Proverbios 29 - Li Santil hu

¹ Li ani incꞌaꞌ naxqꞌue saꞌ xchꞌo̱l lix kꞌusbal ta̱sachekꞌ ru chi junpa̱t ut ma̱ ani naru nacoloc re chiru li sachc.

² Nak li ti̱queb xchꞌo̱l nequeꞌqꞌueheꞌ saꞌ xcuanquil, eb li tenamit nequeꞌsahoꞌ saꞌ xchꞌo̱leb. Abanan kꞌaxal narahoꞌ saꞌ xchꞌo̱leb nak eb li incꞌaꞌ useb xnaꞌleb nequeꞌqꞌueheꞌ saꞌ xcuanquil.

³ Li ani naraj xtaubal xnaꞌleb naxqꞌue xsahil xchꞌo̱l lix yucuaꞌ. Ut li ani nacuan riqꞌuineb li ixk li nequeꞌxcꞌayi ribeb naxsach lix biomal.

⁴ Li rey li nataklan saꞌ ti̱quilal naxtenkꞌa lix tenamit. Abanan li rey li junes tumin naxcꞌoxla, naxpoꞌ ru lix tenamit.

⁵ Li ani naxye cha̱bil a̱tin re li ras ri̱tzꞌin chi incꞌaꞌ ya̱l li naxye, aꞌan chanchan yo̱ chixqꞌuebal jun li raꞌal re xtꞌanbal.

⁶ Li ma̱c li nequeꞌxba̱nu li incꞌaꞌ useb xnaꞌleb, aꞌan ajcuiꞌ li nasachoc reheb. Abanan li ti̱queb xchꞌo̱l junelic nequeꞌbichan xban xsahileb xchꞌo̱l.

⁷ Li ti̱queb xchꞌo̱l nequeꞌxqꞌue xchꞌo̱l chixtenkꞌanquileb li nebaꞌ. Abanan li incꞌaꞌ useb xnaꞌleb ma̱cꞌaꞌ nequeꞌraj re li cꞌaꞌru nequeꞌxcꞌul li nebaꞌ.

⁸ Eb li nequeꞌcuulac chiru hoboc nequeꞌxtiquib chꞌaꞌajquilal saꞌ junak tenamit. Abanan eb li cuanqueb xnaꞌleb nequeꞌxnau xyi̱banquil ru li chꞌaꞌajquilal.

⁹ Cui li ani cuan xnaꞌleb naxcꞌam saꞌ rakleb a̱tin junak li ma̱cꞌaꞌ xnaꞌleb, li ani ma̱cꞌaꞌ xnaꞌleb junes hoboc naxba̱nu. Ma̱cꞌaꞌ naru xyi̱banquil ru riqꞌuin.

¹⁰ Eb laj camsinel ras ri̱tzꞌin xicꞌ nequeꞌril li ti̱queb xchꞌo̱l. Abanan eb li ti̱queb xchꞌo̱l nequeꞌxsicꞌ xya̱lal chanru nak teꞌcua̱nk saꞌ xya̱lal riqꞌuineb.

¹¹ Li ani ma̱cꞌaꞌ xnaꞌleb saꞌ junpa̱t najoskꞌoꞌ. Abanan li ani cuan xnaꞌleb naxnau xcuybal xjoskꞌil.

¹² Cui junak acuabej naxqꞌue xcuanquil li ticꞌtiꞌ, li jun aꞌan naxpoꞌ xnaꞌlebeb li ani nequeꞌtenkꞌan re.

¹³ Eb li nequeꞌrahobtesi̱c, ut eb li nequeꞌrahobtesin juntakꞌe̱t nequeꞌxcꞌul. Li Ka̱cuaꞌ naxcutanobresi lix ya̱lal chiruheb chi xcabichaleb.

¹⁴ Li rey li nataklan saꞌ ti̱quilal saꞌ xbe̱neb li nebaꞌ, xakxo̱k saꞌ xnaꞌaj lix cuanquil junelic.

¹⁵ Li alalbej li natijeꞌ ut naqꞌueheꞌ xtzꞌu̱m, aꞌan naxtau xnaꞌleb. Abanan li alalbej li nakꞌunbesi̱c, aꞌan naxcꞌut xxuta̱n lix naꞌ.

¹⁶ Nak nequeꞌtam li incꞌaꞌ useb xnaꞌleb, natam ajcuiꞌ li ma̱usilal. Abanan li ti̱queb xchꞌo̱l teꞌril nak ta̱sachekꞌ ruheb li incꞌaꞌ useb xnaꞌleb.

¹⁷ Chekꞌuseb le̱ ralal e̱cꞌajol saꞌ xya̱lal re nak naru te̱cꞌojob e̱chꞌo̱l saꞌ xbe̱neb. Junelic teꞌxqꞌue xsahil e̱chꞌo̱l.

¹⁸ Cui incꞌaꞌ nayeheꞌ re li tenamit cꞌaꞌru naraj li Dios, incꞌaꞌ nequeꞌcuan saꞌ tuktu̱quilal. Us xak reheb li tenamit li nequeꞌxba̱nu li cꞌaꞌru naxye saꞌ lix chakꞌrab li Dios.

¹⁹ Incꞌaꞌ naru xkꞌusbal junak mo̱s yal riqꞌuin kꞌunil a̱tin. Usta naxtau ru li cꞌaꞌru nacaye re, abanan incꞌaꞌ tixba̱nu.

²⁰ Toj naru xqꞌuebal xnaꞌleb li incꞌaꞌ nequeꞌxtau xya̱lal chiruheb li nequeꞌa̱tinac chi incꞌaꞌ nequeꞌxcꞌoxla li cꞌaꞌru nequeꞌxye.

²¹ Li ani naxkꞌunbesi lix mo̱s chalen saꞌ xcaꞌchꞌinal, mokon lix mo̱s chic ta̱e̱chani̱nk re lix jun cablal.

²² Li ani chꞌinpoꞌ naxyoꞌob ra xi̱cꞌ. Ut li ani najoskꞌoꞌ, nabal sut nama̱cob.

²³ Li ani naxnimobresi rib nacubsi̱c xcuanquil xban xkꞌetkꞌetil. Abanan li naxcubsi rib naqꞌueheꞌ xlokꞌal.

²⁴ Li ani na-oquen chirix junak aj e̱lkꞌ, aꞌan xicꞌ naril rib xjunes rib. Usta nayeheꞌ re nak tento tixye li ya̱l, abanan incꞌaꞌ naxye xban xxiu.

²⁵ Li xxucuanquil ru li cui̱nk, aꞌan chanchan jun li raꞌal. Abanan li ani cꞌojcꞌo xchꞌo̱l riqꞌuin li Dios, aꞌan ta̱colekꞌ.

²⁶ Nabaleb li teꞌraj ta̱uxk usilal reheb xban li acuabej. Abanan caꞌaj cuiꞌ li Ka̱cuaꞌ narakoc a̱tin saꞌ ti̱quilal.

²⁷ Eb li ti̱queb xchꞌo̱l xicꞌ nequeꞌril li incꞌaꞌ us. Abanan li incꞌaꞌ useb xnaꞌleb xicꞌ nequeꞌril li ti̱quil chꞌo̱lej.