Proverbios 28 - Li Santil hu

¹ Eb li incꞌaꞌ useb xnaꞌleb nequeꞌe̱lelic usta ma̱ ani yo̱ chi a̱lina̱nc reheb. Abanan eb li ti̱queb xchꞌo̱l incꞌaꞌ nequeꞌxucuac. Cꞌojcꞌo̱queb ban xchꞌo̱l. Chanchaneb li cakcoj.

² Nak li tenamit incꞌaꞌ sa saꞌ xchꞌo̱l cocꞌ aj xsaꞌ nequeꞌxjal li acuabej. Abanan nak cuan junak acuabej cha̱bil xnaꞌleb, li tenamit cau rib ut xakxo saꞌ xnaꞌaj.

³ Nak nachal li cacuil hab saꞌ xbe̱n li acui̱mk, nasach ruheb li acui̱mk. Joꞌcan ajcuiꞌ li incꞌaꞌ useb xnaꞌleb nak nequeꞌxrahobtesiheb li nebaꞌ.

⁴ Li nequeꞌxtzꞌekta̱na li chakꞌrab nequeꞌxqꞌue xlokꞌal li incꞌaꞌ useb xnaꞌleb. Ut eb li nequeꞌxba̱nu li naxye li chakꞌrab, xicꞌ nequeꞌril li cꞌaꞌru nequeꞌxba̱nu eb aꞌan.

⁵ Eb li incꞌaꞌ useb xnaꞌleb incꞌaꞌ nequeꞌxtau ru cꞌaꞌru li ti̱quilal. Abanan eb li nequeꞌxpa̱b li Ka̱cuaꞌ nequeꞌxtau ru cꞌaꞌru li ti̱quilal.

⁶ Kꞌaxal us li cua̱nc saꞌ ti̱quilal, usta nebaꞌo, chiru nak cua̱nk kabiomal ut incꞌaꞌ usak kanaꞌleb.

⁷ Li alalbej li naxba̱nu li naxye lix chakꞌrab li Dios, aꞌan naxnau cꞌoxlac. Abanan li ani nacuulac chiru cua̱nc saꞌ xya̱nkeb li nequeꞌnumcuaꞌac nequeꞌnum-ucꞌac, aꞌan naxcꞌut xxuta̱n lix yucuaꞌ.

⁸ Li ani yo̱ chixtu̱banquil lix biomal riqꞌuin xpatzꞌbal nabal ral li tumin, li biomal li naxchꞌutub aꞌan ta̱cana̱k chokꞌ reheb li nequeꞌiloc xtokꞌoba̱l ruheb li nebaꞌ.

⁹ Li ani incꞌaꞌ naraj rabinquil lix chakꞌrab li Dios, li Dios naxtzꞌekta̱na ajcuiꞌ lix tij aꞌan nak ta̱tijok.

¹⁰ Li ani nequeꞌqꞌuehoc reheb li ti̱queb xchꞌo̱l chi tꞌanecꞌ, aꞌaneb ajcuiꞌ teꞌtꞌanekꞌ saꞌ lix raꞌaleb. Abanan eb li ti̱queb xchꞌo̱l, eb aꞌan teꞌxcꞌul lix kꞌajca̱munquileb.

¹¹ Eb li biom nequeꞌxcꞌoxla nak cuanqueb xnaꞌleb. Abanan junak li nebaꞌ naxnau cꞌoxlac naxqꞌue retal chanru lix naꞌlebeb.

¹² Nak eb li ti̱queb xchꞌo̱l nequeꞌxakaba̱c saꞌ xcuanquil, chixjunileb nequeꞌsahoꞌ saꞌ xchꞌo̱leb. Abanan nak nequeꞌxakaba̱c saꞌ xcuanquil li incꞌaꞌ useb xnaꞌleb, li tenamit nequeꞌxmuk ribeb xbaneb xxiu.

¹³ Li ani naxmuk lix ma̱c, incꞌaꞌ us ta̱e̱lk. Abanan li ani tixpatzꞌ xcuybal xma̱c ut tixcanab xba̱nunquil li ma̱usilal, ta̱uxta̱na̱k ru.

¹⁴ Us xak reheb li ani nequeꞌxxucua ru li Ka̱cuaꞌ. Abanan eb li cauheb xchꞌo̱l ut li incꞌaꞌ nequeꞌxtau xya̱lal, ra teꞌxcꞌul.

¹⁵ Nak junak li acuabej incꞌaꞌ us xnaꞌleb ta̱oc chi takla̱nc saꞌ xbe̱neb li tenamit nebaꞌ, aꞌan chanchan li cakcoj xban nak joskꞌ. Malaj ut chanchan li oso li ta̱tzꞌoca̱k.

¹⁶ Junak li acuabej ma̱cꞌaꞌ xnaꞌleb naxrahobtesi li tenamit. Abanan li acuabej li incꞌaꞌ naxra ru biomal, aꞌan najtak rok lix yuꞌam.

¹⁷ Li ani ta̱ma̱cobk riqꞌuin xcamsinquil li ras ri̱tzꞌin, aꞌan tixtoj rix lix ma̱c chalen toj saꞌ lix camic. Ut ma̱ ani naru natenkꞌan re.

¹⁸ Li ani nacuan saꞌ ti̱quilal ta̱colekꞌ. Ut li ani incꞌaꞌ nacuan saꞌ ti̱quilal ta̱sachekꞌ ru.

¹⁹ Li ani naxtrabaji chi us lix chꞌochꞌ ta̱cua̱nk xtzacae̱mk chi nabal. Abanan li ani nacuulac chiru cua̱nc saꞌ xya̱nkeb li incꞌaꞌ nequeꞌtrabajic, aꞌan ma̱cꞌaꞌ ta̱cua̱nk re.

²⁰ Li ani nacuan saꞌ ti̱quilal ta̱osobtesi̱k xban li Dios. Abanan li ani ta̱raj ru xtaubal xbiomal incꞌaꞌ ta̱cana̱k chi incꞌaꞌ tixtoj rix lix ma̱c.

²¹ Incꞌaꞌ us nak takasicꞌ ru ani takara. Abanan cuanqueb ajcuiꞌ li nequeꞌxsicꞌ ru ani nequeꞌxra yal xban xcꞌulbal xtumineb.

²² Li ani naxra li biomal naraj ru xtaubal lix biomal. Ut incꞌaꞌ naxqꞌue retal nak nebaꞌil yo̱ chi cha̱lc saꞌ xbe̱n.

²³ Li ani naxkꞌus ras ri̱tzꞌin saꞌ xya̱lal ta̱qꞌuehekꞌ xlokꞌal. Abanan li ani incꞌaꞌ naxye li ya̱l incꞌaꞌ ta̱qꞌuehekꞌ xlokꞌal, usta chanchan cha̱bil li a̱tin naxye.

²⁴ Li ani narelkꞌa li cꞌaꞌru cuan re lix naꞌ xyucuaꞌ ut naxye nak moco ma̱c ta li naxba̱nu, aꞌan xcomoneb li nequeꞌsachoc.

²⁵ Li ani naxrahi ru li cꞌaꞌak re ru yal re aꞌan xjunes, aꞌan nayoꞌoban ple̱t. Abanan li ani naxcꞌojob xchꞌo̱l riqꞌuin li Dios us ta̱e̱lk riqꞌuin li cꞌaꞌru naxba̱nu.

²⁶ Li ani naxcꞌojob xchꞌo̱l saꞌ xbe̱n li cꞌaꞌru naxba̱nu xjunes, aꞌan ma̱cꞌaꞌ xnaꞌleb. Abanan li ani cuan xnaꞌleb ta̱colekꞌ.

²⁷ Ma̱cꞌaꞌ ta̱paltok reheb li ani nequeꞌxtenkꞌa eb li nebaꞌ. Abanan li ani incꞌaꞌ nequeꞌxtokꞌoba ruheb li nebaꞌ, tzꞌekta̱nanbilakeb xbaneb chixjunileb.

²⁸ Nak eb li incꞌaꞌ useb xnaꞌleb nequeꞌoc saꞌ xcuanquil, eb li cristian nequeꞌxmuk ribeb xbaneb xxiu. Abanan nak nequeꞌsacheꞌ ruheb li incꞌaꞌ useb xnaꞌleb, us nequeꞌel riqꞌuin li cꞌaꞌru nequeꞌxba̱nu li ti̱queb xchꞌo̱l.