Proverbios 30 - Li Santil hu

¹ Li a̱tin aꞌin quixye laj Agur li ralal laj Jaqué. Laj Agur quia̱tinac riqꞌuineb laj Itiel ut laj Ucal ut quixye chi joꞌcaꞌin:

² —Relic chi ya̱l la̱in ma̱cꞌaꞌ innaꞌleb. Incꞌaꞌ ninnau cꞌoxlac joꞌ nequeꞌcꞌoxlac eb li cui̱nk.

³ Incꞌaꞌ xintau li xni̱nkal naꞌleb chi moco ninnau lix ya̱lal chirix li Dios Santo.

⁴ ¿Ani li quitakeꞌ toj saꞌ choxa ut quicube cuiꞌchic saꞌ ruchichꞌochꞌ? ¿Ani li quichapoc re li ikꞌ saꞌ rukꞌ? ¿Ani li quilanoc re li haꞌ saꞌ lix tꞌicr? ¿Ani li quixakaban re li ruchichꞌochꞌ saꞌ xnaꞌaj? Cui nacanau ani aꞌan, ye cue. ¿Ani xcꞌabaꞌ ut ani xcꞌabaꞌ li ralal?

⁵ Li Ka̱cuaꞌ nacoloc reheb li nequeꞌxcꞌojob xchꞌo̱l riqꞌuin. Chixjunil li naxye li Ka̱cuaꞌ ya̱l ut tzꞌakal re ru.—

⁶ Ma̱qꞌue xtzꞌakob li ra̱tin li Dios xban nak cui ta̱ba̱nu aꞌan, li Dios tatxkꞌus ut tatcana̱k joꞌ aj ticꞌtiꞌ.

⁷ At Ka̱cuaꞌ, cuib ajcuiꞌ li naꞌleb li nintzꞌa̱ma cha̱cuu. Chaqꞌue taxak cue nak toj ma̱jiꞌ nincam.

⁸ China̱tenkꞌa re nak incꞌaꞌ tinticꞌtiꞌik. Incꞌaꞌ ta̱qꞌue nabal inbiomal, chi moco tina̱canab saꞌ nebaꞌil. Caꞌaj cuiꞌ intzacae̱mk re rajlal cutan ta̱qꞌue cue.

⁹ Cui nabal ta̱qꞌue cue, ma̱re tatintzꞌekta̱na ut ma̱re tinye nak incꞌaꞌ ninnau a̱cuu. Ut cui incꞌaꞌ tzꞌakal li cꞌaꞌru cuan cue, ma̱re tin-elkꞌak ut tincꞌut a̱xuta̱n, at inDios, chan.

¹⁰ Incꞌaꞌ ta̱jit junak li mo̱s chiru lix patrón. Cui ta̱ba̱nu aꞌan, ma̱re tixtzꞌa̱ma ma̱usilal saꞌ a̱be̱n. Ma̱re la̱at chic tatqꞌuehekꞌ chixtojbal rix la̱ ma̱c.

¹¹ Cuanqueb cristian nequeꞌxtzꞌekta̱na xyucuaꞌeb ut incꞌaꞌ nequeꞌxqꞌue xlokꞌal lix naꞌeb.

¹² Cuanqueb li nequeꞌxcꞌoxla nak tzꞌakal re ru lix yuꞌameb, abanan toj ma̱jiꞌ cuybil sachbil lix ma̱queb.

¹³ Cuanqueb li nequeꞌxnimobresi ribeb ut nequeꞌxkꞌetkꞌeti ribeb chiruheb li ras ri̱tzꞌin.

¹⁴ Cuanqueb li nequeꞌrahobtesin reheb li nebaꞌ saꞌ ruchichꞌochꞌ toj retal nequeꞌxmakꞌ chiruheb li cꞌaꞌru cuan reheb.

¹⁵ Cuanqueb cristian caꞌaj cuiꞌ xtzꞌa̱manquil cꞌaꞌru reheb nequeꞌcuulac chiruheb. Chanchaneb li xul li natzꞌubuc quicꞌ. Cuanqueb oxib li incꞌaꞌ natzꞌakloc re li joꞌ qꞌuial nequeꞌxcꞌul. Ut cuan jun chic ma̱ jaruj naxcꞌojob xchꞌo̱l riqꞌuin li joꞌ qꞌuial naxcꞌul.

¹⁶ Li oxibeb, aꞌaneb aꞌin: li mukleba̱l, ut li ixk li incꞌaꞌ nequeꞌqꞌuiresin, ut li chaki chꞌochꞌ li ta̱raj tꞌakresi̱c. Ut li xca̱ li incꞌaꞌ naxcꞌojob xchꞌo̱l riqꞌuin li joꞌ qꞌuial naxcꞌul, aꞌan li xam.

¹⁷ Li ani tixhob lix yucuaꞌ ut li ani tixtzꞌekta̱na lix naꞌleb li ta̱qꞌuehekꞌ xban lix naꞌ, aꞌ ta eb li soꞌsol cheꞌisi̱nk lix nakꞌ ruheb ut teꞌxtiu lix tibeleb.

¹⁸ Cuan ca̱hib chi naꞌleb nasach inchꞌo̱l xcꞌoxlanquil ut incꞌaꞌ nintau ru.

¹⁹ Incꞌaꞌ nintau ru chanru nak narupupic li cꞌuch chiru choxa, chi moco nintau ru chanru nak naxquelo rib li cꞌantiꞌ chiru li pec, chi moco nintau ru chanru nak nequeꞌbe̱c li ni̱nki jucub chiru li palau. Ut incꞌaꞌ nintau ru cꞌaꞌut nak naxic xchꞌo̱l junak cui̱nk chirix junak ixk.

²⁰ Li ixk li naxmux ru xsumlajic nacuaꞌac ut naxchꞌaj saꞌ li re ut naxye nak moco ma̱c ta li naxba̱nu.

²¹ Cuan ca̱hib pa̱y ru li cristian li incꞌaꞌ useb xnaꞌleb li nequeꞌqꞌuehoc chꞌaꞌajquil saꞌ li tenamit. Aꞌaneb aꞌin:

²² Li xbe̱n, aꞌan jun li lokꞌbil mo̱s li na-oc chokꞌ rey; li xcab, aꞌan li ma̱cꞌaꞌ xnaꞌleb li nanumcuaꞌac;

²³ li rox, aꞌan li ixk li xicꞌ na-ileꞌ, li naxtau xbe̱lom; ut li xca̱, aꞌan jun li mo̱s ixk li nacana chokꞌ re̱kaj li ixakilbej.

²⁴ Cuanqueb ca̱hib pa̱y ru li xul saꞌ ruchichꞌochꞌ kꞌaxal coqꞌueb. Abanan kꞌaxal cuan xnaꞌlebeb chiruheb li jun chꞌol chic.

²⁵ Eb li sa̱nc ma̱cꞌaꞌeb xmetzꞌe̱u. Abanan nequeꞌxcꞌu̱la lix tzacae̱mkeb saꞌ sakꞌehil re nak ta̱cua̱nk xtzacae̱mkeb saꞌ habalkꞌe.

²⁶ Joꞌcan eb ajcuiꞌ li imul ma̱cꞌaꞌeb xmetzꞌe̱u. Abanan nequeꞌxnau xcolbal ribeb. Joꞌcan nak nequeꞌxyi̱b xsoc saꞌ xya̱nk li pec.

²⁷ Eb laj sa̱cꞌ ma̱ ani nacꞌamoc be chiruheb. Abanan ac chi chꞌu̱tal cuanqueb nak nequeꞌbe̱c.

²⁸ Eb li x-am naru nacachap riqꞌuin a̱cuukꞌ. Ut naru ajcuiꞌ nequeꞌcuan saꞌ rochoch eb li rey.

²⁹ Cuan oxib pa̱y ruheb li xul li chꞌinaꞌus rilbal nak nequeꞌbe̱c. Ut li xca̱ nabe̱c chi cha̱bil.

³⁰ Lix be̱n, aꞌan li cakcoj li kꞌaxal cau rib saꞌ xya̱nkeb li xul. Ut ma̱ ani naxxucua ru.

³¹ Li xcab, aꞌan li tzoꞌ xul li kꞌaxal kꞌetkꞌet, ut li rox, aꞌan li chiba̱t. Ut li xca̱, aꞌan li rey li naxcꞌameb xbeheb lix soldados chi pletic.

³² Xban nak ma̱cꞌaꞌ a̱naꞌleb, xanimobresi a̱cuib ut xat-oc chixcꞌu̱banquil ru li incꞌaꞌ us. Cꞌoxla chi us cꞌaꞌru ta̱ba̱nu.

³³ Relic chi ya̱l, cui ta̱juyle xsaꞌ li leche, ta̱sukꞌi̱k mantequilla. Ut cui ta̱tochꞌ saꞌ a̱cuuꞌuj chi cau, ta̱e̱lk xquiqꞌuel. Joꞌcan ajcuiꞌ cui ani ta̱chikꞌ xjoskꞌil, ple̱t texrakekꞌ cuiꞌ.