ba̱nu e̱re joꞌ nequeꞌxba̱nu li incꞌaꞌ useb xnaꞌleb. Me̱tzol e̱re li cꞌaꞌru nequeꞌxba̱nu.

¹⁵ Mexxic bar cuanqueb cuiꞌ li incꞌaꞌ useb xnaꞌleb. Ut me̱ba̱nu li cꞌaꞌru nequeꞌxba̱nu eb aꞌan. Ba̱nuhomak ban li us.

¹⁶ Eb aꞌan incꞌaꞌ saheb xchꞌo̱l cui incꞌaꞌ nequeꞌxba̱nu li ma̱usilal. Ut incꞌaꞌ nequeꞌcuar chixcꞌoxlanquil li incꞌaꞌ us.

¹⁷ Li ma̱usilal li nequeꞌxba̱nu chanchan chic lix cua rucꞌaheb.

¹⁸ Lix yuꞌameb li ti̱queb xchꞌo̱l, aꞌan cutan saken. Chanchan nak nasake̱u li cutan ekꞌela. Rajlal cutan yo̱queb chixtaubal xya̱lal toj retal ta̱tzꞌaklok re ru lix yuꞌameb.

¹⁹ Abanan eb li incꞌaꞌ useb xnaꞌleb cuanqueb saꞌ xkꞌojyi̱nal ru li ma̱c xban li ma̱usilal nequeꞌxba̱nu. Moco teꞌxnau ta cꞌaꞌru ta̱cha̱lk saꞌ xbe̱neb.

²⁰ Ex cualal incꞌajol, cheqꞌuehak retal chi us li yo̱quin chixyebal e̱re ut qꞌuehomak e̱chꞌo̱l chixba̱nunquil.

²¹ Me̱canab xba̱nunquil li cꞌaꞌru ninye. Checanab ban saꞌ e̱chꞌo̱l.

²² Xban nak li ani naxba̱nu li cꞌaꞌru ninye, aꞌan ta̱cua̱nk xyuꞌam ut ta̱cua̱nk xcacuilal.

²³ Cheqꞌuehak retal chi us li cꞌaꞌru te̱ba̱nu xban nak riqꞌuin xba̱nunquil li us ta̱cua̱nk e̱yuꞌam.

²⁴ Moco yalak chakꞌ ta re ru tex-a̱tinak. Ut incꞌaꞌ texyoꞌoba̱nk ticꞌtiꞌ.

²⁵ Junelic cheba̱nuhak li ti̱quilal ut cheqꞌuehak retal cꞌaꞌru li us.

²⁶ Cheqꞌuehak retal chi us chanru nak texcua̱nk ut cheba̱nuhak li ti̱quilal.

²⁷ Me̱canab xba̱nunquil li us. Junelic ban texcua̱nk saꞌ ti̱quilal.