Proverbios 3 - Li Santil hu

¹ Ex cualal incꞌajol, misach saꞌ e̱chꞌo̱l lin chakꞌrab. Chi anchal ban le̱ chꞌo̱l chepa̱bak le̱ taklanquil inban.

² Cui te̱ba̱nu li naxye lin chakꞌrab, ta̱najtokꞌ ru le̱ yuꞌam saꞌ ruchichꞌochꞌ. Ut ta̱cua̱nk li tuktu̱quilal e̱riqꞌuin.

³ Me̱canab xpa̱banquil li ya̱l. Junelic ban cua̱nk saꞌ e̱chꞌo̱l. Me̱canab li uxta̱na̱nc u. Junelic ban cua̱nkex saꞌ ti̱quilal re nak ta̱cꞌutu̱nk nak cha̱bil le̱ naꞌleb.

⁴ Cui te̱ba̱nu aꞌin, sahak xchꞌo̱l li Dios e̱riqꞌuin ut cha̱bilak e̱resilal chiruheb li cristian.

⁵ Cauhak e̱chꞌo̱l riqꞌuin li Ka̱cuaꞌ. Me̱cꞌojob e̱chꞌo̱l e̱junes e̱rib yal xban nak cuan e̱naꞌleb.

⁶ Junelic julticak e̱re li Dios riqꞌuin chixjunil li cꞌaꞌru te̱ba̱nu ut aꞌan ta̱beresi̱nk e̱re.

⁷ Me̱cꞌoxla nak kꞌaxal cuan e̱naꞌleb e̱junes e̱rib. Chexucua̱k ban ru li Ka̱cuaꞌ ut canabomak xba̱nunquil li incꞌaꞌ us.

⁸ Cui te̱canab xba̱nunquil li ma̱usilal, kꞌaxal us chokꞌ e̱re. Chanchan nak yo̱kex chixcꞌulbal le̱ ban xban nak cua̱nk chic e̱metzꞌe̱u ut e̱cacuilal.

⁹ Cheqꞌuehak xlokꞌal li Ka̱cuaꞌ riqꞌuin li cꞌaꞌru cuan e̱re. Te̱mayeja li xbe̱n ru le̱ racui̱mk chiru li Ka̱cuaꞌ.

¹⁰ Cui te̱mayeja li xbe̱n ru le̱ racui̱mk, kꞌaxal cuiꞌchic nabal li ru le̱ racui̱mk te̱xoc ut kꞌaxal cuiꞌchic nabalak le̱ vino toj retal ta̱hoyekꞌ.

¹¹ Ex cualal incꞌajol, me̱tzꞌekta̱na le̱ kꞌusbal li naxqꞌue li Ka̱cuaꞌ. Chi moco chextitzꞌk chirabinquil le̱ tijbal li naxqꞌue.

¹² Li Ka̱cuaꞌ naxkꞌus li ani naxra. Chanchan jun li yucuaꞌbej naxkꞌus li ralal xcꞌajol xban nak naxraheb.

¹³ Us xak reheb li nequeꞌxtau xnaꞌlebeb. Ut us xak re li ani se̱b xchꞌo̱l.

¹⁴ Kꞌaxal us nak cua̱nk kanaꞌleb chiru nak cua̱nk kabiomal. Kꞌaxal cuiꞌchic lokꞌ nak cua̱nk kanaꞌleb chiru nak cua̱nk katumin xban nak kꞌaxal cuiꞌchic nacꞌanjelac ke.

¹⁵ Li naꞌleb kꞌaxal cuiꞌchic terto xtzꞌak chiru li terto̱quil pec. Ma̱cꞌaꞌ naru xjuntakꞌe̱tanquil cuiꞌ.

¹⁶ Cui cuan e̱naꞌleb najtak ru le̱ yuꞌam saꞌ ruchichꞌochꞌ. Ut naru ajcuiꞌ nacuan le̱ biomal ut le̱ lokꞌal.

¹⁷ Cui cuan e̱naꞌleb, sahak saꞌ e̱chꞌo̱l junelic. Ut naru ajcuiꞌ nequexcuan saꞌ tuktu̱quil usilal.

¹⁸ Cui cuan e̱naꞌleb, naru nacuan e̱yuꞌam chi junelic. Us xak re li ani naxnau xxocbal saꞌ xchꞌo̱l li naꞌleb aꞌin.

¹⁹ Xban nak cuan xnaꞌleb li Ka̱cuaꞌ Dios quixqꞌue li ruchichꞌochꞌ saꞌ xnaꞌaj, ut quixyi̱b ajcuiꞌ li choxa saꞌ xnaꞌaj riqꞌuin lix se̱bal xchꞌo̱l.

²⁰ Xban nak cuan xnaꞌleb quixjach li haꞌ riqꞌuin li chꞌochꞌ. Ut quixyi̱b ajcuiꞌ li chok re nak tixqꞌue li hab saꞌ ruchichꞌochꞌ.

²¹ Ex cualal incꞌajol, me̱canab xba̱nunquil li cha̱bil naꞌleb. Junelic ban cua̱nk saꞌ e̱chꞌo̱l li us.

²² Cui te̱ba̱nu chi joꞌcan, ta̱cua̱nk le̱ yuꞌam chi junelic ut sahak saꞌ e̱chꞌo̱l.

²³ Ut cauhak le̱ chꞌo̱l nak texxic yalak bar. Nequenau nak ma̱cꞌaꞌ te̱cꞌul.

²⁴ Nak texyocla̱k, ma̱cꞌaꞌak le̱ xiu ut sa texcua̱rk.

²⁵ Incꞌaꞌ texxucuak xban li raylal ta̱cha̱lk saꞌ e̱be̱n chi ma̱cꞌaꞌ saꞌ e̱chꞌo̱l. Chi moco texxucuak xban li raylal li nachal saꞌ xbe̱neb li incꞌaꞌ useb xnaꞌleb.

²⁶ Incꞌaꞌ texxucuak xban nak li Ka̱cuaꞌ tixqꞌue xcacuilal le̱ chꞌo̱l ut aꞌan ta̱colok e̱re re nak incꞌaꞌ textꞌanekꞌ saꞌ junak raꞌal.

²⁷ Me̱kꞌetkꞌeti e̱rib chixba̱nunquil usilal reheb li tenkꞌa̱c teꞌraj, cui cuan che̱ru li cꞌaꞌru te̱tenkꞌa cuiꞌ.

²⁸ Cui naru te̱qꞌue re li cꞌaꞌru te̱tenkꞌa cuiꞌ, qꞌuehomak re saꞌ li ho̱nal aꞌan. Me̱canab chokꞌ re cuulaj.

²⁹ Ut me̱cꞌoxla xba̱nunquil raylal reheb le̱ rechcabal, xban nak ma̱re cꞌojcꞌo xchꞌo̱l e̱riqꞌuin.

³⁰ Incꞌaꞌ texpletik chi ma̱cꞌaꞌ rajbal riqꞌuineb li incꞌaꞌ yo̱queb xba̱nunquil raylal e̱re.

³¹ Me̱cakaliheb li nequeꞌxba̱nu ma̱usilal, chi moco chetzol e̱re li cꞌaꞌru nequeꞌxba̱nu.

³² Li Ka̱cuaꞌ xicꞌ narileb li nequeꞌxba̱nu li incꞌaꞌ us, ut cuan chi sum a̱tin riqꞌuineb li cuanqueb saꞌ ti̱quilal.

³³ Li Ka̱cuaꞌ naxqꞌue raylal saꞌ xbe̱neb lix jun cablal li nequeꞌxba̱nu ma̱usilal. Ut narosobtesiheb lix jun cablal li ti̱queb xchꞌo̱l.

³⁴ Li Ka̱cuaꞌ naxseꞌeheb li nequeꞌxnimobresi rib. Abanan naruxta̱na ruheb li nequeꞌxcubsi ribeb.

³⁵ Cha̱bil ta̱yehekꞌ chirixeb li cuanqueb xnaꞌleb. Abanan xuta̱nal teꞌxcꞌul li incꞌaꞌ nequeꞌxtau xnaꞌleb.