Proverbios 27 - Li Santil hu

¹ Me̱nimobresi e̱rib chixyebal cꞌaꞌru te̱ba̱nu cuulaj xban nak incꞌaꞌ nequenau cꞌaꞌru ta̱cꞌulma̱nk cuulaj.

² Me̱qꞌue e̱lokꞌal e̱junes e̱rib. Kꞌaxal us nak jalan teꞌqꞌuehok e̱lokꞌal.

³ Li pec ut li samaib kꞌaxal chꞌaꞌaj xcuybal li ra̱lal. Abanan kꞌaxal cuiꞌchic chꞌaꞌaj xcuybal lix joskꞌil li ma̱cꞌaꞌ xnaꞌleb.

⁴ Li joskꞌil naqꞌuehoc chꞌaꞌajquilal. Li joskꞌil nasachoc. Abanan li cakali̱nc, aꞌan li kꞌaxal cuiꞌchic ra naxba̱nu.

⁵ Kꞌaxal us nak tatkꞌusuk chi tzꞌakal re ru chiru nak tatrahok chi yal xcab rix a̱chꞌo̱l.

⁶ Kꞌaxal us la̱ cuami̱g li nakꞌusuc a̱cue chi tzꞌakal re ru, usta ra ta̱cuecꞌa nak tatxkꞌus, chiru li jun li xicꞌ na-iloc a̱cue, usta aꞌan naxye nak tzꞌakal a̱cuami̱g.

⁷ Li ani nujenak xsaꞌ incꞌaꞌ chic sa narecꞌa li xyaꞌal cab. Abanan li ta̱tzꞌoca̱k, usta incꞌaꞌ sa, tixtzaca xban nak ta̱tzꞌoca̱k.

⁸ Li ani naxcanab li rochoch, aꞌan chanchan li xul li naxcanab xsoc.

⁹ Li sununquil ban naxqꞌue sahil chꞌo̱lej. Ut naxqꞌue ajcuiꞌ xsahil xchꞌo̱l li cha̱bil naꞌleb li nequeꞌxqꞌue li amigos.

¹⁰ Ma̱tzꞌekta̱naheb la̱ cuami̱g chi moco ta̱tzꞌekta̱naheb li rami̱g la̱ yucuaꞌ. Chi moco tatxic saꞌ rochoch la̱ cuas chixyebal li chꞌaꞌajquilal li cuancat cuiꞌ. Kꞌaxal us nak tatxtenkꞌa la̱ cuechcabal li nachꞌ cuan chiru nak tatxtenkꞌa la̱ cuas li najt cuan.

¹¹ Ex cualal incꞌajol, chicua̱nk e̱naꞌleb re nak sahak inchꞌo̱l e̱riqꞌuin. Chi joꞌcan tinnau xsumenquil li nequeꞌhoboc cue.

¹² Li ani cuanqueb xnaꞌleb nequeꞌxqꞌue retal li raylal ut nequeꞌxcol ribeb chiru. Abanan eb li ma̱cꞌaꞌeb xnaꞌleb nequeꞌxcꞌul li raylal nachal saꞌ xbe̱neb xban nak incꞌaꞌ nequeꞌxnau xqꞌuebal retal.

¹³ Li ani tixsume xtojbal xcꞌas junak incꞌaꞌ naxnau ru, isihomak li rakꞌ ut te̱qꞌue chokꞌ prenda.

¹⁴ Li ani ta̱xic toj ekꞌela chixqꞌuebal xsahil xchꞌo̱l li rami̱g chi japjo̱k re, aꞌan chanchan nak japjo̱k re chixhobbal.

¹⁵ Junak li ixakilbej junes chꞌila̱nc naxba̱nu, aꞌan chanchan li oques li na-oc saꞌ cab rajlal nak yo̱ li hab.

¹⁶ Li ikꞌ incꞌaꞌ naru xrambal, chi moco li aceite ta̱ru̱k ta̱cana̱k saꞌ a̱cuukꞌ. Ta̱hoyekꞌ ban. Joꞌcan ajcuiꞌ li ixk li nacuulac chiru chꞌila̱nc. Incꞌaꞌ naru xrambal chiru.

¹⁷ Li chꞌi̱chꞌ riqꞌuin chꞌi̱chꞌ ajcuiꞌ nakꞌesna̱c. Joꞌcan ajcuiꞌ li cui̱nk. Cui̱nk ajcuiꞌ ta̱qꞌuehok xnaꞌleb.

¹⁸ Li ani naxchꞌolani lix to̱nal lix higo tixtzaca li ru. Ut li ani naril chi us li cꞌaꞌru re lix patrón, aꞌan ta̱qꞌuehekꞌ xlokꞌal.

¹⁹ Joꞌ nak nakil li xnakꞌ ku saꞌ li haꞌ, joꞌcan ajcuiꞌ nak nakaqꞌue retal kacꞌaꞌux riqꞌuin jalan.

²⁰ Li xbalba ut li mukleba̱l ma̱ jokꞌe nequeꞌnujac riqꞌuin li joꞌ qꞌuial nequeꞌxcꞌul. Joꞌcaneb ajcuiꞌ li cristian. Incꞌaꞌ nequeꞌcꞌojla xchꞌo̱l riqꞌuin li joꞌ qꞌuial cuan reheb. Toj nequeꞌxrahi ru xtzꞌakob.

²¹ Li oro ut li plata isinbil lix tzꞌajnil riqꞌuin xam. Abanan eb li cristian nacꞌutun chanru lix naꞌlebeb nak nequeꞌqꞌueheꞌ xlokꞌal.

²² Usta ta̱tenle junak li ma̱cꞌaꞌ xnaꞌleb, abanan ma̱ jokꞌe tixtau xya̱lal. Junelic ban ma̱cꞌaꞌak xnaꞌleb.

²³ Chanauhak rilbaleb la̱ carner. Ut chaqꞌuehak a̱chꞌo̱l chirilbaleb la̱ queto̱mk,

²⁴ xban nak li biomal ut li cuanquilal moco nacuan ta chi junelic. Na-osoꞌ ban.

²⁵ Ta̱e̱lk chi us li ichaj. Nak acak xayocꞌ chak li ichaj, jalan chic re̱kaj ta̱e̱lk.

²⁶ Eb la̱ cocꞌ carner teꞌxqꞌue li lana re nak naru ta̱yi̱b la̱ cuakꞌ. Ut naru ajcuiꞌ nacacꞌayi eb la̱ cocꞌ chiba̱t re nak ta̱cua̱nk a̱tumin re xlokꞌbal la̱ chꞌochꞌ.

²⁷ Ut eb la̱ chiba̱t nabal li leche teꞌxqꞌue re ta̱chꞌolani a̱cuib la̱at, joꞌ ajcuiꞌ la̱ cualal a̱cꞌajol, joꞌqueb ajcuiꞌ chixjunileb li nequeꞌtrabajic saꞌ la̱ cuochoch.